ހުކުރު ދުވަހު އީރާނުން އިސްރާއީލަށް ދިން ހަމަލާ އެއްގައި ގިނަ އަދަދެއްގެ މީހުން ޒަޚަމްވެއްޖެ

އީރާނުން ހުކުރު ދުވަހު އިސްރާއީލަށް ދިން އެންމެ ފަހުގެ ހަމަލާތަކާ ގުޅިގެން އިސްރާއީލުގެ އުތުރުގައި ގިނަ އަދަދެއްގެ މީހުން ޒަޚަމް ވެފައިވާ ކަމަށް އިސްރާއީލުގެ ކުއްލި ނުރައްކަލުގެ ޚިދުމަތްތަކާ ހަވާލާދީ ބީބީސީ އިން ބުނެފިއެވެ.

ބީބީސީ އިން ބުނެފައިވަނީ، 40 އަހަރުގެ ފިރިހެނަކާއި، 16 އަހަރުގެ ކުއްޖަކާއި، އަދި 54 އަހަރުގެ ފިރިހެނެއް ހިމެނޭ ގޮތަށް ތިން މީހުންގެ ހާލަތު ވަނީ ނުރައްކާތެރި ދަރަޖައިގައެވެ.

އެމްޑީއޭ އިން އިތުރަށް ބުނެފައިވާ ގޮތުގައި، އިތުރު 20 މީހުންގެ ހާލަތު ވަނީ "މެދުމިނުގައި" ކަމަށާއި، އެ މީހުންނަށް ވަނީ ގޮވުމުގެ ސަބަބުން ހަށިގަނޑަށް ބައެއް ބައިތައް ވަދެ ޒަޚަމްތައް ލިބިފައެވެ.

އިތުރަށް ބުނެފައިވާ ގޮތުގައި، ބޮން ޝެލްޓަރ އެއްގައި ހުރި 51 އަހަރުގެ އަންހެނަކު ވަނީ ހާޓް އެޓޭކެއް ޖެހިގެން މަރުވެފައެވެ.

"އޮޕަރޭޝަން ޓްރޫ ޕްރޮމިސް III" ގެ އައު ބުރެއްގައި، ހުކުރު ދުވަހު އީރާނުގެ ހަތިޔާރުއެޅި ބާރުތަކުން ފަށާފައިވާ ކަމަށް އީރާނުގެ މީޑިއާ ރިޕޯޓުތައް ބުނެފައިވެއެވެ. އެ ހަމަލާ އަމާޒު ކޮށްފައިވަނީ އިސްރާއީލުން ހިފާފައިވާ ބިންތަކުގެ ދެކުނާއި އުތުރުގައި ހުރި އަސްކަރީ އަމާޒުތަކަށް ކަމަށާއި "މިސައިލްތަކާއި ޑްރޯންތަކުގެ ވާރޭ ވެއްސާފައި" ވާ ކަމަށް ބުނެފައި ވެއެވެ.

މި އޮޕަރޭޝަންގެ ތަރުޖަމާނު ދެއްވި ބަޔާނެއްގައި ވިދާޅުވެފައިވާ ގޮތުގައި، މި އޮޕަރޭޝަންގެ 17 ވަނަ ފިޔަވަހީގައި އީރާނުގެ ހަތިޔާރުއެޅި ބާރުތަކުން ވަނީ އިސްރާއީލުގެ އަސްކަރީ ތަންތަނާއި، ސިނާޢީ ކޮމާންޑް އަދި ކޮންޓްރޯލް މަރުކަޒުތަކާއި، އަދި ޖާސޫސީ މަރުކަޒުތަކަށް މިސައިލްތަކާއި ޑްރޯންތައް ދޫކޮށްފައެވެ.

މި ބަޔާނުގައި އިތުރަށް ފާހަގަކޮށްފައިވާ ގޮތުގައި، މި ބަދަލުހިފުމުގެ އޮޕަރޭޝަންގެ މި ފިޔަވަހީގައި ދުރު ރާސްތާގެ ބޮޑެތި މިސައިލްތަކާއި، ހަނގުރާމަވެރި އަދި ފިދާއީ ޑްރޯންތައް ބޭނުންކޮށްފައިވެއެވެ.

ތަރުޖަމާނު ވިދާޅުވެފައިވަނީ ދުނިޔެ "އީރާނުގެ ހައިރާން ކުރުވަނިވި ކަންތައްތަކަށް އިންތިޒާރުކުރަން ޖެހޭނެ" ކަމަށާއި، އީރާނުގެ ރައްޔިތުންގެ އެހީތެރި ކަމާއެކު ކުރެވޭ މި މުޤައްދަސް ދިފާޢު ނިމިގެން ދާނީ ކާމިޔާބީއާއެކު ކަމަށެވެ.

އީރާނު ހަމަލާތަކުގެ ގެއްލުންތައް އިސްރާއީލު ސަރުކާރުން ސެންސަރު ކުރަމުން ގެންދިޔަ ނަމަވެސް މިސައިލްތަކުގެ ވާރޭ ވެހެމުންދާ ވަގުތު، އިސްރާއީލުގެ ގިނަ ފަށަލަތަކުގެ ދިފާޢީ ނިޒާމުތައް ފަހަނައަޅައި ގޮސް އަމާޒުތަކަށް ޖެހެމުންދާ މަންޒަރުތައް ސޯޝަލް މީޑިއާ ގައި ދަނީ އާންމު ވަމުންނެވެ.

ހުކުރު ދުވަހުގެ ހަމަލާ ތަކުގައި ފުރަތަމަ ފަހަރަށް ބޭނުންކުރެވުނު ބައެއް މިސައިލްތައް ވެސް ހިމެނު ކަމަށް އީރާނުގެ ޕްރެސް ޓީވީ އިން ބުނެފައިވެއެވެ.

އީރާނުގެ އަސްކަރިއްޔާ އިން ކުރިން ދީފައިވާ އިންޒާރަކާ ގުޅިގެން ތަން ހުސް ކޮށްފައި ވަނިކޮށް، ހުކުރު ދުވަހު ވަނީ ޒަޔަނިސްޓު ޕްރޮޕެގަންޑާ އައުޓްލެޓް ކަމުގައިވާ ޗެނަލް 14 ގެ މައި އޮފީހަށްވެސް ކާމިޔާބުކަމާއެކު ހަމަލާ ދެވިފައި ކަމަށް އީރާނުގެ މީޑިއާ އިން ބުނެފައިވެއެވެ.