"އިސްރާއީލާ ގުޅުން ކަނޑާލާ": ޕާކިސްތާނުން އީރާނަށް އެހީތެރިކަން ފޯރުކޮށްދޭނެ ކަމުގެ ޔަޤީންކަން ދީފި

މިހާރު ހިނގަމުންދާ ހަމަލާތަކާ ގުޅިގެން، ޕާކިސްތާނުން އީރާނަށް ފުރިހަމަ އެހީތެރިކަން ފޯރުކޮށްދޭނެ ކަމަށް ބުނެ، "އިސްރާއީލާ ދެކޮޅަށް މުސްލިމުން އެއްބައިވުމަށް" ޕާކިސްތާނުން ގޮވާލައިފިއެވެ.

"އަހަރެމެން އީރާނާއެކު ތިބޭނަން އަދި އެމީހުންގެ މަސްލަހަތު ހިމާޔަތް ކުރުމަށް ބައިނަލްއަޤްވާމީ މައިދާނުގައި އެމީހުންނަށް އެހީތެރިވާނަން،" ޕާކިސްތާނުގެ ދިފާޢީ ވަޒީރު ޚަވާޖާ އާސިފް ޤާނޫނު ހަދާ މަޖިލީހުގައި ދެއްކެވި ވާހަކަފުޅުގައި ވިދާޅުވިއެވެ.

"އިސްރާއީލުން ވަނީ އީރާނާއި، ޔަމަނާއި، ފަލަސްތީނަށް ހަމަލާ ދީފައި. މުސްލިމު ޤައުމުތަކުން މިހާރު އެއްބައިވެ ނުތިބެފިނަމަ، ކޮންމެ ޤައުމަކަށް ވެސް ދިމާވާނީ އެއްގޮތެކެވެ."

"ވަގުތުން އިސްރާއީލާއެކު އޮތް ގުޅުން ކަނޑާލުމަށް" އޭނާ މުސްލިމު ޤައުމުތަކަށް ގޮވާލެއްވިއެވެ. އަދި އިސްލާމިކް ކޯޕަރޭޝަން ޖަމްޢިއްޔާ އަށް ގޮވާލެއްވީ އަވަސް ބައްދަލުވުމެއް ބާއްވައި، އެކުގައި ސްޓްރެޓެޖީއެއް އެކުލަވާލުމަށެވެ.

އާސިފް ވިދާޅުވީ ޕާކިސްތާނާއި އީރާނާ ދެމެދު ގާތް ގުޅުމެއް އޮންނަ ކަމަށާއި އިސްލާމާބާދުން "މި އުނދަގޫ ވަގުތުގައި ތެހެރާނާއެކު ތިބޭނެ" ކަމަށެވެ.

އަދި ހަމައެއާއެކު، ޕާކިސްތާނުގެ ބޮޑުވަޒީރުގެ ނައިބު އަދި ޚާރިޖީ ވަޒީރު އިސްހާޤް ދާރު ވިދާޅުވީ އިސްރާއީލުން އީރާނަށް ދިން ހަމަލާއަކީ "އީރާނުގެ މިނިވަންކަމަށް ދިން ހަޑިހުތުރު ނުރައްކާތެރި" ހަމަލާ އެއް ކަމަށެވެ.

ޕާކިސްތާނާއި އީރާނާ ދެމެދު 750 ކިލޯމީޓަރު (466 މޭލު) ދިގު ސަރަހައްދީ ބޯޑަރެއް ހިއްސާ ކުރެއެވެ. މިއީ ޕާކިސްތާނުގެ ދެކުނު ހުޅަނގާއި އީރާނުގެ ދެކުނު އިރުމަތީގައި އޮންނަ ބޯޑަރެކެވެ.