މިހާރު ކުރިއަށްދާ ފީފާ ކުލަބު ވޯލްޑް ކަޕްގެ ގުރޫޕް އީގައި އުރަވާ ރެޑް ޑައިމަންޑްސްއާ ދެކޮޅަށް ކުޅުނު މެޗުން މޮޅުވެ، އިންޓަރ މިލާނުން މުބާރާތުގެ ފުރަތަމަ މޮޅު ހޯދައިފި އެވެ.

މުބާރާތުގައި އިންޓަރ މިލާނުން ކުޅުނު ފުރަތަމަ މެޗުގައި އެ ޓީމުން ވަނީ މޮންޓަރޭއާ ވާދަކޮށް، އެއްވަރުވެފަ އެވެ. ރެޑް ޑައިމަންޑްސްގެ ފުރަތަމަ މެޗުގައި އެ ޓީމު ވަނީ ރިވާ ޕްލޭޓް އަތުން ބަލިވެފަ އެވެ.

ހޮނިހިރު ދުވަހުގެ ރޭ އިންޓަރ މިލާން އާއި ރެޑް ޑައިމަންޑްސް ބައްދަލު ކުރި މެޗު އިންޓަރ މިލާން އިން ކާމިޔާބު ކުރީ 2-1 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ރެޑް ޑައިމަންޑްސް އެވެ. މެޗުގެ ދެ ވަނަ ހާފުގައި އިންޓަރ މިލާން އިން ވަނީ ދެ ލަނޑު ޖަހައިގެން ކުރި ހޯދައިފަ އެވެ.

މެޗު ފަށައިގެން 11 ވަނަ މިނެޓުގައި ރެޑް ޑައިމަންޑްސް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ރިއޯމާ ވަޓަނަބޭ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ޓަކޫރޯ ކަނެކޯ އެވެ.

އޭގެ ފަހުން މެޗުގެ ދެ ވަނަ ހާފުގައި، 78 ވަނަ މިނެޓުގައި އިންޓަރ މިލާނުން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. ނިކޮލޯ ބަރެއްލާ ތަނަވަސްކޮށްދިން ފުރުސަތެއްގައި އެ ޓީމަށް އެ ލަނޑު ޖަަހައިިދިނީ ލައުޓާރޯ މާޓިނޭޒް އެވެ.

މެޗުގައި ދެ ވަނަ ލަނޑެއް ޖަހަން އިންޓަރ މިލާނުން ކުރި މަސައްކަތް އެ ޓީމަށް ކާމިޔާބު ކުރެވުނީ މެޗުގެ ފުރިހަމަ ވަގުތު ހަމަވެ، އިތުރަށް ދެއްކި ވަގުތުގަ އެވެ. އެ ލަނޑު އެ ޓީމަށް ޖަހައިދިނީ ވެލެންޓިން ކާބޮނީ އެވެ. މެޗުގައި އޭނާ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގަ އެވެ.

މޮޅާއެކު އިންޓަރ މިލާން ދެ ވަނައިގައި އޮތީ މިހާތަނަށް ކުޅެފައިވާ ދެ މެޗުން ހަތަރު ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން އެއް ވަނައިގައި ރިވާ ޕްލޭޓަށް ވެސް ލިބެނީ ހަތަރު ޕޮއިންޓެވެ. މުބާރާތުގައި އިންޓަރ މިލާން ދެން ނިކުންނާނީ ރިވާ ޕްލޭޓާ ދެކޮޅަށެވެ.