ދެކުނު ކޮރޮރެއާ ގައި ފާއިތުވި ދެތިން ދުވަހު ވެހުނު ބޯވާރޭގެ ސަބަބުން ދިމާވި ފެންބޮޑުވުމާއި ބިންގަނޑު ކަނޑައިގެން ދިޔުމުގެ ހާދިސާ ތަކުގައި މަދުވެގެން 14 މީހުން މަރުވެއްޖެ ކަމަށް އެ ޤައުމުގެ ޑިސާސްޓަރ މެނޭޖްމަންޓް އޮފީހުން ބުނެފިއެވެ.

ސަލާމަތް ކުރުމުގެ މަސައްކަތްތައް ކުރިއަށް ދާއިރު، 12 މީހުން ގެއްލިފައިވާ ކަމަށް ރިޕޯޓު ކުރެވިފައި ވާތީ، މަރުވާ މީހުންގެ އަދަދު އިތުރު ވެދާނެ ކަމުގެ ބިރު އުފެދިފައި ވެއެވެ.

ބުދަ ދުވަހުން ފެށިގެން ވެހެމުންދާ ވާރޭ ގައި ގާތްގަނޑަކަށް 10،000 މީހުން އެމީހުންގެ ގެތަކުން ސަލާމަތް ކޮށްފައި ވާއިރު، 41،000 އަށް ވުރެ ގިނަ ގޭބިސީ ގައި ކަރަންޓު ކެނޑިފައި ވާކަމަށް ލޯކަލް މީޑިއާތަކުން ބުނެފައިވެއެވެ.

އެންމެ ބޮޑަށް ގެއްލުން ލިބުނު ދެކުނާއި މެދު ތެރޭ ސަރަހައްދުތަކުގައި މިހާރު ވާރޭވެހުން މަޑުޖެހިފައިވީ ނަމަވެސް، ވެރިރަށް ސޯލާއި އުތުރު ސަރަހައްދުތަކަށް އިތުރަށް ބޯކޮށް ވާރޭވެހުމުގެ ފުރުސަތު އޮތް ކަމަށް ބުނެފައިވެއެވެ.

ހަލުވިކަމާ އެކު ފެންގަނޑު މައްޗަށް އެރުމުގެ ސަބަބުން އެތައް ހާސް މަގުތަކާއި އިމާރާތް ތަކަށް ގެއްލުންވެ އަދި ފެނުގެ އަޑިޔަށް ގޮސްފައި ވާއިރު، ދަނޑުބިންތަކަށް ގެއްލުންވެ އަދި ގިނަ އަދަދެއްގެ ޖަނަވާރުތައް މަރުވެފައިވާ ކަމަށް ރިޕޯޓުކުރެވިފައިވެއެވެ.

ގެއްލުންތަކުގެ އަސަރު އެންމެ ބޮޑަށް ކޮށްފައި ވަނީ ޤައުމުގެ ދެކުނުގައެވެ. ސަންޗިއޯންގ ކައުންޓީ ގައި 6 މީހުން މަރުވެ އަދި 7 މީހުން ގެއްލިފައިވެއެވެ.

މީގެ އިތުރުން، ސޯލް އާ ކައިރި އުތުރުގެ ފަރުބަދަ ސަރަހައްދުގައާއި އެހެނިހެން ހުޅަނގާއި އުތުރު ސަރަހައްދު ތަކުގައިވެސް މީހުން ވަނީ މަރުވެފައެވެ.

ޤައުމުގެ އެކި ސަރަހައްދު ތަކުގައި ބިންގަނޑު ކަނޑައިގެން ހިނގައިދާނެ ކަމުގެ ނުރައްކަލުގެ އިންޒާރު ދެވިފައިވާއިރު، އާދިއްތަ ދުވަހު ސަރުކާރުން ގިނަ އިދާރާތަކެއް ހިމެނޭ ގޮތުން ގެއްލުންތައް ރަނގަޅު ކުރުމުގެ މަސައްކަތް ވަނީ ފަށާފައެވެ.