ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމު ކޮށްގެން ކުރިއަށް ގެންދިޔަ، އެފްއޭއެމް ލީގު ކަޕްގެ ޗެމްޕިއަންކަން މާޒިޔާ ސްޕޯޓްސް އެންޑް ރެކްރިއޭޝަން އިން ހޯދައިފި އެވެ.

މުބާރާތުގެ ފައިނަލްގައި މާޒިޔާ އިން ނިކުތީ އޮޑި ސްޕޯޓްސް ކުލަބާ ދެކޮޅަށެވެ. ބުދަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު މާޒިޔާ އިން ކާމިޔާބު ކުރީ 4-0 އިންނެވެ. މެޗުގެ ފުރަތަމަ ހާފުގައި މާޒިޔާ އިން ދެ ލަނޑު ޖެހިއިރު، ދެ ވަނަ ހާފުގައި ވެސް ވަނީ ދެ ލަނޑު ޖަހައިފަ އެވެ.

މުބާރާތުގެ ފައިނަލްގެ ޖާާގަ މާޒިޔާ އިން ހޯދީ ސެމީ ފައިނަލްގައި ޓީސީ ސްޕޯޓްސްް ކުލަބުގެ މައްޗަށް ކުރި ހޯދައިގެންނެވެ. އޮޑި އިން ފައިނަލްގެ ޖާގަ ހޯދީ ސެމީ ފައިނަލްގައި ނިއު ރޭޑިއަންޓް ސްޕޯޓްސް ކުލަބުގެ މައްޗަށް ކުރި ހޯދައިގެންނެވެ.

ފައިނަލް މެޗު ފަށައިގެން ފަސް ވަނަ މިނެޓުގައި މާޒިޔާ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ އިބްރާހީމް އައިސަމް އެވެ. އޭގެ ފަހުން މެޗުގެ 28 ވަނަ މިނެޓުގައި މާޒިޔާގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ޙަސަން ރާއިފް އަޙުމަދު އެވެ.

މެޗުގައި މާޒިޔާ އިން އެ ޓީމުގެ އަނެއް ދެ ލަނޑު ވެސް ޖެހީ މެޗުގެ ދެ ވަނަ ހާފުގަ އެވެ. މެޗުގެ 70 ވަނަ މިނެޓުގައި މާޒިޔާގެ ތިން ވަނަ ލަނޑު ޖެހީ މުޙައްމަދު އިލާން އިމްރާން އެވެ. އޭގެ ފަސް މިނެޓު ފަހުން އިލާން ވަނީ މާޒިޔާގެ ހަތަރު ވަނަ ލަނޑު ވެސް ޖަހައިފަ އެވެ. މެޗުގައި އިލާން ކުޅެން ނިކުމެފައި ވަނީ ވެސް ބަދަލު ކުޅުންތެރިޔެއްގެ ގޮތުގަ އެވެ.

ފަސް ޓީމުގެ ދެ މެދުގައި ކުރިއަށް ދިޔަ މި މުބާރާތަކީ، އެފްއޭއެމް އިން ފަށަން މަސައްކަތް ކުރި ރާއްޖޭގެ ފުޓުބޯޅަ ސީޒަން ފެށުން ފަސް ކޮށްފައި ވާތީ، އޭގެ ބަދަލުގައި އެފްއޭއެމް އިން ބޭއްވި މުބާރާތެކެވެ، ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ އެދުމުގެ މަތިން ވަނީ، ފުޓުބޯޅަ ސީޒަން އޮގަސްޓު މަހު ފަށާ ގޮތަށް ބަދަލު ކޮށްފަ އެވެ.

މި މުބާރާތް އެފްއޭއެމް އިން ކުރިއަށް ގެންދިޔައީ ފީފާގެ މާލީ އެހީތެރިކަމާ އެކު އެވެ. މާޒިޔާ، އޮޑި، ޓީސީ އަދި ނިއުގެ އިތުރުން މި މުބާރާތުގައި ވާދަކޮށްފައި ވަނީ މަހިބަދޫ ސްޕޯޓްސް ކުލަބެވެ.