ފެޒްގ ބޮޑު އީދު ފުޓްސަލް މުބާރާތް ކާމިޔާބު ކުރީ ކެމަލް އިން
21 ޖޫން 2025 | ހޮނިހިރު 07:16މުޅި ރަށަށް ހުޅުވާލައިގެން ފެޒްގ އިން ކުރިއަށް ގެންދިޔަ މި މުބާރާތުގައި ވަނީ ޖުމުލަ ނުވަ ޓީމަކުން ވާދަކޮށްފަ އެވެ.
ފެޒްގ ބޮޑު އީދު ފުޓްސަލް މުބާރާތުގެ ޗެމްޕިއަންކަން ހޯދި ކެމަލް ޓީމު
ފީއަލީ އެކުވެރި ޒުވާނުންގެ ގުޅުން (ފެޒްގ) އިން މިއަހަރުގެ އަޟްޙާ އީދާ ގުޅިގެން ބޭއްވި ފުޓްސަލް މުބާރާތުގެ ޗެމްޕިއަންކަން ކެމަލް ޓީމުން ހޯދައިފި އެވެ.
މުޅި ރަށަށް ހުޅުވާލައިގެން ފެޒްގ އިން ކުރިއަށް ގެންދިޔަ މި މުބާރާތުގައި ވަނީ ޖުމުލަ ނުވަ ޓީމަކުން ވާދަކޮށްފަ އެވެ. އެއީ ސައުދީ އެފްސީ، ފީއަލިއަންސް، ނައިޓް ކިންގްސް، ފަރުކަން ޖޫނިއަރ، މާސީ، ފަރުކަން ސްޕޯޓްސް ކުލަބު، އަލް ޙަދީދު، ކެމަލް އަދި ޑީޓެން އެކްސްޕްރެސް އެވެ.
މުބާރާތުގެ ފައިނަލްގައި ވާދަކޮށްފައި ވަނީ ކެމަލް އަދި ފަރުކަން ސްޕޯޓްސް ކުލަބެވެ. ފައިނަލް މެޗުގައި ކެމަލް އިން ވަނީ 2-0 އިން ފަރުކަން ސްޕޯޓްސް ކުލަބުގެ މައްޗަށް ކުރި ހޯދައިފަ އެވެ. ފައިނަލްގެ ކުރިން މުބާރާތުގެ ގުރޫޕް ސްޓޭޖުގައި މި ދެ ޓީމު ބައްދަލު ކުރި މެޗު ވެސް ކާމިޔާބު ކުރީ ކެމަލް އިންނެވެ.
މުބާރާތުގެ އެންމެ މޮޅު ފަސް ކުޅުންތެރިންގެ ތެރޭގައި ހިމެނުނީ ކެމަލްގެ ޙަސަން އަރުޝަމް ފައިސަލްގެ އިތުރުން، އެ ޓީމުގެ އިސްމާއީލް އަލީ، އަޙުމަދު އަޝްފާގު އަދި ފަރުކަން ސްޕޯޓްސް ކުލަބުގެ ސާއިދު ޢަބްދުލް ޙަމީދު އަދި ސައުދީ އެފްސީގެ ޒިޔާން ޙުސެއިން އެވެ.
މުބާރާތުގެ އެންމެ ގިނަ ލަނޑު ޖެހި ކުޅުންތެރިޔަކަށް ހޮވުނީ ފަރުކަންގެ ސާއިދު އެވެ. މީގެ އިތުރުން މުބާރާތުގެ އެންމެ މޮޅު ޒުވާން ކުޅުންތެރިޔަކަށް ހޮވުނީ އެ ޓީމުގެ ރާއިޝް އަޙުމަދު އެވެ.
މުބާރާތުގެ އެންމެ މޮޅު ކުޅުންތެރިޔަކަށް ކެމަލްގެ އަރުޝަމް ފައިސަލް ހޮވުނުއިރު، މުބާރާތުގެ އެންމެ މޮޅު ކޯޗަކީ އެ ޓީމުގެ އަންފާޒު ޢަބްދުﷲ އެވެ.
މިއީ ފެޒްގ އިން މުޅި ފީއައްޔަށް ހުޅުވާލައިގެން ފުޓްސަލް މުބާރާތެއް ބޭއްވި ފުރަތަމަ ފަހަރެވެ. މީގެ ކުރިން ފިޠުރު އީދާ ދިމާކޮށް، ފީއަލީ ޑިވެލޮޕްމަންޓް ސޮސައިޓީ (އެފްޑީއެސް) އިން ބޭއްވި ފުޓުބޯޅަ މުބާރާތުގެ ފައިނަލްގައި ވެސް ވާދަކުރީ ކެމަލް އަދި ފަރުކަން ސްޕޯޓްސް ކުލަބެވެ. އެ މުބާރާތުގައި ކެމަލް ބަލިކޮށް ޗެމްޕިއަންކަން ހޯދީ ފަރުކަން އެވެ.
