ޖޫނިއަރ ކެރަމް ޤައުމީ މުބާރާތް އިއުލާން ކޮށްފި

ކެރަމް އެސޯސިއޭޝަން އޮފް މޯލްޑިވްސް އިން އިންތިޒާމު ކޮށްގެން ބާއްވާ، ޖޫނިއަރ ޤައުމީ ކެރަމް މުބާރާތް އިއުލާން ކޮށްފި އެވެ.

މިއީ ކެރަމް އެސޯސިއޭޝަން އިން ޖޫނިއަރ ކެރަމް ޤައުމީ މުބާރާތެއް ބާއްވާ ފުރަތަމަ ފަހަރެވެ. މި މުބާރާތް މިހާރު އިއުލާން ކޮށްފައިވާއިރު، މުބާރާތުގައި ބައިވެރިވުމުގެ ފުރުސަތު ވެސް ވަނީ ހުޅުވާލައިފަ އެވެ. މުބާރާތް ކުރިއަށް ގެންދިޔުމަށް ތާވަލު ކޮށްފައި ވަނީ ޖޫން މަހުގެ 26 ވަނަ ދުވަހުން ފެށިގެންނެވެ.

ކެރަމް އެސޯސިއޭޝަން އިން އިއުލާން ކޮށްފައިވާ ގޮތުގައި މުބާރާތް ކުރިއަށް ގެންދާނީ ދެ އުމުރުފުރާ އަކަށެވެ. އެއީ 15 އަހަރުން ދަށުގެ އިތުރުން، 19 އަހަރުން ދަށުގެ އުމުރުފުރާ އެވެ. މީގެ އިތުރުން އުމުރުފުރާ ތަކުގަައި ބައިވެރި ވެވޭނީ 2025 ޖަނަވަރީ 01 ވަނަ ދުވަހަށް، އެ އުމުރުފުރާއެއްގައި އުމުރު ހަމަނުވާ ކުދިންނަށް ކަމަށް ވެސް އެ އެސޯސިއޭޝަނުން ބުނެފައިވެ އެވެ.

މުބާރާތުގައި ސިންގަލްސް އިވެންޓުގެ އިތުރުން، ޑަބަލަސް އިވެންޓުގެ ކުޅުން ވެސް ކުރިއަށް ދާނެ އެވެ. މި މުބާރާތުގައި ބައިވެރިވުމުގެ އެންމެ ފަހު ސުން ގަޑި އަކީ، ޖޫން މަހުގެ 22 ވަނަ ދުވަހުގެ ރޭ 22:00ގެ ކުރިންނެވެ. އަދި މުބާރާތުގެ ގުރު ނެގުން އޮންނާނީ ޖޫން މަހުގެ 24 ވަނަ ދުވަހުގެ ރޭ 22:00 ގައެވެ.

މި މުބާރާތުގެ މެޗުތައް ކުރިއަށް ގެންދިޔުމަށް ނިންމާފައި ވަނީ ހުޅުމާލޭ ސްޕޯޓްސް ކޮމްޕްލެކްސްގަ އެވެ.