އީރާނުން 48 ގަޑިއިރުގެ ތެރޭގައި އިސްރާއީލުގެ 44 ޑްރޯން ބޯޑަރު ސަރަޙައްދުތަކުން ވައްޓާލައިފި

އީރާނުގެ ބޯޑަރު ޕޮލިސްގެ ކޮމާންޑަރު ވިދާޅުވެފައިވަނީ، ވޭތުވެދިޔަ 48 ގަޑިއިރުގެ ތެރޭގައި އީރާނުގެ ބާރުތަކުން އިސްރާއީލުގެ 44 ޑްރޯން އަދި ކުއަޑްކޮޕްޓަރު ބޯޑަރު ސަރަޙައްދުތަކުން ވައްޓާލާފައިވާ ކަމަށެވެ.

ބްރިގޭޑިއަރ ޖެނެރަލް އަޙްމަދު-ޢަލީ ގޫދަރްޒީ އާދީއްތަ ދުވަހު ނެރުއްވި ބަޔާނެއްގައި ވިދާޅުވެފައިވަނީ، ޕައިލެޓުންނާ ނުލައި އުދުހޭ އުޅަނދުތައް ބޯޑަރު ސަރަޙައްދު ތަކުން އީރާނުގެ އެއަރ ސްޕޭސް އަށް ވަނުމަށް މަސައްކަތް ކޮށްފައިވާ ކަމަށާއި، ނަމަވެސް "ވިސްނުންތެރި އަދި ހިތްވަރުގަދަ ބޯޑަރު ގާޑުންގެ" ފަރާތުން އެ އުޅަނދުތައް ދެނެގަނެ، ނައްތާލެވިފައިވާ ކަމަށެވެ.

އޭނާ ވަނީ، އީރާނުގެ ބާރުތައް ޤައުމުގެ ބޯޑަރުތައް ކޮންޓްރޯލްކޮށް، ރައްކާތެރިކުރުމަށް ފުރިހަމައަށް ތައްޔާރަށް ތިބިކަމަށާއި، "ޓެރަރިސްޓް ގްރޫޕްތަކުން، ހަތިޔާރު ހިފައިގެން އުޅޭ ގޭންގުތަކުން، ނުވަތަ ދުޝްމަނުންގެ" ފަރާތުން އެއްވެސް ފާޅުވުމެއް އަތުވެއްޖެނަމަ، އެކަމަކަށް އަވަހަށް އަދި ބާރުގަދަ ޖަވާބެއް ދެވޭނެ ކަމަށް އިންޒާރު ދެއްވާފައެވެ.

އިސްރާއީލުން އީރާނާ ދެކޮޅަށް އަނިޔާވެރި ޢަމަލު ހިންގަން ފެށީ ހުކުރު ދުވަހުގެ ފަތިހުގެ ވަގުތުތަކުގައި، ވެރިރަށް ތެހެރާން އ އަދި އެހެނިހެން ބޮޑެތި ސިޓީތަކުގައި ހުރި މަދަނީ އަދި އަސްކަރީ ތަންތަނަށް ހަމަލާދީގެންނެވެ.

ހުކުރު ދުވަހުގެ ރޭ، އިސްލާމިކް ރެވޮލިއުޝަން ގާޑް ކޯޕްސް (އައި.އާރް.ޖީ.ސީ) އިން އިސްރާއީލް އާ ދެކޮޅަށް އޭގެ ބަދަލު ހިފުމުގެ އޮޕަރޭޝަން، "ޓްރޫ ޕްރޮމިސް III" ފެށިއެވެ. މިގޮތުން، ފަލަސްޠީނުގެ އޮކިއުޕައިޑް ސަރަޙައްދުތަކާ ދިމާއަށް ގިނަ އަދަދެއްގެ މިސސައިލްތައް ފޮނުވާލާފައިވެއެވެ.

މިހާތަނަށް މި ހަމަލާތައް އަމާޒުކޮށްފައިވަނީ އިސްރާއީލުގެ މުހިންމު އަސްކަރީ އަދި ސިނާޢީ ތަންތަނަށެވެ. މީގެ ތެރޭގައި ހިމެނެނީ ހައިފާގައި ހުރި ތެޔޮ ރިފައިނަރީތަކާއި ކަރަންޓު ގްރިޑްތަކެވެ. ހޮނިހިރު ދުވަހުގެ ރޭ މި ތަންތަނުގައި އަލިފާނުގެ ހާދިސާތަކެއް ހިނގިކަމަށް ރިޕޯޓު ކުރެވިފައިވެއެވެ.