އިސްރާއީލުގެ ބާރުތަކުން ޣައްޒާއަށް ހުއްޓުމެއްނެތި ބޮންއެޅުން ކުރިއަށް ގެންދާއިރު، ބުދަ ވިލޭރޭގެ ހަމަލާތަކުގައި މަދުވެގެން 24 މީހުން ވަނީ ޝަހީދުވެފައެވެ.

އިސްރާއީލުން ޣައްޒާ އަށް ދެމުންދާ ހަމަލާތައް އިތުރަށް ނުރައްކާ ކޮށްފައިވާތީ ޔޫރަޕިއަން ޔޫނިއަން އާއި އިނގިރޭސި ވިލާތުން އިސްރާއީލަށް އިންޒާރު ދިން ނަމަވެސް އެކަމަށް އެއްވެސް ފަރުވާލެއް އިސްރާއީލު ސަރުކާރުން ބަހައްޓާފައެއް ނުވެއެވެ.

ޣައްޒާގެ އިސްވެރިން ބުނާ ގޮތުގައި އިސްރާއީލުގެ "ބަނޑަށްޖެއްސުމުގެ ސިޔާސަތު" ގެ ސަބަބުން މާރޗް 2 އިން ފެށިގެން މަދުވެގެން 326 ފަލަސްތީނު މީހުން މަރުވެފައިވެއެވެ. އަދި އދ. އިން އިންޒާރުދެމުން ބުނަނީ 48 ގަޑިއިރުގެ ތެރޭގައި 14،000 ކުޑަކުދިން މަރުވުމުގެ ނުރައްކާ އޮތް ކަމަށެވެ.

އދ. އިން އިތުރަށް ބުނާ ގޮތުގައި، އެ ސަރަޙައްދަށް މަދު އަދަދެއްގެ އެހީގެ ޓްރަކުތައް ވަދެފައިވީ ނަމަވެސް، އިސްރާއީލުގެ ހުރަސްތަކުގެ ސަބަބުން ޣައްޒާގައި އެއްވެސް އެހީއެއް ބެހިފައެއް ނުވެއެވެ.

ޣައްޒާގެ ޞިއްޙީ ވުޒާރާގެ ތަފާސް ހިސާބުން ދައްކާ ގޮތުގައި، އިސްރާއީލުން ޣައްޒާ ގައި ކުރަމުންދާ ހަނގުރާމައިގައި މަދުވެގެން 53،573 ފަލަސްޠީނު މީހުން ޝަހީދުވެ، 121،688 މީހުން ޒަޚަމްވެފައިވެއެވެ.