ސައުދީ އަރަބިއްޔާގެ ޚާރިޖީ ވަޒީރު އިސްވެ ހުންނަވައިގެން ހުޅަނގު އައްސޭރި އަށް އަރަބި ގައުމުތަކުގެ ވަޒީރުންގެ ވަފުދެއް ކުރައްވަން ހަމަ ޖެއްސި ޒިޔާރަތައް އިސްރާއީލުން ހުރަސް އަޅައިފިއެވެ.

މި ޒިޔާރަތައް އެއްބާރުލުން ނުދޭނެ ކަން ހާމަ ކުރީ ހުކުރު ދުވަހު އިސްރާއީލުގެ އޮފިޝަލަކު ސީއެންއެން އަށް ވާހަކަ ދައްކަމުންނެވެ.

ރާމަﷲ ގައި ފަލަސްތީނުގެ ސަރުކާރުގެ ވެރިންނާއި އަރަބި ގައުމުތަކުގެ ވަފުދު ބައްދަލު ކުރުމަކީ އިސްރާއީލުގެ އޮފިޝަލް ބުނި ގޮތުގައި އިސްރާއީލު "ރުޅިއަރުވަން" ކުރާ ކަމެއް ކަމަށާއި، އެ ބައްދަލުވުމުގައި މަޝްވަރާ ކުރަން ހަމަ ޖެހިފައިވަނީ ފަލަސްތީނުގެ ދައުލަތެއް ގާއިމު ކުރުމާ ބެހޭ ގޮތުން ކަމަށާއި "އިސްރާއީލަށް ގެއްލުން ދިނުމަށާއި އެ ގައުމުގެ ސަލާމަތަށް ނުރައްކާވާ ފަދަ ކަންކަމުގައި އިސްރާއީލުން އެއްބާރުލުން ނުދޭނެ" ކަމަށެވެ.

ފަލަސްތީނުގެ ދައުލަތެއް ވެގެންދާނީ އިސްރާއީލުގެ ބިމުގައި އުފެދޭ "ޓެރަރިސްޓް ދައުލަތަކަށް" ކަމަށް ވެސް އޮފިޝަލު ބުނެފައިވެއެވެ.

ހުޅަނގު އައްސޭރި އަށް އެ ވަފުދަށް ވާސިލު ވެވެނީ އުރުދުންގެ ތެރެއިން ކަމަށް ވެފައި، އުރުދުން އާ ހަމައިން ހުޅަނގު އައްސޭރި އަށް ދަތުރު ކުރުމަށް އިސްރާއީލުގެ ހުއްދަ ބޭނުންވެއެވެ.

ފަލަސްތީނު ސަރުކާރުގެ ނައިބު ރައީސް ހުސެއިން އަލް-ޝެއިޚް ވިދާޅުވެފައިވާ ގޮތުގައި، ސަޢޫދީ އަރަބިއްޔާގެ ޚާރިޖީ ވަޒީރު ޕްރިންސް ފައިޞަލް ބިން ފަރްޙާން އިސްކޮށް ހުންނަވައިގެން ޔޫއޭއީ، މިޞްރު، އުރުދުން، ގަތަރު އަދި ތުރުކީގެ ވަޒީރުން ހިމެނޭ ވަފުދެއް އާދީއްތަ ދުވަހު ރާމަﷲ އަށް ވަޑައިގެން ފަލަސްތީނުގެ ރައީސް މަޙްމޫދު ޢައްބާސްއާ ބައްދަލު ކުރައްވަން އޮތީ ހަމަ ޖެހިފައެވެ.

1967 ގައި އިސްރާއީލުން ފަލަސްތީނުގެ ހުޅަނގު އައްސޭރި ހިސާރު ކުރި ފަހުން އަރަބި ގައުމުތަކަށް ނިސްބަތްވާ މިހާ އިސް ވަފުދެއް މިހާތަނަށް ދަތުރު ކުރައްވާފައެއް ނުވެއެވެ.

ސަޢޫދީ އަރަބިއްޔާގައި ހުންނަވާ ފަލަސްތީނުގެ ސަފީރު މާޒިން ޣުނައިމް ސަޢޫދީ ސަރުކާރުގެ މީޑިއާއަށް ވިދާޅުވެފައިވަނީ "މިނިސްޓަރުންގެ މި ޒިޔާރަތަކީ... ސާފު މެސެޖެއް ކަމުގައި ބެލެވެއެވެ. ފަލަސްތީނުގެ މައްސަލައަކީ ޢަރަބިންނާއި މުސްލިމުންނަށް މުހިންމު މައްސަލައެކެވެ."