ހުއްދަ ނެތި ހައްޖު ވާން އުޅުނު ދެ ލައްކަ އަށް ވުރެ ގިނަ މީހުން މައްކާ އިން ބޭރު ކޮށްފި

ހުއްދަ ނެތި ހައްޖުވާން މަސައްކަތް ކުރި 205,000 އަށް ވުރެ ގިނަ މީހުން މައްކާ އިން ބޭރުކޮށްފި ކަމަށް ސަޢޫދީ ޢަރަބިއްޔާގެ ޕަބްލިކް ސެކިއުރިޓީގެ ޑިރެކްޓަރ އަދި ޙައްޖު ސެކިއުރިޓީ ކޮމިޓީގެ ޗެއަރމަން ލެފްޓިނަންޓް ޖެނެރަލް މުޙައްމަދު އަލް-ބައްސާމީ ހާމަ ކުރައްވައިފިއެވެ.

އާދީއްތަ ދުވަހު މައްކާގައި ބޭއްވުނު ޙައްޖު ސެކިއުރިޓީ ކޮމާންޑަރުންގެ ޖޮއިންޓް ނޫސްވެރިންގެ ބައްދަލުވުމެއްގައި ވާހަކަދައްކަވަމުން އޭނާ ވިދާޅުވީ، ސަލާމަތީ ބާރުތަކުން ވަނީ ޙައްޖު ހުއްދަ ނެތް 269,000 އަށް ވުރެ ގިނަ މީހުން މައްކާ އަށް ވަނުން ހުއްޓުވާފައެވެ.

"ޕަބްލިކް ސެކިއުރިޓީގެ އޮފިޝަލުން ވަނީ ޤާނޫނާ ޚިލާފަށް ޙައްޖުވެރިން އުފުލަން މަސައްކަތްކުރި 1,239 މީހުން ހައްޔަރުކޮށް، ޙައްޖުގެ ޤަވާޢިދުތަކާ ޚިލާފުވި 75,000 އަށް ވުރެ ގިނަ މީހުންނަށް އަދަބު ދީފައެވެ. އަދި ސެކިއުރިޓީ ޓީމުތަކުން ވަނީ 415 އަށްވުރެ ގިނަ ފޭކު ޙައްޖު އޮފީސް ހޯދާފައެވެ،" އޭނާ ވިދާޅުވިއެވެ.

ނޫސްވެރިންގެ ބައްދަލުވުމުގައި، ޙައްޖު ސެކިއުރިޓީ ކޮމާންޑަރުން ވަނީ މިއަހަރުގެ ޙައްޖު މޫސުމަށް ރޭވިފައިވާ ސެކިއުރިޓީ އިންތިޒާމުތަކުގެ ޕްލޭންތައް ނޫސްވެރިންނަށް ވަނީ ހިއްސާ ކޮށްފައެވެ.

އަލް-ބައްސާމީ ވިދާޅުވީ ސަޢޫދީ ޕަބްލިކް ސެކިއުރިޓީ ވަނީ ޙައްޖުގެ ޤަވާޢިދުތަކާ ޚިލާފުވާ ފަރާތްތަކާ ދެކޮޅަށް ފިޔަވަޅު އެޅުން ހަރުދަނާ ކުރުމަށް އާޓިފިޝަލް އިންޓެލިޖެންސް ބޭނުން ކުރަން ފަށާފައެވެ.

އޭނާ ވަނީ ޙައްޖުގެ ޤަވާޢިދުތަކާ ޚިލާފުވާ ކޮންމެ މީހަކަށް ސެކިއުރިޓީ މުވައްޒަފުން ފާރަލާނެކަމަށް ވިދާޅުވެފައެވެ.

އަލް-ބައްސާމީ ވިދާޅުވީ ޕަބްލިކް ސެކިއުރިޓީ އޮފިޝަލުން ވަނީ ހުއްދަނެތް ޙައްޖުވެރިން އުފުލުމުގެ ސަބަބުން މައްކާ އަށް ވަންނަ އެންޓްރީ ޕޮއިންޓް ތަކުން 110,000 އުޅަނދު އަނބުރާ ފޮނުވާލާފައެވެ. އަދި ހުއްދަނެތް ޙައްޖުވެރިން އުފުލަން ރޭވި 5,000 އަށްވުރެ ގިނަ އުޅަނދު ހިފަހައްޓާފައެވެ.

ސަޢޫދީ ޕަބްލިކް ސެކިއުރިޓީން ވަނީ ޤަވާޢިދާ ޚިލާފުވާ ފަރާތްތައް ހައްޔަރުކުރުމަށް މައްކާ އަށް ވަންނަ ތަންތަނުގައި ދާއިމީ ސެކިއުރިޓީ ޗެކްޕޮއިންޓްތައް ޤާއިމު ކޮށްފައެވެ.

ޕާސްޕޯޓުގެ ޑިރެކްޓަރ ޖެނެރަލް މޭޖަރ ޖެނެރަލް ސާލިޙް އަލް-މުރައްބާ ހާމަ ކުރެއްވި ގޮތުގައި ބޭރު ޤައުމުތަކުން އައިސްފައިވާ ޙައްޖުވެރިންގެ އަދަދު ވަނީ 1.47 މިލިއަނަށް ވުރެ އިތުރުވެފައެވެ.

މައްކާ ރޫޓު އިނީޝިއޭޓިވްގެ ފައިދާ ލިބޭ ޤައުމުތަކުގެ އަދަދު ވަނީ 12 އެމްބާކޭޝަން ޕޮއިންޓްތަކާއެކު 8 ޤައުމަށް އިތުރުވެފައެވެ.