އެއްވެސް ނިއުކްލިއަރ ސައިޓަކުން ރޭޑިއޭޝަން ލީކެއް ނުވޭ، ނުރައްކަލެއް ނެތް: އީރާން
ގަލްފް ސަރަހައްދުގެ އެއްވެސް ގައުމަކަށް ރޭޑިއޭޝަންގެ އަސަރެއް ނުކުރާ ކަމަށް ސައުދީ އަރަބިއްޔާ އިން ބުނެފައިވޭ
އީރާނުގެ ފޮރްދޯ ފިއުލް އެންރިޗްމަންޓް ޕްލާންޓް، އީރާން - ހޮނިހިރު ދުވަހު އެމެރިކާ އިން ބޮން އެޅި ނިއުކްލިއަރ ސައިޓު ތަކުގެ ތެރެއިން އެންމެ މުހިންމު ސައިޓް
އެމެރިކާ އިން އީރާނުގެ ނިއުކްލިއަރ ސައިޓްތައް ދިން ބާރުގަދަ ހަމަލާ އަށް ފަހު އެއްވެސް ސައިޓަކުން ރޭޑިއޭޝަން ލީކު ނުވާ ކަމަށް އީރާނުގެ އެޓޮމިކް އެނަރޖީ ބޮޑީން ބުނެފިއެވެ.
އީރާނުގެ އެޓޮމިކް އެނަރޖީ އޯގަނައިޒޭޝަނުން ބުނެފައިވަނީ ރޭޑިއޭޝަން ސިސްޓަމްގެ ޑޭޓާ އަދި ސަރަހައްދުގެ ސަރވޭތަކުން ފޮރްދޯ، އިސްފަހާން އަދި ނަޠަންޒުގެ ސަރަޙައްދުތަކުގެ ކައިރީގައި ދިރިއުޅޭ މީހުންނަށް ރޭޑިއޭޝަންގެ އެއްވެސް ތަޣައްޔަރުވުމުގެ ނުވަތަ ނުރައްކަލެއް ހުރިކަމުގެ ނިޝާނެއް ނުދައްކާ ކަމަށް އެ އިދާރާއިން ސޯޝަލް މީޑިއާގައި ކުރި ޕޯސްޓެއްގައި ބުނެފައިވެއެވެ.
"މި ސައިޓުތަކުގެ ވަށައިގެން ދިރިއުޅޭ މީހުންނަށް އެއްވެސް ނުރައްކަލެއް ނެތެވެ." ބަޔާނުގައި ވެއެވެ.
އޭގެ އިތުރުން ސައުދީ އަރަބިއްޔާގެ ނިއުކްލިއަރ އެންޑް ރޭޑިއޮލޮޖިކަލް ރެގިއުލޭޓަރީ ކޮމިޝަނުން ވެސް ބުނެފައިވަނީ އީރާނުގެ ނިއުކްލިއަރ ފެސިލިޓީ ތަކަށް އެމެރިކާ އިން ދިން ހަމަލާ އާ ގުޅިގެން ރޭޑިއޭޝަންގެ އެއްވެސް އަސަރެއް ސައުދީ އަރަބިއްޔާ އިން އަދި އަވައްޓެރި ގަލްފުގެ ގައުމަކުން ވެސް ރެކޯޑް ކުރެވިފައި ނުވާ ކަމަށެވެ.
