އީރާނުގެ ސަރުކާރުގެ ޓެލެވިޜަނުން ރިޕޯޓުކުރި ގޮތުގައި އީރާނުގެ އަސްކަރިއްޔާ އިން ޑްރޯން އަދި މިސައިލް ހަމަލާއެއްގެ އައު ރާޅެއް އިސްރާއީލަށް ހޯމަ ދުވަހުގެ ރޭ ފޮނުވާލައިފިއެވެ.

މި ހަމަލާ އަމާޒު ކޮށްފައި ވަނީ ތެލް އަވީވް އަދި ހައިފާއަށެވެ.

ހަމަލާގެ ކުރިން އީރާނުގެ ބާރުތަކުން އިސްރާއީލުގެ ތެލް އަވީވްގެ ރައްޔިތުންނަށް އެ ސަރަޙައްދު ދޫކޮށް ދިއުމަށް އިންޒާރު ދީފައިވެއެވެ.

އިސްރާއީލަށް ހޯމަ ދުވަހުގެ ރޭ ވަރުގަދަ ސައިބަރ އެޓޭކެއް ވެސް ވަނީ ދީފައެވެ. އިސްރާއީލުގެ މީޑިއާ އިން ރިޕޯޓު ކުރި ގޮތުގައި އެ ހަމަލާ އަމާޒުވީ މޯބައިލް ނެޓްވޯކަށެވެ. މި ހަމަލާ ކުރިމަތި ވުމާއެކު ޓީވީ ބްރޯޑްކާސްޓިންގ އަށް އަސަރު ކުރި މަންޒަރު ވަގުތުން ފޮނުވަމުން ގެންދިޔަ ޓީވީ ޕްރޮގްރާމް ތަކުން ފާހަގަ ވިއެވެ.

މިދިޔަ ހުކުރު ދުވަހު އިސްރާއީލުން އީރާނަށް ހަމަލާ ދޭން ފެށި ފަހުން އީރާނާއި އިސްރާއީލާ ދެމެދު މިއީ ހަމަލާތައް ބަދަލު ކުރެވޭ ހަތަރު ވަނަ ރެއެވެ. އަދި މިއީ އީރާނުން އިސްރާއީލަށް ހަމަލާދޭ ނުވަ ވަނަ ބުރެވެ.

އިސްލާމިކް ރެވޮލިއުޝަން ގާޑްސް ކޯޕްސް (އައިއާރްޖީސީ) އިން، ހިންގަމުންދާ އޮޕަރޭޝަން ޓްރޫ ޕްރޮމމިސް 3 ގެ އައު މަރުހަލާއެއްގައި، ހޯމަ ދުވަހުގެ ރޭގެ ފަހު ވަގުތެއްގައި އިސްރާއީލުގެ ސަރަހައްދު ތަކަށް ބެލިސްޓިކް މިސައިލްތަކާއި ޑްރޯންތަކުގެ ބޮޑު ހަމަލާއެއް ދީފައިވާ ކަމަށް އީރާނުގެ ރަސްމީ މީޑިއާ އިން ބުނެފައިވެއެވެ.

ހުކުރު ދުވަހުގެ ރޭ ފެށުނު މި ބޮޑު ބަދަލުހިފުމުގެ އޮޕަރޭޝަން ކުރިއަށް ގެންދަނީ "ޔާ އަލީ އިބްނު އަބީ ތާލިބް" މި ކޯޑް ނަމުގެ ދަށުންނެވެ.

އިސްރާއީލުގެ މީޑިއާތަކުން ރިޕޯޓުކުރި ގޮތުގައި، އީރާނުން ބަދަލުހިފުމުގެ އޮޕަރޭޝަންގެ 9 ވަނަ މަރުހަލާ ފެށުމާއެކު، އިސްރާއީލުން އިސްތިއުމާރު ކޮށްފައިވާ ސަރަހައްދުތަކުގެ އުތުރާއި، މެދުތެރެ އާއި، ދެކުނުގެ ސަރަހައްދުތަކުގައި ސައިރަންތަކުގެ އަޑުފައްގަނޑު އިވެމުން ދިޔައެވެ.

މިއީ އިސްރާއީލުގެ ސަރުކާރުން އީރާނުގެ އުތުރުގައި ހުރި އިސްލާމިކް ރިޕަބްލިކް އޮފް އީރާން ބްރޯޑްކާސްޓިންގ (އައިއާރްއައިބީ) ގެ އިމާރާތަކަށް ހޯމަ ދުވަހުގެ ރޭ ހަމަލާ ދިންތާ ގަޑިއިރުތަކެއްގެ ތެރޭގައި ދޭން ފެށި ހަމަލާތަކެކެވެ.

އީރާނުގެ މީޑިއާ ރިޕޯޓުތައް ބުނާ ގޮތުގައި، އޮޕަރޭޝަން ޓްރޫ ޕްރޮމިސް 3 ގެ މި މަރުހަލާ ވާނީ ކުރީގެ 8 މަރުހަލާ އަށްވުރެ ދިގު ދެމިގެންދާ އަދި ގަދަފަދަ ހަމަލާތަކަކަށެވެ.

އީރާނުގެ ހަމަލާތައް ފެށުނީ ހުކުރު ދުވަހުގެ ރޭ، އިސްރާއީލުގެ ސިފައިން އިސްވެ އީރާނަށް ދިން އަނިޔާވެރި ހަމަލާއަކާ ގުޅިގެންނެވެ.

އެ ހަމަލާގައި އީރާނުގެ އިސް އަސްކަރީ ވެރިންނާއި، ނިއުކްލިއަރ ސައިންޓިސްޓުންނާއި، އަންހެނުންނާއި ކުޑަކުދިން ހިމެނޭ ގޮތަށް އާންމު ރައްޔިތުން މަރުވެފައިވެއެވެ.

އޮޕަރޭޝަންގެ ކުރީގެ 8 މަރުހަލާގައި އިސްރާއީލަށް ބޮޑެތި ގެއްލުންތަކެއް ލިބުމަށްފަހު، އިސްރާއީލުގެ ސަރުކާރުން އީރާނުގެ ހަމަލާތައް ލައިވްކޮށް ދެއްކުން މަނާކޮށްފައިވާ ކަމަށް ރިޕޯޓުތަކުގައި ބުނެފައިވެއެވެ.

އިސްރާއީލުގެ ބަލިކަށިވެފައިވާ ސިފައިންނަށް އިތުރު ލަދުވެތިކަމެއް ކުރިމަތިވިޔަ ނުދިނުމަށްޓަކައި، އީރާނުގެ ބަދަލުހިފުމާ ގުޅޭ އެއްވެސް ފޮޓޯ އެއް ނުވަތަ ވީޑިއޯ އެއް ހިއްސާ ކުރުން ނުވަތަ ޝާއިޢު ކުރުން ވަނީ މަނާ ކޮށްފައެވެ.

ނަމަވެސް، ސޯޝަލް މީޑިއާ މެދުވެރިކޮށް ލީކް ވެފައިވާ ބައެއް ފޮޓޯ ތަކުން ދައްކާ ގޮތުގައި، މިސައިލް ތަކާއި ޑްރޯން ތައް އިސްރާއީލުގެ ސަރަހައްދު ތަކަށް ވެއްޓެމުން ދާއިރު، ބިރުން ހާސްވެފައިވާ އިސްރާއީލުގެ ރައްޔިތުން ބިމުއަޑީގެ ހިޔާތަކުގައި ފޮރުވިގެން ތިބޭ މަންޒަރު ފެނެއެވެ.

ބައެއް ރިޕޯޓުތަކުގައި ބުނެފައިވާ ގޮތުގައި، އިސްރާއީލުގެ ސަރަހައްދުތަކުގެ ޓްރެފިކް ކެމެރާތައް ވަނީ ނިއްވާލާފައެވެ.

އޮޕަރޭޝަން ޓްރޫ ޕްރޮމިސް 3 ގެ މި މަރުހަލާގައި، ސޯޝަލް މީޑިއާގައި ފުޅާ ދާއިރާއެއްގައި ޝާއިޢު ކުރެވުނު މަންޒަރުތަކުން ފެންނަ ގޮތުގައި، އީރާނުގެ މިސައިލްތައް ތެލް އަވީވް އަށް ވާސިލު ވުމުގެ ކުރިން، އިސްރާއީލުގެ އިންޓަރސެޕްޓަރ މިސައިލެއް މަސައްކަތް ނުކޮށް ވެއްޓިގެން ދިޔައެވެ.

މި މަރުހަލާ ފެށުމަށްފަހު ދިން ބަޔާނެއްގައި، އައިއާރްޖީސީގެ ތަރުޖަމާނު ބުނެފައިވަނީ، މި އޮޕަރޭޝަން ފަތިހާ ޖެހެންދެން މެދު ނުކެނޑި މިސައިލްތަކާއި ޑްރޯން ބޭނުން ކޮށްގެން ކުރިއަށް ދާނެ ކަމަށެވެ.

އޭނާ ބުނީ، ޓްރޫ ޕްރޮމިސް 3 ގެ މި މަރުހަލާ އަކީ މިސައިލް ތަކާއި ޑްރޯންތައް ހިމެނޭ ހައިބްރިޑް އޮޕަރޭޝަނެއް ކަމަށެވެ.

މީގެ އިތުރުން، ތަރުޖަމާނު މަޢުލޫމާތު ދިން ގޮތުގައި، ވޭތުވެދިޔަ 72 ގަޑިއިރުގެ ތެރޭގައި، އައިއާރްޖީސީގެ އެއަރޯސްޕޭސް ޑިވިޜަނުން މެދު ނުކެނޑި އިސްރާއީލުގެ ސަރުކާރަށް ނިސްބަތްވާ 545 ތަނަކަށް ހަމަލާދިނުމަށް ޑްރޯންތަކުން އަމާޒުކޮށްފައިވާ ކަމަށާއި، މި އޮޕަރޭޝަން އަދިވެސް ކުރިއަށްދާނެ ކަމަށެވެ.

އިސްރާއީލުން އީރާނަށް ދިން ހަމަލާތަކުގައި މަރުވި މީހުންގެ އަދަދު 220 އަށް ވުރެ އިތުރުވެފައިވާ ކަމަށް ބުނެވެއެވެ. މީގެ ތެރޭގައި 70 އަންހެނުންނާއި ކުޑަކުދިން ހިމެނެއެވެ.

އީރާނުން އިސްރާއީލަށް ދިން ހަމަލާތަކުގައި 20 އަށް ވުރެ ގިނަ މީހުން މަރުވެފައިވާ ކަމަށް ރިޕޯޓްތައް ބުނެއެވެ.