އިސްރާއީލުން އިރާނަށް ދިން އުދުވާނީ ހަމަލާތަކާ އެކު ހުކުރު ދުވަހު އީރާނުގެ ޤޮމް ސިޓީ ގައި ހުންނަ ޖަމްކަރާން މިސްކިތުގެ މަތީގައި ބަދަލުހިފުމުގެ ރަތް ދިދަ ނަގައިފައެވެ.

މިއީ އިސްރާއީލުން ދިން ވައިގެ ހަމަލާތަކަށް ބަދަލު ހިފުމުގެ ތައްޔާރީތައް ފެށުމުގެ ނިޝާނެއް ކަމަށް މީޑިއާ ރިޕޯޓުތައް ބުނެއެވެ.

އެކްސް ގައި ޝާއިޢުކުރި ވީޑިއޯއެއްގައި ދިދަ ނެގި މަންޒަރު ވަނީ ހާމަ ކޮށްފައެވެ. އީރާނުގެ އާދަކާދައިގެ ތެރޭގައި ރަތް ދިދައަކީ އިންސާފު ހޯދުމަށާއި ބަދަލުހިފުމަށް ގޮވާލުމުގެ ރަމްޒެކެވެ.

ތަސްނީމް ނިއުސް އޭޖެންސީން ބުނާ ގޮތުގައި، ދިދަ ނެގި ވަގުތު އާންމުން މިސްކިތް ދޮށަށް އެއްވެ، އިސްރާއީލާ ދެކޮޅަށް އަޑުގަދަކޮށް، އިސްރާއީލަށް "ހަރުކަށި އަދަބު" ދިނުމަށް ގޮވާލިއެވެ. ރުޅި އައިސްފައި ތިބި މީހުން ތިބީ އީރާނުގެ ޤައުމީ ދިދަ ހިފައިގެންނެވެ.

އީރާނުގެ ޚާރިޖީ ވަޒީރު ވަނީ އިސްރާއީލުގެ ހަމަލާތަކަކީ "ހަނގުރާމަ އިޢުލާނު ކުރުން" ކަމަށް ވިދާޅުވެ އދ އަށް ސިޓީއެއް ފޮނުއްވާފައި ކަމަށް އޭއެފްޕީ ނިއުސް އެޖެންސީން ރިޕޯޓުކޮށްފައިވެއެވެ.

އަދި އެ ސިޓީގައި އައްބާސް އަރާޤްޗީ ވަނީ އދ ގެ ސަލާމަތީ މަޖިލީހަށް "މި މައްސަލައާ މެދު ވަގުތުން ވަގުތަށް އަޅަން ޖެހޭ ފިޔަވަޅުތައް އެޅުމަށް" ގޮވާލައްވާފައި ކަމަށްވެސް ބުނެފައިވެއެވެ.

އީރާނުގެ އެންމެ މަތީ ލީޑަރު އާޔަތު ﷲ ޢަލީ ޚާމަނާއީ ވިދާޅުވެފައިވަނީ އީރާނުގެ ބާރުތަކުން "އިސްރާއީލަށް އަދަބު ނުދީ ދޫކޮށްނުލާނެ" ކަމަށެވެ.