ޤައުމީ ވޮލީ ބޯޅަ މުބާރާތުގެ ފައިނަލްގައި ކުލަބު އެޗްޑީސީގެ މައްޗަށް ކުރި ހޯދައި، ދިވެހި ސިފައިންގެ ކުލަބުން ތިން ވަނަ ފަހަރަށް ޤައުމީ މުބާރާތް ކާމިޔާބު ކޮށްފި އެވެ.

ޒުވާނުންގެ މަރުކަޒުގެ އެތެރޭ ކޯޓުގައި ހޯމަ ދުވަހުގެ ކުޅުނު މެޗު ސިފައިންގެ ކުލަބުން ކާމިޔާބު ކުރީ ސީދާ ތިން ސެޓުންނެވެ.

މެޗުގެ ފުރަތަމަ ސެޓު ސިފައިންގެ ކުލަބުން ކާމިޔާބު ކޮށްފައި ވަނީ 25-21 އިންނެވެ. ދެ ވަނަ ސެޓުގައި ސިފައިންގެ ކުލަބުން ވަނީ ރަނގަޅު ކުޅުމެއް ދައްކައި 25-14 އިން ސެޓު ކާމިޔާބު ކޮށްފަ އެވެ. ވާދަވެރި ކުޅުމެއް ފެނުނު ތިން ވަނަ ސެޓު ސިފައިންގެ ކުލަބުން ކާމިޔާބު ކުރީ 26-24 އިންނެވެ.

މިއީ ސިފައިންގެ ކުލަބުން ޤައުމީ މުބާރާތް ކާމިޔާބު ކުރި ތިން ވަނަ ފަހަރެވެ. އެއާއެކު އެ ޓީމުން މި ވަނީ ޤައުމީ މުބާރާތުގެ ތަށި މިލްކު ކޮށްފަ އެވެ. މީގެ ކުރިން 2023 ވަނަ އަހަރާއި، 2024 ވަނަ އަހަރު ވެސް ސިފައިންގެ ކުލަބުން ވަނީ ޤައުމީ މުބާރާތް ކާމިޔާބު ކޮށްފަ އެވެ.

ޤައުމީ މުބާރާތުގެ އިތުރުން ސިފައިންގެ ކުލަބުން ވަނީ މި ފަހަރުގެ ވީއޭއެމް ކަޕް އަދި ޤައުމީ ވޮލީ ބޯޅަ ލީގު ވެސް ކާމިޔާބު ކޮށްފަ އެވެ. މިއީ ސިފައިންގެ ކުލަބުން އަހަރުގެ ތިން ތަށި ކާމިޔާބު ކުރި ދެ ވަނަ ފަހަރެވެ. މީގެ ކުރިން 2010 ވަނަ އަހަރު ވެސް އެ ޓީމުން ތިން ތަށި ކާމިޔާބު ކޮށްފައިވާއިރު، ސިފައިންގެ ކުލަބަކީ ދެ ވަނަ ފަހަރަށް ތިން ތަށި ކާމިޔާބު ކުރި ހަމައެކަނި ޓީމެވެ.

ސިފައިންގެ ކުލަބުގެ އިތުރުން އަހަރުގެ ތިން ތަށި މީގެ ކުރިން ކާމިޔާބު ކޮށްފައި ވަނީ ސްޕޯޓްސް ކުލަބު ސިޓީ އިން، 2022 ވަނަ އަހަރު އެވެ.