ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ކުރިއަށް ގެންދާ، އެފްއޭއެމް ލީގު ކަޕްގައި އޮޑި ސްޕޯޓްސް ކުލަބާ ދެކޮޅަށް ކުޅުނު މެޗުން މޮޅުވެ، ނިއު ރޭޑިއަންޓް ސްޕޯޓްސް ކުލަބު ވެސް މުބާރާތުގެ ސެމީ ފައިނަލްގެ ޖާގަ ހޯދައިފި އެވެ.

މުބާރާތުގައި ނިއު ރޭޑިއަންޓްގެ ފުރަތަމަ މެޗުގައި ވަނީ ވާދަވެރި މާޒިޔާ ސްޕޯޓްސް އެންޑް ރެކްރިއޭޝަން އަތުން ބަލިވެފަ އެވެ. ދެ ވަނަ މެޗުގައި ވަނީ ޓީސީ ސްޕޯޓްސް ކުލަބު އަތުން މޮޅުވެފަ އެވެ. ތިން ވަނަ މެޗުގައި ވަނީ އޮޑި އަތުން 2-0 އިން މޮޅުވެފަ އެވެ.

އޮޑީގެ ފުރަތަމަ މެޗުގައި ޓީސީ އާއި އެއްވަރުވެފައިވާއިރު، ދެ ވަނަ މެޗުގައި ވަނީ މަހިބަދޫ އަތުން ބޮޑު މޮޅެއް ހޯދައިފަ އެވެ. ތިން ވަނަ މެޗުގައި ނިއު ރޭޑިއަންޓް އަތުން ވަނީ ބަލިވެފަ އެވެ.

ހޮނިހިރު ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު ނިއު ރޭޑިއަންޓް އިން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި އެ ޓީމުން އެއް ލަނޑު ޖެހިއިރު، ދެ ވަނަ ހާފުގައި ވަނީ ދެ ވަނަ ލަނޑެއް ޖަހައިފަ އެވެ.

މެޗުގެ ފުރަތަމަ ހާފުގެ 18 ވަނަ މިނެޓުގައި ނިއު ރޭޑިއަންޓަށް ލީޑު ނަގައިދިނީ އެ ޓީމުގެ ބިދޭސީ ކުޅުންތެރިޔާ، ތޯރިގު ޖެބްރިން އެވެ. އޭގެ ފަހުން މެޗުގެ ދެ ވަނަ ހާފުގައި، މެޗުގެ 73 ވަނަ މިނެޓުގައި ނިއު ރޭޑިއަންޓްގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ އިބްރާހީމް ރިޒުހާމް އެވެ.

މޮޅާއެކު ނިއު ރޭޑިއަންޓުން ވަނީ، ބާކީ އެއް މެޗު އޮއްވައި މުބާރާތުގެ ސެމީ ފައިނަލްގެ ޖާގަ ކަށަވަރު ކޮށްފަ އެވެ. މިހާތަނަށް ކުޅެފައިވާ ތިން މެޗުން އެ ޓީމަށް ލިބެނީ ހަ ޕޮއިންޓެވެ. ނިއު ރޭޑިއަންޓަށް ދެން އޮންނާނީ މަހިބަދޫއާ ދެކޮޅަށް ކުޅޭ މެޗެވެ.

ތިން މެޗުން ހަތަރު ޕޮއިންޓާ އެކު، އޮޑިން ވެސް ވަނީ މުބާރާތުގެ ސެމީ ފައިނަލްގެ ޖާގަ ހޯދައިފަ އެވެ. އެ ޓީމަށް ދެން އޮތީ މާޒިޔާ ސްޕޯޓްސް އެންޑް ރެކްރިއޭޝަންއާ ދެކޮޅަށް ކުޅޭ މެޗެވެ. އެއް ވަނައިގައި މާޒިޔާ އޮތީ މިހާތަނަށް ކުޅެފައިވާ ތިން މެޗުން ވެސް މޮޅުވެ ނުވަ ޕޮއިންޓާ އެކު އެވެ.