ކެރަމް ޤައުމީ މުބާރާތް: ފިރިހެން ސިންގަލްސް ހުޖާން ކާމިޔާބު ކުރިއިރު، އަންހެން ސިންގަލްސް ކާމިޔާބުކޮށް ވިދާދު އަށް ރެކޯޑެއް

ކެރަމް އެސޯސިއޭޝަން އޮފް މޯލްޑިވްސް އިން ކުރިއަށް ގެންދިޔަ، 34 ވަނަ ކެރަމް ޤައުމީ މުބާރާތުގެ ފިރިހެން ސިންގަލްސް އިވެންޓުގެ ޗެމްޕިއަން އިބްރާހީމް ހުޖާން ހޯދިއިރު، އަންހެން ސިންގަލްސް އިވެންޓުގެ ޗެމްޕިއަންކަން އާމިނަތު ވިދާދު ހޯދައިފި އެވެ.

އާދިއްތަ ދުވަހުގެ ރޭ ކުޅުނު އަންހެން ސިންގަލްސް ފައިނަލްގައި ވާދަކޮށްފައި ވަނީ ވިދާދު އާއި އައިޝަތު ނައުފާ އެވެ. މި މެޗު ވިދާދު ކާމިޔާބު ކޮށްފައި ވަނީ ދެ ސެޓު އެއް ސެޓުންނެވެ. މެޗު ދިޔައީ 24-17، 11-21 އަދި 25-08 އިންނެވެ.

އަންހެން ސިންގަލްސް އިވެންޓުގެ ޗެމްޕިއަންކަން ހޯދައި ވިދާދު ވަނީ ޤައުމީ ރެކޯޑެއް ޙާސިލު ކޮށްފަ އެވެ. މިއީ ވިދާދު ޤައުމީ މުބާރާތުގެ ޗެމްޕިއަންކަން ހޯދި ހަތް ވަނަ ފަހަރެވެ.

ފިރިހެން ސިންގަލްސް ފައިނަލްގައި ހުޖާން ވާދަކޮށްފައި ވަނީ އިސްމާއީލް އަޒްމީންއާ އެވެ. އަޒްމީން އަކީ 2022 އަދި 2023 ވަނަ އަހަރުގެ ޤައުމީ މުބާރާތުގެ ޗެމްޕިއަންކަން ހޯދި ކުޅުންތެރިޔާ އެވެ. ފައިނަލްގައި ހުޖާން ވަނީ އަޒްމީންގެ މައްޗަށް ސީދާ ދެ ސެޓުން ކުރި ހޯދައިފަ އެވެ. ފައިނަލް މެޗު ހުޖާން ކާމިޔާބު ކުރީ 25-10 އަދި 25-15 އިންނެވެ. މިއީ ހުޖާން ޤައުމީ މުބާރާތުގެ ޗެމްޕިއަންކަން ހޯދި ފުރަތަމަ ފަހަރެވެ.

ސިންގަލްސް އިވެެންޓުގެ ފައިނަލާ އެކު މިއަހަރުގެ ކެރަމް ޤައުމީ މުބާާރާތް ވަނީ ނިމިފަ އެވެ. މިއަހަރު ވެސް ވަނީ ދެ ވަނަ ޑިވިޝަންގެ އިތުރުން، ފުރަތަމަ ޑިވިޝަން އަށް ޤައުމީ މުބާރާތް ކުރިއަށް ގެންގޮސްފަ އެވެ. މީގެ އިތުރުން މިއަހަރު މުޅިން އަލަށް ވަނީ ޖޫނިއާ އުމުރުފުރާ އަށް ވެސް ޤައުމީ މުބާރާތް ބާއްވައިފަ އެވެ.