އީރާނުން ބުރާސްފަތި ދުވަހާއި ހުކުރު ވިލޭރޭ އިސްރާއީލަށް ދިން ހަމަލާ ތަކުގައި އެތައް ބަޔަކު ޒަޚަމްވެ އިމާރާތްތަކަށް ބޮޑެތި ގެއްލުން ތަކެއް ވެއްޖެއެވެ.

އިސްރާއީލުގެ ކުއްލި ނުރައްކަލުގެ ޚިދުމަތްތަކުން ބުނާ ގޮތުގައި ހުކުރު ދުވަހުގެ ފަތިހަށް ދެމިގެންދިޔަ ހަމަލާތަކުގައި 7 މީހުން ޒަޚަމްވެ ހޮސްޕިޓަލަށް ގެންދެވިފައިވެއެވެ.

ސޮރޯކާ މެޑިކަލް ސެންޓަރުގެ ޚަބަރު ފަތުރާ ފަރާތުން ބުނެފައިވަނީ މި 7 މީހުން ފަރުވާ ދިނުމަށްޓަކައި އެތަނަށް ގެންގޮސްފައިވާ ކަމަށެވެ.

"ޒަޚަމްތައް [ލިބިފައިވަނީ] ހަމަލާ އިން ސަލާމަތްވާން ރައްކާތެރި ސަރަޙައްދުތަކަށް ވަންނަން ދުވަމުން ދިއުމުގެ ތެރޭގައި ކަމަށް ބުނެފައިވެއެވެ.

އިސްރާއީލުގެ ދެކުނުގައިވާ ބިއަރޝީބާ ސިޓީއަށް ބުރާސްފަތި ދުވަހު އާއި ހުކުރު ވިލޭރޭވެސް ހަމަލާ ދީފައިވެއެވެ.

އިސްރާއީލުގެ ސިއްޙަތާބެހޭ މިނިސްޓްރީން ބުނާ ގޮތުގައި ބުރާސްފަތި ދުވަހުގެ ހަމަލާގައި މަދުވެގެން 71 މީހުން ޒަޚަމްވިއެވެ.

އިސްލާމިކް ރެވޮލިއުޝަން ގާޑްސް ކޯޕްސް (އައިއާރްޖީސީ) އިން ނެރުނު ބަޔާނެއްގައި ބުނެފައިވަނީ ޒަޔަނިސްޓް ވެރިކަމާ ދެކޮޅަށް ދޭ ބަދަލުހިފުމުގެ އޮޕަރޭޝަންގެ ފަނަރަ ވަނަ މަރުހަލާގައި މިސައިލްތަކާއި ޑްރޯންތައް ހިމެނޭ ކަމަށެވެ.

މި މަރުހަލާގެ އަމާޒަކީ، ތެލް އަވީވް އަދި ހައިފާގައި ހުރި އަސްކަރީ އަދި ޞިނާޢީ ވަސީލަތްތައް ކަމަށް މި ބަޔާނުގައި ބަޔާން ކޮށްފައި ވެއެވެ.

އީރާނުގެ އައިއާރްޖީސީގެ ބަޔާނުގައި އިތުރަށް ބުނެފައިވަނީ ބުރާސްފަތި ދުވަހުގެ ކުރީކޮޅު ހިންގި ޑްރޯން އޮޕަރޭޝަންގައި ސަތޭކަ އަށް ވުރެ ގިނަ ހަނގުރާމަވެރި އަދި ފިދާއީ ޑްރޯން ބޭނުން ކޮށްގެން އިސްރާއީލުގެ ސިފައިންގެ އަމާޒުތަކަށް، ޚާއްޞަކޮށް ތެލް އަވީވް އަދި ހައިފާގައި ހުރި މިސައިލް އިންޓަރސެޕްޓަރު ތަކަށް ހަމަލާދީފައިވާ ކަމަށެވެ.

އިސްރާއީލުގެ އަސްކަރީ އަދި ޞިނާޢީ އަމާޒުތަކަށް ވަރުުގަދަ މިސައިލް އޮޕަރޭޝަންތައް ހިންގުމަކީ އިރާނުގެ ހަތިޔާރުއެޅި ބާރުތަކުގެ އެޖެންޑާގައި ހިމެނޭ ކަމެއް ކަމަށް އެ ބަޔާނުގައި އިތުރުކޮށްފައިވެއެވެ.

މީގެ ކުރިން، ބައެއް އިސްރާއީލު މީޑިއާތަކުން ރިޕޯޓު ކޮށްފައި ވަނީ އޮޕަރޭޝަން ޓްރޫ ޕްރޮމިސް 3 ގެ އެންމެ ފަހުގެ އަދި ފަނަރަ ވަނަ މަރުހަލާގައި "ބޮޑު މިސައިލް ހަމަލާ" ދީފައިވާ ކަމަށެވެ.

މި އޮޕަރޭޝަން ފެށިފައިވަނީ މިދިޔަ ހުކުރު ދުވަހު، ޒަޔަނިސްޓް ވެރިކަމުން އިސްލާމީ ޖުމްހޫރިއްޔާ އިރާނަށް ކުއްލިއަކަށް އަނިޔާވެރި ހަމަލާއެއް ދިންތާ ގަޑިއިރުތަކެއް ފަހުންނެވެ.

އިސްރާއީލުގެ ވެރިކަމުން އިރާނުގެ ބަދަލުހިފުމުގެ އޮޕަރޭޝަންތަކާ ގުޅޭ ފޮޓޯތަކާއި ވީޑިއޯތައް ޝާއިޢު ކުރުން ވަނީ މަނާ ކޮށްފައެވެ. އަދި ޓީވީ ލައިވް ފީޑްތައް ވެސް އިސްރާއީލުން މަނާ ކޮށްފައި ވެއެވެ.

ވޭތުވެދިޔަ ދުވަސްތަކުގައި، އިރާނުގެ ހަތިޔާރުއެޅި ބާރުތަކުން، އެމެރިކާގެ އެހީތެރިކަމާއެކު އިސްރާއީލުން ބޭނުންކުރާ މިސައިލް އިންޓަރސެޕްޓަރުތަކުން ސަލާމަތްވުމަށް އެކި އައު އުކުޅުތައް ބޭނުންކޮށްގެން ވަރަށް ބޮޑު ކާމިޔާބީއެއް ހޯދާފައިވެއެވެ.

އޮޕަރޭޝަން ޓްރޫ ޕްރޮމިސް 3 ގައި އިރާނުގެ ހަތިޔާރުއެޅި ބާރުތަކުން ބޭނުންކޮށްފައިވާ އައު ޖީލުގެ މިސައިލްތަކުގެ ތެރޭގައި ޚައިބަރ-ޝެކަން، ފައްތާޙް އަދި ސެޖިލް ހިމެނެއެވެ.

ބުދަ ދުވަހު ނެރުނު ވީޑިއޯ ބަޔާނެއްގައި، އިސްލާމީ އިންޤިލާބުގެ ލީޑަރު އާާޔަތުއްﷲ ސައްޔިދު ޢަލީ ޚާމަނާއީ ވިދާޅުވެފައިވަނީ އިރާނުން "އެއްވެސް ބާވަތެއްގެ މަޖުބޫރު ކުރުވުމަކަށް" ބޯލެނބުމެއް ނޯންނާނެ ކަމަށެވެ.

އިރާނުން ބުނެފައިވަނީ އިސްރާއީލުގެ ހަމަލާތަކުގައި މަދުވެގެން 78 މީހުން، އޭގެ ތެރޭގައި އަންހެނުންނާއި ކުޑަކުދިން ހިމެނޭ ގޮތަށް، މަރާލާފައިވާ ކަމަށާއި، 320 އަށްވުރެ ގިނަ މީހުންނަށް ޒަޚަމްވެފައިވާ ކަމަށެވެ. އިސްރާއީލުގެ ސިފައިން ހުއްޓުމެއް ނެތި އީރާނުގެ ޝަހަރު ތަކަށާއި، ސިފައިންގެ ތަންތަނަށާއި، ނިއުކްލިއަރ ފެސިލިޓީތަކަށް ހަމަލާދެމުން ގެންދާ ކަމަށް އިރާނުން ބުނެފައިވެއެވެ.

އިރާނުގެ އެންމެ މަތީ ލީޑަރު އާޔަތުއްﷲ ޢަލީ ޚާމެނެއީ އިސްރާއީލަށް އިންޒާރު ދެއްވާފައި ވަނީ އިރާނަށް ހަމަލާދީ، އެތައް މަތީ ފަންތީގެ ސިފައިންގެ ކޮމާންޑަރުންނަކާއި 6 ނިއުކްލިއަރ ސައިންޓިސްޓުން މަރާލުމުގެ "ކުށަށް "ގަދަފަދަ އަދަބެއް" ލިބޭނެ ކަމަށް ބަލަން ޖެހޭނެ ކަމަށެވެ.

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވެފައިވަނީ އިސްރާއީލުގެ އަސްކަރީ އޮޕަރޭޝަން ބޭނުންވާ މުއްދަތަކަށް ކުރިއަށް ގެންދާނެ ކަމަށެވެ.

ހަނގުރާމައިގެ ތެރެއަށް އެމެރިކާ ވެއްދުމަށް އިސްރާއީލުން ކުރަމުން ދާ މަސައްކަތުގައި އެމެރިކާއިން އަދި މަސައްކަތް ކުރަމުން ދަނީ ހަނގުރާމައިގައި ބައިވެރިވުމާ ދުރުހެލިވުމަށެވެ.

އެހެން ނަމަވެސް އިރާނަށް އިންޒާރުދީފައިވަނީ އެ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާ ނުދިނުމަށެވެ.