ރައްޔިތުން މިއަދު މިތިބި ގޮތަށް ތިބެގެން އަދުލު އިންސާފެއް ނާންނާނެ، މެންބަރުން މިއަދު ތިބި ހާލަތުން ވެސް ރަނގަޅު ގާނޫނެއް ނުހެދޭނެ: މެންބަރު ޒިޔާދު

ރައްޔިތުން މިއަދު މިތިބި ގޮތަށް ތިބެގެން އަދުލު އިންސާފު މިގައުމަށް ނާންނާނެ ކަމަށާއި، ރައްޔިތުން މަޖިލިސް މެންބަރުން މިއަދު ތިބި ހާލަތުން ރަނގަޅު ގާނޫނެއް ވެސް ނުހެދޭނެ ރައްޔިތުން މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވެއްޖެއެވެ.

ބުދަ ދުވަހު ކުރިއަށް ގެންދިޔަ ރައްޔިތުންގެ މަޖިލީހުގައި ރައްޔިތުންގެ ޚިޔާލު ހޯދުމުގެ އާންމު ވޯޓު ނެގުމުގެ ބިލުގެ ބަހުސްގައި ވާހަކަ ދައްކަވަމުން މެންބަރު ޒިޔާދު ވިދާޅުވީ މިއީ ވަރަށް މުހިންމު ބިލެއް ކަމަށާއި، ރާއްޖެއަށް މި ބިލު ބޭނުންތެރި ކަމަށެވެ.

ނަމަވެސް މި ބިލުން ފެންނަނީ ދަންބެރަށް ވުރެ ތަގުޑިއަށް ތަންކޮޅެއް ދިގުވާ ގޮތަށް އޮތް މަންޒަރު ކަމަށް އޭނާ ވިދާޅުވިއެވެ. އަދި ވިދާޅުވީ މި ބިލުގެ ބޭނުމަކީ ރައްޔިތުންނަށް ޚިދުމަތް ނުކޮށް ރައީސް ޑރ. މުހައްމަދު މުއިއްޒު ދެވަނަ ދައުރެއް ހޯއްދެވުން ކަމަށެވެ.

ގައުމުގެ ހާލަތަށް އިޝާރާތް ކުރައްވައި މެންބަރު ޒިޔާދު ވިދާޅުވީ ރައްޔިތުން މަޖިލިސް މެންބަރުން މިއަދު ތިބި ހާލަތުން ރަނގަޅު ގާނޫނެއް ނުހެދޭނެ ކަމަށާއި، ރައްޔިތުން މިއަދު މި ތިބި ގޮތަށް ތިއްބައި އިންސާފެއް މިގައުމަށް ނާންނާނެ ކަމަށެވެ.

މެންބަރު ޒިޔާދު ވިދާޅުވީ ރައްޔިތުންގެ މަޖިލީހުގެ މެންބަރުން ތަޅު އަޅުވާފައިވާ ކަމަށާއި އެެއަށް ފަހު މިފަދަ ބިލެއް މަޝްވަރާކޮށްގެން ރަނގަޅު ގާނޫނެއްގެ ގޮތުގައި ގެނެވޭނެ ކަމަށް ގަބޫލު ނުކުރާ ކަމަށެވެ. ފުރަތަމަ ކަމަކަށް ރައްޔިތުންގެ މަޖިލިސް މިނިވަންވާންޖެހޭ ކަމަށާއި، މިނިވަންކަމާއެކު ބަހުސް ކުރުމުގެ ފުރުސަތު ލިބެންޖެހޭ ކަމަށް މެންބަރު ޒިޔާދު ވިދާޅުވިއެވެ. އަދި ވިދާޅުވީ ދާއިރާތަކުގައި މަސައްކަތް ނުހިނގާ ކަމަށްވާނަމަ އެވާހަކަ ދެއްކެވުމުގެ ފުރުސަތު ލިބެންޖެހޭ ކަމަށާއިި، ހަމައެކަނި ސަރުކާރަށް ސަނާ ކިޔުމުން ނުފުދޭ ކަމަށެވެ.

އަޅުގަނޑު ގަބޫލުކުރާ ގޮތުގައި މިއީ ކޮންމެހެން އޮންނަންޖެހޭ ބިލެއް. އެހެންނަމަވެސް މި ބިލު އެއްކޮށް އަޅުގަނޑުމެން ކިޔާލީމަ މި ފެންނަނީ ދަންބެރަށް ވުރެ ތަގުޑިއަށް ތަންކޮޅެއް ދިގުވާ ގޮތަށް އޮތްވަރު. އެންމެފަހުން ވާހަކަ ދެއްކެވި އިއްޒަތްތެރި މެންބަރު އެވިދާޅުވީ އަސްލު މީގައި ކުރަން މިއުޅޭ ބޭނުން. މީގެ ބޭނުމަކީ ދެވަނަ ދައުރެއް ހޯދުން. ދެވަނަ ދައުރެއް ހޯދަން މި ނޫން ވެސް ގޮތް ގޮތް އެބަހުރި. އެއްގޮތަކީ ރައްޔިތުންނަށް ޚިދުމަތް ކުރުން. އަނެއް ގޮތަކީ ނުކުރެވެންޏާ ދެން އޮތް މަގަކީ މިއީ. މިއީ އޮންނަން ޖެހޭ ބިލެއް. ރައްޔިތުން ގާތުގައި އަހަންޖެހޭ. ރައްޔިތުން އިންތިޚާބު ކޮށްފައި ފޮނުވާ ގޮނޑިއަށްވާ ގޮތް ވެސް ރައްޔިތުންގެ ގާތުގައި އަހާލަންޖެހޭ. ރައްޔިތުންގެ މައްޗަށް ހުކުމް ކުރަންތިބި ފަނޑިޔާރުންނަށްވާ ގޮތް ވެސް ރައްޔިތުން ގާތު އަހާލަންޖެހޭ. މިހުރިހާ ކަމެއް މިހެން ކޮށްފައި އެނެހެން ކުރުކޮށް ބުނަންޏާ ގެރި މަރުވީމަ ދެން އެކަމާ މަޝްވަރާ ކުރަން އަޅުގަނޑުމެން އިށީނުމުގެ ބޭނުމެއް ނެތް. މިހާރު މިއޮތީ ނިމިފައި. ރައްޔިތުންގެ މަޖިލިސް މިއޮތީ ރައީސުލްޖުމްހޫރިއްޔާ އަތުގައި. މިހާލަތުގައި ދެން މަޝްވަރާ ކޮށްގެން ރަނގަޅު ގާނޫނެއް ނުކުންނާނެ ކަމަށް އަޅުގަނޑުމެން ގަބޫލުކުރުމަކީ ރަނގަޅު ނިންމުމެއް ނޫން.

ރައްޔިތުން މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު

ރައްޔިތުންގެ ޚިޔާލު ހޯދުމުގެ އާންމު ވޯޓު ނެގުމުގެ ބިލު ބަލައިގަންނަން ފާސްކުރީ ވޯޓުގައި ބައިވެރިވި 62 މެންބަރުންގެ އިއްތިފާގުންނެވެ. އެ ބިލު އިތުރަށް ދިރާސާކުރުމަށް މިނިވަން މުއައްސަސާތަކާ ބެހޭ ކޮމިޓީއަށް ވަނީ ފޮނުވާފައެވެ.