ޣައްޒާ އަށް އެހީ ހިފައިގެން ދިޔަ ބޯޓުގައި ހިމެނޭ ކްލައިމެޓް އެކްޓިވިސްޓް ގްރެޓާ ތުންބަރގް އިސްރާއީލުން ޑީޕޯޓް ކޮށްފި ކަމަށް އިސްރާއީލުގެ ފޮރިން މިނިސްޓްރީ އާއި އޭނާ ތަމްސީލުކުރާ ހައްގުތަކާ ބެހޭ ޖަމާޢަތަކުން އަންގާރަ ދުވަހު ބުނެފިއެވެ.

އިސްރާއީލުގެ ކަނޑުގެ ބާރުތަކުން މެޑްލީން އެހީގެ އުޅަނދު ބައިނަލްއަޤްވާމީ ކަނޑުގައި ގާނޫނާ ޚިލާފަށް ހިފަހައްޓައި، އެ އުޅަނދު ޣައްޒާ އިން ގާތްގަނޑަކަށް 185 ކިލޯމީޓަރު (100 ނޯޓިކަލް މޭލު) ދުރުގައި އޮއްވައި އަތުލައި، އޭގައި ތިބި 12 އެކްޓިވިސްޓުން ހައްޔަރުކުރިއެވެ.

ޣައްޒާ އަށް އިންސާނީ އެހީ ގެންދިއުމަށް މަސައްކަތް ކުރަމުން ދިޔަ 12 މީހުން އުފުލި ޔޮޓް އިސްރާއީލުގެ ބާރުތަކުން ހިފެހެއްޓުމަށްފަހު، ހޯމަ ދުވަހު އިސްރާއީލުގެ ބަނދަރު ސިޓީ އަޝްދޯދަށް ކަފުޖަހައިގެން ގެންގޮސްފައިވެއެވެ.

އިސްރާއީލުން މި އުޅަނދު "ސެލްފީ ޔޮޓެއް" ގެ ގޮތުގައި ސިފަކޮށް، އޭގައި ތިބި ފަސިންޖަރުން އެމީހުންގެ އަމިއްލަ ޤައުމުތަކަށް އަނބުރާ ފޮނުވާލުމަށް ނިންމާފައިވާ ކަމަށް އިސްރާއީލުން ބުނެފައިވެއެވެ.

އެކްސް ގައި ކުރި ޕޯސްޓެއްގައި، އިސްރާއީލުގެ ފޮރިން މިނިސްޓްރީން ތުންބަރގް މަތިންދާބޯޓެއްގައި އިން ފޮޓޯއެއް ހިއްސާކޮށްފައިވެއެވެ. "ގްރެޓާ ތުންބަރގް އިސްރާއީލުން ފްރާންސް އަށް ފުރާ ފްލައިޓެއްގައި ފުރައިގެންދަނީއެވެ،" އެ ޕޯސްޓްގައި ބުނެފައިވެއެވެ.

އިސްރާއީލުން އަންގާރަ ދުވަހު ބުނެފައިވަނީ، ޣައްޒާ އަށް ދަތުރުކުރަމުން ދިޔަ އެހީގެ އުޅަނދެއްގައި ހައްޔަރު ކުރެވުނު އެކްޓިވިސްޓުންގެ ގްރޫޕެއް ޓެލް އަވީވް އެއަރޕޯޓަށް ގެންގޮސް އަނބުރާ ފޮނުވާލުމަށް ތައްޔާރުވަމުންދާ ކަމަށެވެ.

އިސްރާއީލުގައި ތުންބަރގް އާއި އެހެން އެކްޓިވިސްޓުން ތަމްސީލުކުރާ ޤާނޫނީ ޙައްޤުތަކުގެ ޖަމާޢަތެއް ކަމަށްވާ އަދާލާ އިން ބުނެފައިވަނީ ތުންބަރގް އާއި އިތުރު ދެ އެކްޓިވިސްޓުންނާއި ނޫސްވެރިއަކު އިސްރާއީލުން ޑީޕޯޓު ކުރުމަށް އެއްބަސްވެ، އިސްރާއީލު ދޫކޮށް ދިޔުމަށް ނިންމާފައިވާ ކަމަށެވެ.

އެހެން އެކްޓިވިސްޓުން ވަނީ ޑީޕޯޓް ކުރުމަށް އިންކާރު ކުރުމާ ގުޅިގެން، ބަންދު ކޮށްފައި ކަމަށާއި އެމީހުންގެ މައްސަލަ އިސްރާއީލުގެ އިދާރާތަކުން ބެލުމަށް ހަމަޖެހިފައިވާ ކަމަށެވެ.

"އަނބުރާ ފޮނުވާލުމުގެ ލިޔެކިޔުންތަކުގައި ސޮއިކުރުމަށް އިންކާރުކޮށް އިސްރާއީލުން ފުރައިގެން ދިއުމަށް ދެކޮޅުހަދާ ފަރާތްތައް ޝަރުޢީ އިދާރާއަކަށް ހާޒިރުކުރެވޭނެ" ކަމަށް އިސްރާއީލުގެ ފޮރިން މިނިސްޓްރީން އެކްސް (ޓްވިޓަރ) ގައި ބުނެފައިވެއެވެ.

އެކްޓިވިސްޓުން ބުނެފައިވަނީ އެމީހުން އިހުތިޖާޖު ކުރަމުން ދަނީ ދެމިގެންދާ ހަނގުރާމަ އާއި ޣައްޒާގައި ކުރިމަތިވެފައިވާ އިންސާނީ ހާލަތާ ދެކޮޅަށް ކަމަށެވެ.

މެޑްލީން އުޅަނދުގައި ހުރި އެހީގެ ތެރޭގައި ހަނޑުލާއި ކުޑަކުދިންގެ ކާނާ ހިމެނޭ ކަމަށް ދަތުރު އިންތިޒާމު ކުރި ފަރާތުން ބުނެފައިވެއެވެ.

ބްރެޒިލް، ފްރާންސް، ޖަރުމަނު، ނެދަލެންޑްސް، ސްޕެއިން، ސުވީޑަން އަދި ތުރުކީގެ ރައްޔިތުން މި އުޅަނދުގައި ތިބި އިރު، އޭގެ ތެރޭގައި ޔޫރަޕިއަން ޕާލިމެންޓުގެ ފްރާންސްގެ މެންބަރު ރިމާ ހަސަން، އަދި އަލްޖަޒީރާގެ ފްރާންސްގެ ނޫސްވެރިޔާ އުމަރު ފައިޔާދު ހިމެނެއެވެ.

މި އުޅަނދު ޖޫން 1 ވަނަ ދުވަހު ޣައްޒާ އަށް ދިއުމަށް ފުރީ އިޓަލީގެ ބަނދަރަކުންނެވެ.