މަގުމައްޗަށް ނުކުމެގެންވެސް 2028 ވަނަ އަހަރު އިންތިހާބު ބާއްވާނަން - މޫސަ
29 މެއި 2025 | ބުރާސްފަތި 17:11ރައްޔިތުންގެ ޖީބުފަޅު ޑެފިސިޓް ވެގެން އުޅޭއިރު، ސަރުކާރުން ބުނާގޮތުން ބަޖެޓް ސަރޕްލަސް
އެމްޑީޕީގެ ކުރީގެ ޗެއަރޕާސަން މޫސާ މަނިކު
އެމްޑީޕީ އިން މަގުމައްޗަށް ނުކުމެގެންވެސް 2028 ވަނަ އަހަރުގެ ރިޔާސީ އިންތިހާބު ބާއްވާނެ ކަމަށް އެމްޑީޕީގެ ކުރީގެ ޗެއަރޕާސަން މޫސާ މަނިކު (ރީކޯ މޫސަ) ވިދާޅުވެއްޖެއެވެ.
އެމްޑީޕީގެ ހަރުގެ ޖަލްސާގައި ވާހަކަ ދައްކަވަމުން ރީކޯ ވިދާޅުވީ 2028 ގައި ރިޔާސީ އިންތިހާބު އޮންނާނެ ކަމަށާއި، އެ އިންތިހާބު އެމްޑީޕީން މަގުމައްޗަށް ނުކުމެގެންވެސް ކުރުވާނެ ކަމަށެވެ. ރީކޯ ވިދާޅުވީ އެމްޑީޕީއާއި ދޭތެރޭގައި މާޔޫސްވެވަޑައިނުގަތުމަށް ވިދާޅުވެފައެވެ.
އޭނާ ވިދާޅުވީ ސަރުކާރުން ނެރޭ ހިސާބުގައި ބަޖެޓް ސަރޕްލަސް ވެފައިވާ އިރު ރައްޔިތު މީހާގެ ޖީބު ޑެފިސިޓް ވެފައިވާ ކަމަށެވެ. ރީކޯ ވިދާޅުވީ އިގްތިސާދީ އިޖްތިމާއީ ގޮތުން ރާއްޖެ ފަހަތަށް ދާނަމަ އެއީ މައްސަލައެއް ކަމަށެވެ. އޭނާ ވިދާޅުވީ އެމްޑީޕީއަކީ ޒިންމާދާރު ޕާޓީއެއް ކަމަށެވެ.
ރީކޯ ވިދާޅުވީ ކުރިއަށް އޮތީ ލޯކަލް ކައުންސިލް އިންތިހާބު ކަމަށާއި، މިއީ ކުރީގެ ކަތީބުންގެ ވެރިކަން ބަދަލުކޮށް، ރައްޔިތުން އިންތިހާބުކުރާ ވެރިން އެމީހުންގެ މައްޗަށް ބައިތިއްބައިގެން ކުރިއަށް ދިއުމަށް އެމްޑީޕީއިން އެކުލަވާލި ނިޒާމެއް ކަމަށެވެ.
ފަހުރުވެރިކަމާއެކު މި ބުނަނީ މި އެމްޑީޕީން މި ޕޯޑިއަމް ކައިރީގައި ތިބެގެން ވާހަކަ ދައްކައިގެން ހޯދި ނިޒާމެއް އެއީ. އެ ނިޒާމް ފުނޑުފުނޑުވެގެންދާއިރު ވެސް ބަލަހައްޓައިގެން ތިބެންވީތޯ ތިބޭފުޅުން. މުޅި ނިޒާމް ފުނޑުވެގެންދާއިރު. ޝަރުއީ ނިޒާމް ފުނޑުވެގެންދާއިރު. ރައްޖޭގެ އިގްތިސާދު ފުނޑުވެގެންދާއިރު. އިޖްތިމާއީ ހާލަތު ބީވެގެންދާއިރު.އެމްޑީޕީގެ ކުރީގެ ޗެއަރޕާސަން މޫސާ މަނިކު
ރިކޯ ވިދާޅުވީ އެމްޑީޕީއިން ހޯދައިދިން މިނިވަންކަމާއި، އެމްޑީޕީއިން ހޯދައިދިން ޑިމޮކްރަސީގެ ރީތި އުސޫލުތަކާއި އަދުލުއިންސާފުގެ އުސޫލުތައް ދެމެހެއްޓުމަކީ މިއަދު ހުރިހާ ޒުވާނުންގެ ވާޖިބަކަށް ވާންޖެހޭނެ ކަމަށެވެ.
