ގޯހެއް ހަދަން ބޭނުންވާ މީހަކަށް ވެރިކަން ލިބިއްޖެނަމަ ހުރިހާ ކޮންޓްރޯލެއް ނެގުމަށް މަސައްކަތް ކުރާނެ: ފައިސަލް
މި ސަރުކާރާއެކު ރާއްޖޭގައި ތިންބާރު ވަކިވެފައިވާ ނިޒާމެއް ނެތް، އެބާރުތަކުގައި މުސްތަގިއްލު ކަމެއް ނެތް
ކުރީގެ ނައިބު ރައީސް ފައިސަލް ނަސީމް
ގޯހެއް ހަދަން ބޭނުންވާ މީހަކަށް ވެރިކަން ލިބިއްޖެނަމަ ހުރިހާ ކޮންޓްރޯލެއް ނެގުމަށް މަސައްކަތް ކުރާނެ ކަމަށާއި، މިހާރު ފެންނަނީ އެ މަންޒަރު ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެއެވެ.
ބުރާސްފަތި ދުވަހުގެ ހެނދުނު އެމްޑީޕީގެ އަހަރީ ދުވަސް ފާހަގަކޮށް، ދިދަ ނަގުމަށް ކުރިއަށް ގެންދިޔަ ޚާއްސަ ހަރަކާތުގައި ރާއްޖެއެމްވީއަށް ފައިސަލް ވިދާޅުވީ މިސަރުކާރާއެކު ރާއްޖޭގައި ތިންބާރު ވަކިވެފައިވާ ނިޒާމެއް ނެތް ކަމަށާއި، އެބާރުތަކުގައި މުސްތަގިއްލު ކަމެއްނެތް ކަމަށެވެ.
ފައިސަލް ވިދާޅުވީ ތިންބާރު ވަކިވެފައިވާ ނިޒާމެއް ރައްޔިތުން ބޭނުންވި ނަމަވެސް ސަރުކާރުން ރައްޔިތުންގެ މަޖިލިސް ވެސް ސަރުކާރުން ކޮންޓްރޯލް ކޮށްފައިވާ ކަމަށެވެ. މިއަދު ރާއްޖޭގެ ރައްޔިތުންގެ މަޖިލީހަކީ ރައްޔިތުންގެ ތަނެއް ނޫން ކަމަށް ފައިސަލް ވިދާޅުވިއެވެ.
ފައިސަލް ވިދާޅުވީ ގޯހެއް ހަދަން ބޭނުންވާ މީހަކަށް ވެރިކަން ލިބިއްޖެނަމަ ހުރިހާ ކޮންޓްރޯލެއް ނެގުމަށް މަސައްކަތް ކުރާނެ ކަމަށާއި، މިހާރު ފެންނަނީ އެ މަންޒަރު ކަމަށެވެ. އަދި ވިދާޅުވީ ރައްޔިތުންގެ މަޖިލިހާއި، މުސްތަގިއްލު ހުރިހާ ކޮމިޝަންތަކެއް ކޮންޓްރޯލް ނަގާނެ ކަމަށެވެ.
ފައިސަލް ވިދާޅުވީ ސަރުކާރު ބޭނުންވުމުން ސުޕްރީމް ކޯޓުގެ ބެންޗަށް ހެދިގޮތް ރައްޔިތުންނަށް ފެނިފައިވާ ކަމަށާއި، މިގައުމުގައި މިނިވަން ޖުޑީޝަރީއެއް ވެސް ނެތް ކަމަށެވެ.
އަޅުގަނޑުމެންނަށް ފެނިގެންދިޔައީ ސުޕްރީމް ކޯޓު މުޅި ޖުޑިޝަރީ. މިއީ އެންމެނާ ގުޅިފައިވާ ކަމެއް. ގައުމެއްގައި ރައްޔިތުންނަށް އެންމެ މުހިންމު ކަމަކަށް މިއޮންނަނީ އިންސާފު އެހެންވީމަ އަޅުގަނޑުމެންނަށް ފެނިގެން މިދިޔައީ ސުޕްރީމް ކޯޓުގެ ބެންޗުގައި ތިއްބެވި ބޭފުޅުންނަށް ވެގެންދިޔަ ގޮތް. އެހެންވީމަ އެބަ އެނގޭ ބޭނުން ކޮންމެ ގަޑިއަކު ބޭނުން ބަޔަކު އެބަ ލެވޭ. އެއީ އެކަންވެގެންވާނެ ގޮތެއް ނޫން. ބެންޗާ ކުޅެވިގެންނުވާނެ. އެފަދަ ފަރާތްތަކަކީ ގިނަގިނައިން ލިބޭނެ ބައެއް ވެސް ނޫން. ގައުމެއްގައި ނުތިބޭނެ ސުޕްރީމްކޯޓަށް އަރާނެ ހާހުން ގުނާލެވޭނެ މީހުންނެއް. މުސްތަގިއްލު ކޮމިޝަންތަކަށް ބަލާފިއްޔާ ރައްޔިތުންގެ މަޖިލީހުން މި ނިންމަނީ. ރައްޔިތުންގެ މަޖިލިސް އޮތީ ބޭނުން ގޮތަކަށް ކަންތައްތައް ކުރެވެން. މިއީ ނޫން ދިވެހި ރައްޔިތުން ބޭނުންވި ގޮތަކީ. މިއީ ޒަމާނާ ގުޅޭ ކަމެއް ނޫން. މުސްތަގިއްލު ކޮމިޝަންތަކާ ބާރުދޫކޮށްލައްވާ. ކޮންކަމަކާ ތޯ ބިރު ގަންނަންވީ. ގޯހެއް ހަދަން ވިސްނާ މީހަކު ނޫނީ ގޯހެއް ހެދޭ މީހަކު ބޭނުންވާނެ ރައްޔިތުންގެ މަޖިލިސް ވެސް ކޮންޓްރޯލް ކުރަން. މުސްތަގިއްލު ކޮމިޝަންތައް ވެސް ކޮންޓްރޯލް ކުރަން. ޖުޑިޝަރީ ކޮންޓްރޯލް ކުރަން. އެހެންނޫން ކަމަށްވަންޏާ ކޮބައިތޯ ބޭނުމަކީ. ދޫކޮށްލަންވީނުންތޯ.ކުރީގެ ނައިބު ރައީސް ފައިސަލް ނަސީމް
ފައިސަލް ވިދާޅުވީ ވެރިކަމަށް ވަޑައިގަންނަވާ ބޭފުޅާ ކަންތައް ކުރައްވަންޖެހޭ ގޮތާއި، ކުރައްވަންޖެހޭ މަސައްކަތް ގާނޫނު އަސާސީގައި ކަނޑައެޅިފައިވާ ކަމަށެވެ. އެހައި ސާފުކޮށް ފެންނަން ހުންނަ ކަންކަމުގައި ގޯހެއް ނުހައްދަވައި ވެރިކަން ހިންގޭނެ ކަމަށް ފައިސަލް ވިދާޅުވިއެވެ.
ނަމަވެސް ނުފޫޒާއި ބާރު ފޯރުވައި، ރައްޔިތުންނަށް ދަތިކުރާނަމަ ނަތިޖާ ރަނގަޅުނުވާނެ ކަމަށާއި، މިނިވަންކަމާއެކު ހުރިހާ މުއައްސަސާއެއް މަސައްކަތް ކުރުމުގެ ފުރުސަތު ދޭންޖެހޭ ކަމަށެވެ. ނަމަވެސް މިހާރު މިދާ މިސްރާބު ރަނގަޅުނޫން ކަމަށާއި، މިހެން ސަރުކާރު ނުފޫޒު ފޯރުވާނަމަ، ގައުމުގައި ހަމަޖެހުމާއި، ސުލްހަ ގާއިމް ނުކުރެވޭނެ ކަމަށް ފައިސަލް ވިދާޅުވިއެވެ.
