ހަމަލާތައް ހުއްޓާނުލާހާ ހިނދަކު އެމެރިކާ އާ އެކު އީރާނުން ކުރާނެ މަޝްވަރާ އެއް ނޯންނާނެ: ޚާރިޖީ ވަޒީރު

އިސްރާއީލުން އީރާނަށް ދެމުންދާ ހަމަލާތައް ހުއްޓާ ނުލާހާ ހިނދަކު އެމެރިކާ އާ އެކު އެއްވެސް މަޝްވަރާ އެއް ކުރިއަށް ނުގެންދާނެ ކަމަށް ހުކުރު ދުވަހު ދައުލަތުގެ ޓީވީއަށް ދެއްވި އިންޓަވިއު އެއް ގައި އީރާނުގެ ޚާރިޖީ ވަޒީރު އައްބާސް އަރަޤްޗީ ވިދާޅުވެއްޖެއެވެ.

"އެމެރިކާ އިން ވަނީ ތަކުރާރުކޮށް މަޝްވަރާ ތަކަށް ގޮވާލާ މެސެޖުތައް ފޮނުވާފައެވެ. ނަމަވެސް އަޅުގަނޑުމެން ވަނީ ސާފުކޮށް ބުނެފައި، އުދުވާނީ ޢަމަލުތައް ހުއްޓާނުލާހާ ހިނދަކު، ޑިޕްލޮމަސީ އާއި ޑައިލޮގް އަށް ޖާގަ އެއް ނޯންނާނެ ކަމަށް،" އަރަޤްޗީ ވިދާޅުވިއެވެ.

ޔޫރަޕްގެ އެންމެ އިސް ޑިޕްލޮމެޓުންނާ ހުކުރު ދުވަހު ޖެނީވާގައި އަރަޤްޗީއާ ބައްދަލު ކުރައްވާ، އީރާނުގެ ނިއުކްލިއަރ ޕްރޮގްރާމާ ގުޅޭގޮތުން މަޝްވަރާ ކުރުމަށް ހަމަޖެހިފައި ވެއެވެ.

"އަޅުގަނޑަށް ވަނީ އެތައް ފޯނު ކޯލެއް ލިބިފައި، ޒަޔަނިސްޓް ވެރިކަމުން ޖެނީވާ އަށް ދަތުރު ކުރައްވާއިރު އަރަޤްޗީ އަށް އަމާޒުކޮށް ހަމަލާއެއް ނުދޭނެ ކަމުގެ ޔަޤީންކަން ވަނީ ދީފައި،" އަރަޤްޗީ ގެ މުޝީރު މުޙައްމަދު ރިޒާ ރަންޖްބަރާން އެކްސްގައި ވިދާޅުވެފައިވެއެވެ.

ފްރާންސް، ޖަރުމަނު، އިނގިރޭސި ވިލާތް އަދި ޔޫރަޕިއަން ޔޫނިއަންގެ ޚާރިޖީ ވަޒީރުން ވަނީ ހަމަލާތައް މައިތިރި ކުރުމަށް ގޮވާލައްވާފައެވެ. އިނގިރޭސި ޚާރިޖީ ވަޒީރު ޑޭވިޑް ލެމީ ވިދާޅުވެފައި ވަނީ ކުރިއަށް އޮތް ދެ ހަފްތާ އަކީ "ޑިޕްލޮމެޓިކް ހައްލެއް ހޯދުމަށް... ލިބިފައިވާ ފުރުސަތެއް" ކަމަށެވެ.

ހުކުރު ދުވަހު ޔޫރަޕްގެ ޚާރިޖީ ވަޒީރުން، އެމެރިކާ އިން ސީދާ މަޝްވަރާ ތަކަށް އީރާނާ އެކު ދާން ބޭނުން ވާ ކަމަށް އީރާނުގެ ޚާރިޖީ ވަޒީރަށް ދަންނަވާނެ ކަމަށް ރޮއިޓާރސް އިން ބުނެފައިވެއެވެ.

އެޓަމިކް ހަތިޔާރެއް އުފެއްދުމުގެ ފުރުޞަތު ހުއްޓުވުމަށްޓަކައި، އީރާނުގެ ނިއުކްލިއަރ ޕްރޮގްރާމަށް ހަރުކަށި މިންގަނޑުތަކެއް ކަނޑައެޅުމަށް ތެހެރާނުން އެއްބަސް ވާ ކަމުގެ "ސާފު މެސެޖެއް" އީރާނުން ދޭންޖެހޭ ކަމަށް އަރަޤްޗީ އަށް ދަންނަވާނެ ކަމަށް ރޮއިޓަރސް އަށް ޔޫރަޕްގެ ދެ ޑިޕްލޮމެޓުން ވިދާޅުވެފައިވެއެވެ.

އެމެރިކާގެ ޚާރިޖީ ވަޒީރު މާކޯ ރޫބިއޯ ވަނީ މިކަމާ ބެހޭ ގޮތުން ޖެނީވާ ބައްދަލުވުމުގެ ކުރިން ޔޫރަޕް އިން މި ބައްދަލުވުމުގައި ބައިވެރިވެ ވަޑައިގެންނަވާ ވަޒީރުންނާ މަޝްވަރާ ކުރައްވާފައި ކަމަށް ވެސް ރޮއިޓާރސް އިން ބުނެފައިވެއެވެ.

ނަމަވެސް، ތެހެރާނުން ތަކުރާރުކޮށް ބުނެފައި ވަނީ އިސްރާއީލުގެ ހަމަލާތައް ހުއްޓާލުމުން ނޫނީ ޓްރަމްޕް ސަރުކާރާއެކު ވާހަކަ ނުދައްކާނެ ކަމަށެވެ.

އަރަޤްޗީ އާ އެކު ބޭއްވުމަށް ރޭވިފައިވާ ސީދާ ބައްދަލުވުމުގެ ކުރިން އިނގިރޭސިވިލާތް، ފްރާންސް، ޖަރުމަނުގެ ވަޒީރުން، ގެ އިތުރުން ޔޫރަޕިއަން ޔޫނިއަން ގެ ބޭރު ސިޔާސަތާ ބެހޭ އިސްވެރިޔާ، ވަކިން ބައްދަލު ކުރައްވާނެއެވެ.

މީގެ އިތުރުން، އދ. ގެ ސެކިއުރިޓީ ކައުންސިލް ވެސް ހުކުރު ދުވަހު މި ހަނގުރާމައާ ގުޅޭގޮތުން ދެވަނަ ބައްދަލުވުމެއް ބޭއްވުމަށް ވަނީ ހަމަޖެހިފައެވެ. މި ބައްދަލުވުން ބޭއްވުމަށް އެދިފައިވަނީ އީރާނުންނެވެ. އަދި މިކަމަށް ރަޝިޔާ، ޗައިނާ އަދި ޕާކިސްތާނުގެ ތާއީދު ލިބިފައިވާކަމަށް ބުދަ ދުވަހު އޭ.އެފް.ޕީއަށް ޑިޕްލޮމެޓެއް މަޢުލޫމާތު ދީފައިވެއެވެ.