އެއްވެސް މިންވަރަކަށް ޔޫރޭނިއަމް މުއްސަނދި ކުރުމުގެ ފުރުސަތެއް އީރާނަށް ނުލިބޭނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

އެމެރިކާގެ ރައީސް ޑޮނަލްޑް ޓްރަމްޕް ވަނީ ހޯމަ ދުވަހު، އީރާނާއި އެމެރިކާއާ ދެމެދު ވެވޭ އެއްވެސް ނިއުކްލިއަރ އެއްބަސްވުމެއްގެ ދަށުން އީރާނަށް ޔުރޭނިއަމް މުއްސަނދިކުރުމުގެ ހުއްދަ ދިނުމަށް ދެކޮޅު ހައްދަވާފައެވެ. މިއާއެކު، ތެހެރާނުން ވަނީ ކަރަންޓު އުފެއްދުމަށް ބޭނުންވާ ހަކަތަ ހޯދުމަށް ހިންގާ "ސުލްޙަވެރި" ނިއުކްލިއަރ މަސައްކަތް ދިފާޢުކޮށްފައެވެ.

އޭޕްރިލް މަހުން ފެށިގެން އީރާނާއި އެމެރިކާ އާ ދެމެދު ބޭއްވުނު ފަސް ބުރުގެ މަޝްވަރާތަކުގައި، ޔޫރޭނިއަމް މުއްސަނދި ކުރުމުގެ މައްސަލަ ވެފައިވަނީ ދެ ފަރާތުގެ ދެމެދުގައި އެންމެ ބޮޑަށް ޚިޔާލު ތަފާތުވެފައިވާ އަދި އެއްބަސްވުމަކަށް އައުމުގައި ހައްލު ކުރަން އެންމެ އުނދަގޫ މައްސަލައިގެ ގޮތުގައެވެ.

"ކުރިއަށް އޮތް އެއްބަސްވުމުގެ ދަށުން - ޔުރޭނިއަމް އެންރިޗްކުރުމުގެ އެއްވެސް ހުއްދައެއް އަޅުގަނޑުމެން ނުދޭނަން!" ޓްރަމްޕް އޭނާގެ ޓްރުތް ސޯޝަލް ނެޓްވަރކްގައި ވިދާޅުވިއެވެ. ޓްރަމްޕް މިހެން ވިދާޅުވީ ވޮޝިންގްޓަނުން ހުށަހަޅާފައިވާ ހުށަހެޅުމުގައި ތެހެރާނަށް ކޮންމެވެސް ވަރަކަށް ނިއުކްލިއަރ ފިއުލް އެންރިޗްކުރުމުގެ ހުއްދަ ދީފައިވާކަމަށް އެކްސިއޯސް ނިއުސް އައުޓްލެޓުން ހާމަ ކުރުމާއެކުގައެވެ.

މި ޕޯސްޓުގައި ޓްރަމްޕް ވަނީ އޭނާގެ ކުރިން ހުންނެވި ރައީސް ބައިޑްން އަށް ވެސް މި މައްސަލައިގައި ވަރަށް ބޮޑަށް ފާޑު ވިދާޅުވެފައެވެ. އޭނާ ވިދާޅުވީ އީރާނުން ކުރިއަށް ގެންދާ ޔޫރޭނިއަމް މުއްސަނދި ކުރުމުގެ މަސައްކަތް މާ ކުރިން ބައިޑްންގެ ސަރުކާރުން އޮންނަން ވާނީ ހުއްޓުވާފައި ކަމުގައެވެ.

އެކްސިއޯސްގެ ޚަބަރުގައި ބުނަނީ ވޮޝިންގްޓަނުން ހޮނިހިރު ދުވަހު ތެހެރާނަށް ފޮނުވާފައިވާ އެންމެ ފަހުގެ ހުށަހެޅުމުގައި، އީރާނުގެ ބިމުގައި މަދު މިންވަރަކަށް ވަކި މުއްދަތަކަށް ޔުރޭނިއަމް އެންރިޗްކުރުމުގެ ހުއްދަ ދީފައިވާ ކަމުގައެވެ. އެހެން ނަމަވެސް އެހީ ކިހާ މުއްދަތަކަށް ދޭ ހުއްދައެއް ކަމެއް ސާފު ނުވާ ކަމަށް ޚަބަރުގައި ބުނެފައިވެއެވެ.

އީރާނުން ވަނީ އެ ޤައުމުގެ ނިއުކްލިއަރ ޕްރޮގްރާމާ ގުޅޭގޮތުން "ފޮރުވާފައިވާ އެއްވެސް އެއްޗެއް ނެތް" ކަމަށް ބުނެފައެވެ.

ކައިރޯގައި، އދ.ގެ ނިއުކްލިއަރ ވޮޗްޑޯގުގެ އިސްވެރިޔާ ރަފައެލް ގްރޮސީއާ ބައްދަލު ކުރެއްވުމަށް ފަހު، އީރާނުގެ ޚާރިޖީ ވަޒީރު އައްބާސް އަރަގްޗީ ވިދާޅުވެފައިވަނީ: "މަޤްޞަދަކީ ސުލްޙަވެރި ނިއުކްލިއަރ ޙަރަކާތްތަކުން އީރާނު މަޙްރޫމް ކުރުން ކަމުގައި ވާނަމަ، ޔަޤީނުން ވެސް އެއްވެސް އެއްބަސްވުމަކަށް ވާސިލު ނުވެވޭނެއެވެ."

އިންޓަނޭޝަނަލް އެޓޮމިކް އެނަރޖީ އޭޖެންސީ (އައިއޭއީއޭ) ގެ ގްރޮސީ ވަނީ ހޯމަ ދުވަހު، ލީކުވެފައިވާ ރިޕޯޓެއްގައި ތެހެރާނުން ޔުރޭނިއަމް އެންރިޗްކުރުން އިތުރުކޮށްފައިވާކަން ހާމަވާ ކަމަށް ވިދާޅުވެ، އީރާނުން ހާމަކަން ބޮޑު ގޮތެއްގައި ކަންކަން ކުރުމަށް ގޮވާލައްވާފައެވެ.

ލީކުވެފައިވާ އައިއޭއީއޭގެ ރިޕޯޓުން ދައްކާގޮތުގައި އީރާނުން ވަނީ 60 އިންސައްތަ އާ ހަމައަށް އެންރިޗްކޮށްފައިވާ ޔުރޭނިއަމް އުފެއްދުން އިތުރު ކޮށްފައެވެ. މިއީ ނިއުކްލިއަރ ހަތިޔާރު އުފެއްދުމަށް ބޭނުންވާ 90 ޕަސެންޓްގެ ފެންވަރާ ކައިރި މިންވަރެކެވެ.

ގްރޮސީ އިތުރަށް ވިދާޅުވެފައިވަނީ އައިއޭއީއޭ ގެ ރިޕޯޓުގައިވާ ބައެއް ހޯދުންތަކަށް ބައެއް ފަރާތްތަކުން ހިތްހަމަ ނުޖެހިދާނެ ކަމަށާއި އެހެން ނަމަވެސް އައިއޭއީއޭ ފާޑުކިޔުމަށް އާދަވެފައިވާ ކަމަށެވެ.

އީރާނުން ވަނީ މި ރިޕޯޓު ބަލައިނުގަންނާނެ ކަމަށް ބުނެފައެވެ. އަދި އީރާނަށް ކުރިން ވެސް ދަތި ކުރުމުގެ ފިޔަވަޅު އަޅާނެ ކަމަށް ބުނެ ބިރު ދައްކާފައިވާ ހުޅަނގުގެ ގައުމުތަކުން މި ރިޕޯޓުގެ ބޭނުން ނަހަމަ ގޮތުގައި ހިފަން އުޅެފި ނަމަ ބަދަލު ހިފާނެކަމުގެ އިންޒާރު އީރާނުން ވަނީ ދީފައެވެ.

"ބައެއް ޤައުމުތަކުން މި އޭޖެންސީ ބޭނުން ކޮށްގެން އީރާނާ ދެކޮޅަށް ކަންކަން އިތުރަށް ގޯސްކުރުމަށް މަގުފަހިކުރަން މަސައްކަތް ކުރަމުންދެއެވެ. އަޅުގަނޑު އުންމީދު ކުރަނީ މި އޭޖެންސީ މި ދަލުގައި ނުޖެހޭނެ ކަމަށެވެ،" އައިއޭއީއޭއާ ބެހޭގޮތުން އަރަގްޗީ ވިދާޅުވިއެވެ.

މިއާއެކު، އީރާނުން ވަނީ ޓްރަމްޕްގެ އިދާރާއާއެކު ނިއުކްލިއަރ އެއްބަސްވުމަކަށް ވާސިލްވުމުގެ ޝަރުޠެއްގެ ގޮތުގައި، އެ ޤައުމުގެ އިޤްތިޞާދު ހަލާކުކޮށްފައިވާ ދަތި ކުރުމުގެ ފިޔަވަޅުތައް އުވާލުމަށް އެމެރިކާގެ ކިބައިން އެދިފައެވެ.

އޮމާން މެދުވެރިވެގެން ބޭއްވުނު ފަސް ބުރުގެ މަޝްވަރާ ތަކަށްފަހު، އަރަގްޗީ ހޮނިހިރު ދުވަހު ވިދާޅުވެފައިވަނީ އޭނާ އަށް ނިއުކްލިއަރ އެއްބަސްވުމަކަށް އެމެރިކާއިން ހުށަހަޅާފައިވާ ހުށަހެޅުމުގެ "ބައިތަކެއް" ލިބިފައިވާ ކަމަށެވެ.

އަރަގްޗީ އަދި ގްރޮސީ ވަނީ މިޞްރުގެ ރައީސް އަބްދުލް ފައްތާޙް އައް-ސީސީއާ ބައްދަލު ކުރައްވާފައެވެ. ސީސީ ވަނީ އެމެރިކާ-އީރާން މަޝްވަރާތަކަށް ތަޢުރީފުކުރައްވައި، "މުޅި ސަރަޙައްދު ހަނގުރާމަ އަކަށް ވެއްޓުނަ ނުދީ މަސްރަހް ފިނި ކުރުމަށް ގޮވާލައްވާފައެވެ.