ޣައްޒާ ހަނގުރާމަ 60 ދުވަހަށް ހުއްޓާލުމުގެ އެއްބަސްވުމެއް އެމެރިކާ އިން ހުށަހަޅައިފި

ޣައްޒާ ހަނގުރާމަ 60 ދުވަހަށް ހުއްޓާލުމުގެ ޕްލޭނެއް އެމެރިކާ އިން ހުށަހަޅައިފިއެވެ.

ރޮއިޓާސް އަށް ފެނިފައިވާ މި ޕްލޭނުގައި ވާ ގޮތުން ހަނގުރާމަ ހުއްޓާލުމާ އެކު، ފުރަތަމަ ހަފްތާގައި ދިރިތިބި އަދި މަރުވެފައިވާ ރަހީނުން ހިމެނޭ ގޮތުން 28 އިސްރާއީލީ ރަހީނުން ދޫކޮށްލަން ޖެހެއެވެ. އޭގެ ބަދަލުގައި އިސްރާއީލުގެ ޖަލުތަކުން 125 ފަލަސްތީނު ގައިދީން މިނިވަން ކުރުމާއެކު، އިސްރާއީލުން ހިފަހައްޓާފައިވާ މަރުވެފައިވާ 180 ފަލަސްތީނު މީހެއްގެ ހަށިގަނޑު ހަވާލު ކުރަން ޖެހެއެވެ.

މި ޕްލޭންގައި ބަޔާންކޮށްފައިވާ ގޮތުގައި، މިއީ އެމެރިކާގެ ރައީސް ޑޮނަލްޑް ޓްރަމްޕް އަދި އިސްރާއީލާއި ހަމާސް އާ ދެމެދު މެދުވެރިންގެ ދައުރު އަދާ ކުރަމުންދާ މިޞްރު އާއި ޤަތަރުން ގެރެންޓީ ކޮށްދީފައިވާ ޕްލޭނެކެވެ. މި ހުށަހެޅުން ބުނާ ގޮތުގައި ހަމާސް އިން ހަނގުރާމަ ހުއްޓާލުމުގެ އެއްބަސްވުމުގައި ސޮއިކުރުމާއެކު ޣައްޒާ އަށް އެހީ ފޯރުކޮށްދިނުން ހިމެނެއެވެ.

އަދި މި ޕްލޭންގައި ބަޔާންކޮށްފައިވާ ގޮތުން، ދާއިމީ ގޮތެއްގައި ހަނގުރާމަ ހުއްޓާލުމުން ހަމާސް އިން ބާކީ ތިބި 30 ރަހީނުން ދޫކޮށްލާނެއެވެ.

ބުރާސްފަތި ދުވަހު ވައިޓް ހައުސް އިން ބުނެފައިވަނީ އެމެރިކާގެ މި ހުށަހެޅުމަށް އިސްރާއީލުން އެއްބަސްވެފައިވާ ކަމަށެވެ.

ފަލަސްތީނުގެ ހަމާސް އިން ރޮއިޓަރސް އަށް ބުނެފައިވަނީ އެ ފަރާތުން މި ޕްލޭން ދިރާސާކުރަމުންދާ ކަމަށާއި، ހުކުރު ނުވަތަ ހޮނިހިރު ދުވަހު ޖަވާބުދޭނެ ކަމަށެވެ.

އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން އިސްރާއީލާ ގުޅިގެން ހުށަހަޅާފައިވާ މި ހުށަހެޅުމަކީ ހަމާސް އިން "އަދިވެސް ދިރާސާ ކުރަމުންދާ" ހުށަހެޅުމެއް ކަމަށާއި، ނަމަވެސް މިހާރު އޮތް ގޮތުން މި ހުށަހެޅުމުގެ ނަތީޖާ އަކަށް ވާނީ ޣައްޒާގައި "މީހުން މެރުމާއި، ބަނޑުހައިހޫނުކަން ދެމިގެންދިއުން" އެކަނި ކަމަށް ފަލަސްތީނު ޖަމާޢަތުގެ އޮފިޝަލަކު ބުނެފައިވެއެވެ.

ހަމާސްގެ ސިޔާސީ ބިއުރޯގެ މެންބަރު ބާސިމް ނައީމް ރޮއިޓަރސް ނިއުސް އޭޖެންސީ އަށް ބުނެފައިވަނީ މި އެއްބަސްވުމުން ޣާއްޒާ ރައްޔިތުންގެ އެއްވެސް ޑިމާންޑެއް ފުރިހަމައެއް ނުވާ ކަމަށާއި، އޭގެ ތެރެއިން އެންމެ މުހިންމު ކަމަކީ ހަނގުރާމަ މުޅިން ހުއްޓާލުން ކަމަށެވެ.

ހަމާސް އާއި އިސްރާއީލާ ދެމެދު އޮތް ބޮޑެތި ތަފާތުތަކުގެ ސަބަބުން، މީގެ ކުރިން ހަނގުރާމަ ހުއްޓާލުމަށް ވީ އެއްބަސްވުން ދެމެހެއްޓިފައެއް ނުވެއެވެ.

އޭރު އިސްރާއީލުން ޑިމާންޑު ކޮށްފައި ވަނީ ހަމާސް އިން މުޅިން ހަތިޔާރު ދޫކޮށްލައި، ހަނގުރާމަވެރި އަދި ވެރިކަން ހިންގާ ބާރެއްގެ ގޮތުގައި ހަމާސް ދެމި ނުއޮތުމަށާއި، ހަނގުރާމަ ނިންމުމަށް އެއްބަސްވުމުގެ ކުރިން ބާކީ ތިބި 58 ރަހީނުން މިނިވަން ކުރުމަށެވެ.

ހަމާސް އިން ބުނެފައިވަނީ ހަތިޔާރު ބަހައްޓަން ކުރާ ޑިމާންޑް ބަލައި ނުގަންނާނެ ކަމަށެވެ. އެއާއެކު ހަމާސް އިން ޑިމާންޑް ކޮށްފައިވަނީ ޣައްޒާ އިން އިސްރާއީލު ސިފައިން މުޅިން ފޭބުމަށާއި، ހަނގުރާމަ މުޅިން ހުއްޓާލުމަށް އެއްބަސްވުމަށެވެ.

އިސްރާއީލުން ޣައްޒާގައި ހަނގުރާމަ ފެށީ 2023 ވަނަ އަހަރުގެ އޮކްޓޯބަރު 7 ވަނަ ދުވަހު ހަމާސް އިން ދެކުނު އިސްރާއީލަށް ދިން ހަމަލާއަށް ރައްދު ދިނުމުގެ ގޮތުން ކަމަށް ބުނެއެވެ.

އޭގެ ފަހުން އިސްރާއީލުން ދިން ހަމަލާތަކުގައި 54,000 އަށްވުރެ ގިނަ ފަލަސްތީނު ރައްޔިތުން ޝަހީދުވެފައިވެއެވެ. އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ. މުޅި ޣައްޒާ ވަނީ ސުންނާފަތިވެ ވީރާނާ ވެފައެވެ.