ހޮނިހިރު ދުވަހު އިސްރާއީލުން ފަލަސްތީނުގެ 64 މީހުން ޝަހީދު ކޮށްލައިފި
މަދުވެގެން 9 މީހުން މަރުވެފައިވަނީ ރަފާހުގެ އުތުރުގައި ހުންނަ ޣައްޒާ ހިއުމެނިޓޭރިއަން ފައުންޑޭޝަން ގެ އެހީ މަރުކަޒާ ކައިައިރީގައި ދިން ހަމަލާއެއް ގައި
ނެޓްޒަރިމް ކޯރިޑޯގައި އިންސާނީ އެހީއަށް އިންތިޒާރު ކުރަމުން ދަނިކޮށް އިސްރާއީލުގެ ވައިގެ ހަމަލާއެއް ފުރާނަ ގެއްލުނު ފަލަސްތީނު މީހުންގެ ގާތްތިމާގެ މީހުން ހިތާމައިގައި - ޖުލައި 3، 2025
ޣައްޒާ ގައި އިސްރާއީލުން ހިންގަމުންދާ އަނިޔާވެރި ހަނގުރާމައިގައި ފަލަސްތީނުގެ 64 މީހުން ޝަހީދު ކޮށްލައިފިއެވެ.
ޣައްޒާގެ ހޮސްޕިޓަލްތަކުގެ މަސްދަރުތަކުން ބުނާ ގޮތުގައި އޭގެ ތެރެއިން މަދުވެގެން 9 މީހުން މަރުވެފައިވަނީ ރަފާހުގެ އުތުރުގައި ހުންނަ ޣައްޒާ ހިއުމެނިޓޭރިއަން ފައުންޑޭޝަން (ޖީއެޗްއެފް) ގެ އެހީ މަރުކަޒާ ކައިައިރީގައެވެ. މީގެ ތެރޭގައި ތިން ކުޑަކުދިން ހިމެނެއެވެ.
ޖީއެޗްއެފް އެހީ ބެހުމުގެ މަރުކަޒުތަކުގައި އިސްރާއީލުގެ ހަމަލާތަކުގައި މިހާތަނަށް މަދުވެގެން 743 ފަލަސްޠީނު މީހުން މަރުވެފައިވެއެވެ. އިސްރާއީލުގެ ބާރުތަކުން ކާބޯތަކެއްޗަށް އިންތިޒާރު ކުރާ ފަލަސްތީނު މީހުންނަށް އަމާޒުކޮށް ހަމަލާ ދިނުނ ކުރިއަށް ގެންދާއިރު، ޒަޚަމްވެފައިވާ މީހުންނަށް ފަރުވާދިނުމުގައި ހޮސްޕިޓަލްތަކަށް ބޭނުންވާ އަސާސީ ސާމާނަށް އިސްރާއީލުން ހުރަސް ތައް ކުރިމަތި ކޮށްފައި ވާތީ ބޮޑެތި ދަތިތަކާ ކުރިމަތިލާން ޖެހެއެވެ.
އަނެއްކޮޅުން އެމެރިކާ އިން މެދުވެރިވެގެން ހުށަހަޅާފައިވާ އެއްބަސްވުމާ ބެހޭ ގޮތުން ހަމާސް އިން ބުނެފައިވަނީ 60 ދުވަހުގެ ހަނގުރާމަ މެދުކަނޑާލުމުގެ ހުށަހެޅުމާ ބެހޭ މަޝްވަރާތައް "ވަގުތުން" ފެށުމަށް ތައްޔާރަށް ތިބިކަމަށެވެ. މިއީ ޣައްޒާއަށް ކޮންމެހެން ބޭނުންވެފައިވާ އެހީ ފޯރުކޮށްދިނުމަށް މަގުފަހިކޮށްދޭނެ ކަމެއް ކަމުގައި ބެލެވެއެވެ.
ހަމާސްގެ އެކުވެރި އިސްލާމިކް ޖިހާދުން ބުނެފައި ވަނީ އިސްރާއީލާއެކު ހަނގުރާމަ ހުއްޓާލުމާ ގުޅޭ މަޝްވަރާތަކުގެ ޕްލޭންތަކަށް ތާއީދު ކުރާ ކަމަށެވެ. ނަމަވެސް އެމީހުން ޝަރުޠު ކޮށްފައި ވަނީ މި މަސައްކަތުން ދާއިމީ ގޮތެއްގައި ހަނގުރާމަ ހުއްޓުމަކަށް ގެނެވޭނެ ކަމުގެ "ޔަޤީންކަން" އޮންނަން ވާނެ ކަމަށެވެ.
ހަނގުރާމަ މެދުކަނޑާލުމާ ބެހޭ ހުށަހެޅުމަށް ފަލަސްޠީނުގެ ޖަމާޢަތްތަކާއެކު އިސްލާމިކް ޖިހާދުން ވަނީ މަޝްވަރާތައް ބާއްވާފައެވެ.
މިހާރު 21 ވަނަ މަހަށް ވަދެފައިވާ މި ހަނގުރާމަ ނިމުމަކަށް ގެނައުމަށް އެމެރިކާގެ ރައީސް ޑޮނަލްޑް ޓްރަމްޕް ހުށަހަޅުއްވާފައިވާ ޕްލޭނަށް އިސްރާއީލުން އެއްބަސްވެފައިވާ ކަމަށް ރިޕޯޓުތައް ބުނެއެވެ.
ޣައްޒާގެ ޞިއްޙީ ވުޒާރާއިން ބުނާ ގޮތުގައި އިސްރާއީލުން ކުރިއަށް ގެންދާ ހަނގުރާމައިގައި ފަލަސްތީނުން މަދުވެގެން 57,338 މީހުން މަރުވެ، 135,957 މީހުން ޒަޚަމްވެފައިވެއެވެ.
