އިސްރާއީލުން ޣައްޒާ ސްޓްރިޕްގެ އެކި ސަރަޙައްދު ތަކަށް ދިން ވައިގެ ހަމަލާތަކުގައި އެންމެ ބައި ގަަޑިއިރުގެ ތެރޭގައި މަދުވެގެން 38 ފަލަސްތީނު ރައްޔިތުން ޝަހީދު ވެއްޖެ ކަމަށް ޣައްޒާގެ ސިއްހީ އޮފިޝަލުން ހާމަ ކޮށްފި ކަމަށް ބީބީސީ އިން ބުނެފިއެވެ.

ޣައްޒާ ގެ ސިވިލް ޑިފެންސް އޭޖެންސީގެ ތަރުޖަމާނަކު ބުނެފައިވަނީ އިސްރާއީލުގެ ހަނގުރާމަމަތީ މަތިންދާބޯޓުތަކުން ހަމަލާ ދީފައިވަނީ އިރުމަތީ ޣައްޒާ ސިޓީގައި ހުރި ސްކޫލަކަށާއި؛ މެދުތެރޭ ޣައްޒާގެ ނުސައިރާތު ރެފިއުޖީ ކޭމްޕުގައި ގެދޮރު ގެއްލިފައިވާ ޢާއިލާތަކެއް އުޅެމުން ދިޔަ ސަރަހައްދުގައި ހުރި މިހާރު ބޭނުން ނުކުރާ ތެޔޮ ސްޓޭޝަނަކަށާއި؛ އަދި ދެކުނު ޣައްޒާގެ ދީރުލް ބަލާޙުގައި ހުރި ތިން ބުރީގެ އާންމުން ދިރިއުޅޭ އިމާރާތަކަށް ކަމަށެވެ.

އިސްރާއީލީ ބާރުތަކުން ޣައްޒާއަށް ބޮންއެޅުމުގެ ސަބަބުން، އަންގާރަ ވިލޭރޭ މެންދަމުން ފެށިގެން މަދުވެގެން 60 މީހުން ޝަހީދުވެފައިވާ ކަމަށް އަލްޖަޒީރާ އިން ރިޕޯޓުކޮށްފައިވެއެވެ. މިއީ ދެކުނުގެ ޚާން ޔޫނިސް ސިޓީގައި ދިރިއުޅޭ ފަލަސްތީނުގެ ރައްޔިތުން އަދި "މިހާތަނަށް ނުދެކޭފަދަ ހަމަލާއެއް" ކަމަށް ރިޕޯޓުކޮށްފައި ވެއެވެ. އިސްރާއީލުގެ އަސްކަރިއްޔާ އިން ވަނީ މިސަރަހައްދު ދޫކޮށް ދިއުމަށް ފަލަސްތީނު ރައްޔިތުންނަށް އަމަރު ކޮށްފައެވެ.

ކެނެޑާ، ފްރާންސް އަދި އިނގިރޭސިވިލާތުން ވަނީ އިސްރާއީލުން އަލުން ފަށާފައިވާ އަނިޔާވެރި ހަމަލާތައް ހުއްޓާ ނުލައިފިނަމަ 'އަމަލީ ފިޔަވަޅު' އަޅާނެ ކަމަށް ބުނެ އިންޒާރު ދީފައެވެ.

އޭގެ އިތުރުން 22 ޤައުމަކުން އިސްރާއީލަށް ގޮވާލާފައިވަނީ ބަނޑުހައިހޫނުކަން ތަހައްމަލު ކުރަމުންދާ ޣައްޒާއަށް އެހީ ފޯރުކޮށްދިނުމަށް އަޅާފައިވާ ފިޔަވަޅުތައް ވަގުތުން އުވާލުމަށެވެ.

އިސްރާއީލުގެ ބޮޑުވަޒީރު ބެންޖަމިން ނެތަންޔާހޫ ވަނީ ދުނިޔޭގެ ގައުމުތަކުގެ ގޮވާލުންތައް ބަލައިނުގަނެ، ހަމަލާތައް ކުރިއަށް ގެންދާނެ ކަމަށް ވަޢުދުވެފައިވެއެވެ.

އިސްރާއީލުގެ އަނިޔާވެރި ބޮޑުވަޒީރު ނަތަންޔާހޫގެ އަމުރަށް އިސްރާއީލު ސިފައިން މިހާރު ދެމުންދާ ގަދަފަދަ ހަމަލާތަކަކީ މުޅި ޣައްޒާ އިސްރާއީލުގެ ބާރުގެ ދަށަށް ގެނައުމުގެ މަގްސަދުގައި ފަށާފައިވާ ހަމަލާތަކެއް ކަމަށް އިސްރާއީލުން ވަނީ ބުނެފައެވެ.