އެމެރިކާ އިން ސީރިއާ އަށް ކަނޑައެޅި ޚާއްޞަ މަންދޫބު، ތޯމަސް ބެރެކް، ބުރާސްފަތި ދުވަހު ދިމިޝްގުގައި ހުންނަ ސަފީރުގެ ރަސްމީ އޮފީހުގައި އެމެރިކާގެ ދިދަ ނަންގަވައިފިއެވެ.

މިއީ 2012 ގައި އެމްބަސީ ބަންދުކުރި ފަހުން، ފުރަތަމަ ފަހަރަށް އެތަނުގައި އެމެރިކާގެ ދިދަ ނެގެމެވެ.

އެމްބަސީ ބަންދު ކުރެވުނީ ސީރިއާގައި ހަނގުރާމަ ފެށުނުތާ އަހަރެއް ފަހުންނެވެ.

ސީރިއާގެ ވެރިކަމުން ބައްޝާރު އަލް-އަސަދު ވެއްޓުމާ އެކު އެމެރިކާ އިން ސީރިއާ އާ އެކު ގޮތް ގުޅުމަށް ކޮންމެވެސް ވަރެއްގެ ހެޔޮ ބަދަލެއް ގެންނަ ތަން ފެނިފައިވަނިކޮށް، ފާއިތުވި ހަފްތާތަކުގައި އެމެރިކާ އިން ވަނީ އަވަސް ބާރުމިނެއްގައި ގުޅުން ބަދަހިކުރަން ފަށާފައެވެ.

އެމެރިކާގެ ރައީސް ޑޮނަލްޑް ޓްރަމްޕް މެއި މަހުގެ މެދުތެރޭގައި ރިޔާޟް ގައި ސީރިއާގެ އައު ރައީސް އަޙްމަދު އަލް-ޝަރާއާ ބައްދަލު ކުރެއްވިއެވެ. އަދި ޓްރަމްޕްގެ ސަރުކާރުން ސީރިއާގެ މައްޗަށް އެމެރިކާއިން އަޅާފައިވާ ފިޔަވަޅުތައް ލުއިކޮށްދީފައިވެއެވެ.

ބެރެކް އަކީ ތުރުކީ އަށް ކަނޑައަޅާފައި ހުންނަ އެމެރިކާގެ އެމްބަސަޑަރު ވެސް މެއެވެ. އޭނާ ސީރިއާ އަށް އެމެރިކާ އިން ކަނޑައަޅާ ސްޕެޝަލް އެންވޯއީ ގެ ގޮތުގައި ޢައްޔަން ކުރެވުނީ މެއި 23 ވަނަ ދުވަހުއެވެ. އަދި މިހާރު އޭނާ ވަނީ ސީރިއާ އަށް ރަސްމީ ދަތުރެއްގައި ވަޑައިގެންފައެވެ.

އެމެރިކާ އިން ދިމިޝްގު ގައި ހުރި އެމްބަސީ ބަންދުކުރީ 2012 ގެ ފެބްރުއަރީ މަހުގައެވެ. މިއީ އޭރުގެ ރައީސް ބައްޝާރު އަލް-އަސަދުގެ ވެރިކަމާ ދެކޮޅަށް ފެށުނު އިހުތިޖާޖުތައް ވަރުގަދަ ދާޚިލީ ހަނގުރާމައަކަށް ބަދަލުވިތާ ގާތްގަނޑަކަށް އަހަރެއް ފަހުންނެވެ.

ސީރިއާ ގައި ހުރި އެމްބަސީ ބަންދު ކުރުމަށްފަހު ސީރިއާ އަށް ޢައްޔަނު ކުރެވުނު އެމެރިކާގެ ޚާއްޞަ މަންދޫބުން މަސައްކަތްކުރެއްވީ ސީރިއާ އިން ބޭރުގައި ތިއްބަވައިގެންނެވެ. އަދި އެއިން އެއްވެސް ބޭފުޅަކު ސީރިއާ އަށް ޒިޔާރަތެއް ނުކުރައްވައެވެ.