ވިއެޓްނާމް ގައި އުޅަނދެއް ބަންޑުން ޖަހާލާ އެތައް ބަޔަކު މަރުވެއްޖެ

މޫސުން ގޯސްވެ، ވިއެޓްނާމް ގެ ހާ ލޯންގް ބޭ ގައި އުޅަނދެއް ބަންޑުން ޖަހާލާ އެތައް ބަޔަކު މަރުވެއްޖެ އެވެ.

މި ހާދިސަ ގައި މަދުވެގެން 37 މީހުން މަރުވެ، އަދި އެތައް ބަޔަކު ގެއްލިފައިވާ ކަމަށް އޮފިޝަލުން ވަނީ ހާމަ ކޮށްފަ އެވެ.

މި ހާދިސާ ހިނގާފައި ވަނީ އެ ޤައުމުގެ އުތުރު ގައި އޮންނަ، ފަތުރުވެރިން ގިނަ އަދަދަކަށް ޒިޔާރަތް ކުރާ ތަނެއް ކަމުގައިވާ ހާ ލޯންގް ބޭ ގައެވެ.

އުޅަނދުގައި ތިބި ގިނަ މީހުންނަކީ ވެރިރަށް ހަނޯއީން ޗުއްޓީ ހޭދަ ކުރުަމަށް އައިސްފައިވާ ވިއެޓްނާމް ގެ އާއިލާ ތަކެއް ކަމަށް ރިޕޯޓުތައް ބުނެ އެވެ.

ސަލާމަތްވި މީހުން ހޯދުމުގެ މަސައްކަތަށް ވިއްސާރައިގެ ސަބަބުން ދަތިތަކެއް ކުރިމަތި ވަމުންދާ ކަމަށް ސަލާމަތްކުރާ ފަރާތްތަކުން ބުނެއެވެ. ނަމަވެސް މިހާތަނަށް 11 މީހުން ދިރިތިއްބާ މޫދުން ނަގާފައި ވެއެވެ.

ވިއެޓްނާމްގެ ބޯޑަރ ގާޑުންނާއި ނޭވީން ދީފައިވާ ބަޔާނެއްގައި ބުނެފައިވާ ގޮތުގައި، "ވޮންޑަރ ސީސް" ނަމަކަށް ކިޔާ މި އުޅަނދުގައި 53 މީހުން ތިއްބާ، ކުއްލިއަކަށް ދިމާވި ކޮޅި ގަނޑެއް ގައި އުޅަނދު ޖެހުނެވެ.

މިހާތަނަށް ފެނިފައިވާ ހަށިތަކުގެ ތެރޭގައި މަދުވެގެން 8 ކުދިންގެ ހަށިގަނޑު ހިމެނޭ ކަމަށް ރިޕޯޓު ކޮށްފައި ވެއެވެ.

ބޮޑުވަޒީރު ފާމް މިން ޗިން ވަނީ މަރުވެފައިވާ މީހުންގެ އާއިލާތަކަށް ހަމްދަރުދީ ފާޅު ކުރައްވާފަ އެވެ.

މި ހާދިސާ ހިނގި ސަބަބު ތަޙުޤީޤު ކޮށް، "ޤާނޫނާ ޚިލާފުވެފައިވާ ފަރާތްތަކާ މެދު ހަރުކަށި ފިޔަވަޅު އަޅާނެ" ކަމަށް ސަރުކާރުގެ ބަޔާނެއްގައި ބުނެފައިވެއެވެ.

ގުއާންގ ނިން ޕްރޮވިންސް ގައި އޮންނަ ހާ ލޯންގް ބޭ އަކީ ސަތޭކަ އަށްވުރެ ގިނަ ކުދިކުދި ޖަޒީރާތަކެއްގެ މައްޗަށް އެކުލޭވޭ ވަރަށް ހިތްގައިމު ތަނެކެވެ. 2019 ވަނަ އަހަރު މި ސަރަޙައްދަށް 4 މިލިއަން ފަތުރުވެރިން ޒިޔާރަތްކޮށްފައި ވެއެވެ. އަދި މިތަނަކީ ޔުނެސްކޯ އިން ދުނިޔޭގެ ތަރިކައިގެ ތެރޭގައި ހިމަނާފައިވާ ތަނެކެވެ.

ވިއެެޓްނާމް ލޯ މެގަޒިން އިން ބުނާ ގޮތުގައި، ބޯޓު ބަންޑުން ޖަހާލީ އުތުރު ވިއެޓްނާމާއި ޓޮންކިން ކަނޑު ގައި އުފެދިފައިވާ ތޫފާނެއް ގެ ސަބަބުން ވަރަށް ބޮޑަށް ވާރޭ ވެހި، ގުގުރައި، އަދި ވައި ގަދަވެގެން ދިޔަ ދަނޑިވަޅެއް ގައެވެ.

ތޫފާން ވިފާ ކައިރި ވަމުން އަންނާތީ، މި ސަރަޙައްދު ގައި ގުގުރުމާއި އެކު ބޯކޮށް ވާރޭ ވެހޭނެ ކަމަށް ބުނެ މޫސުމާބެހޭ މަރުކަޒުަން ވަނީ އިންޒާރު ދީފައެވެ.

އާދީއްތަ ދުވަހު ދެކުނު ޗައިނާ ކަނޑުގެ ސަރަހައްދަށް އަރާފައިވާ މި ތޫފާނުގެ ބާރު އަދި ވެސް އަންނަނީ ގަދަ ވަމުން ނެވެ.

ވިފާ އާ ގުޅިގެން އައި ގަދަ ވައިގެ ސަބަބުން ހާ ލޮންގް ބޭއިން 175 ކިލޯމީޓަރު (110 މޭލު) ދުރުގައިވާ ވެރި ރަށް ހަނޯއީގައި ގިނަ އަދަދެއްގެ ގަސްތައް ވަނީ ވެއްޓިފަ އެވެ. އަދި އެ ސިޓީގެ މަތިންދާ ބޯޓު ގެ ދަތުރުތަކަށް ވެސް ވަނީ ދަތިތަކެއް ކުރިމަތި ވެފައެވެ.

ނޯއި ބާއި އެއަރޕޯޓުން ބުނާ ގޮތުގައި އެތަނަށް އަންނަން ހަމަޖެހިފައިވާ 9 ފްލައިޓެއް އެހެން އެއަރޕޯޓުތަކަށް ބަދަލުކުރެވުނެވެ. އަދި ހޮނިހިރު ދުވަހު ފުރަން ހަމަޖެހިފައިވާ 3 ފްލައިޓެއް ވަގުތީ ގޮތުން ކެންސަލު ކުރެވުނެވެ.

ހާ ލޮންގް ބޭ އަކީ ވިއެޓްނާމް ގެ އެންމެ މަޤްބޫލު ފަތުރުވެރިކަމުގެ މަންޒިލުތަކުގެ ތެރެއިން އެއް މަންޒިލެވެ.

ވޭތުވެދިޔަ އަހަރު، ތޫފާން ޔާގީ އާ ގުޅިގެން ޖެހުނު ގަދަ ވައިގެ ސަބަބުން އުފެދުނު ބޮޑެތި ރާޅު ތަކުގެ ސަބަބުން ހާ ލޮންގް ބޭ ސަރަހައްދު ގައި 30 އުޅަނދު ވަނީ ފެތިފައެވެ.