ރާއްޖެ މިއަދު މިއޮތް އަނދިރިކަމުން އަރަގައިތުމަށް ރައީސް މުއިއްޒުގެ ވެރިކަން ނިމުމަކަށް ގެނައުމަކީ ގައުމީ ވާޖިބެއް: ބިގޭ
ރައީސް މުއިއްޒުގެ ވެރިކަން ނިމުމަކަސް ގެނައުމަކީ ދިވެހި ކޮންމެ ރައްޔިތެއްގެ ވެސް ގައުމީ ވާޖިބަކަށް ވެއްޖެ
މަޖިލީހުގެ ކުރީގެ މެމްބަރު މުހައްމަދު ރަޝީދު ހުސައިން (ބިގޭ)
ދިވެހިރާއްޖެއަށް މިއަދު ވެރިވެފައި މިއޮތް ކަޅު އަނދިރި ނާމާންކަން ނިމުމަކަށް ގެނައުމަށާއި ގައުމު ހަމަމަގަށް އެޅުވުމަށް މިހާރު މިއޮތް ރައީސް ޑރ. މުހައްމަދު މުއިއްޒުގެ ވެރިކަން ނިމުމަކަށް ގެނައުމަކީ ކޮންމެ ދިވެހި ރައްޔިތެއްގެވެސް ގައުމީ ވާޖިބެއް ކަމަށް އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.
ބިގޭ މިފަދައިން ވިދާޅުވެފައި ވަނީ ދިވެހިރާއްޖޭގައި ފަނޑިޔާރުންނަށް ނުލިބުނު އިންސާފެއް އެއްވެސް ރައްޔިތަކަށް ނުލިބޭނެ ކަމަށް ބުނެ އެމްޑީޕީން ބުދަ ދުވަހު ކުރިއަށް ގެންދިއަ އިހުތިޖާޖަށް ފަހު ރާއްޖެ އެމްވީއަށް ދެއްވި ބަސްދީގަތުމެއްގައެވެ.
ސުޕްރީމް ކޯޓުގެ ފަނޑިޔާރު އަޒްމިރަލްދާ ޒާހިރު އާއި މަހާޒް އަލީ ޒާހިރު ވަކި ކުރަން ރައްޔިތުންގެ މަޖިލީހުން މިއަދު ވަނީ ފާސްކޮށްފައެވެ.
ބުދަ ދުވަހު ކުރިއަށް ގެންދިޔަ މަޖިލީހުގެ ޖަލްސާގައި ފަނޑިޔާރު އަޒްމިރަލްދާ އާއި މަހާޒު ވަކިކުރަން ފެންނަ ކަމަށް 68 މެންބަރަކު ވޯޓު ދެއްވިއެވެ. އަދި ނުފެންނަ ކަމަށް ވޯޓު ދެއްވީ 11 މެންބަރުންނެވެ. އެހެންކަމުން ސުޕްރީމް ކޯޓުގެ ފަނޑިޔާރުންގެ މަގާމުން އެ ދެ ބޭފުޅުން ވަނީ ވަކިވެފައެވެ.
މިކަމާއި ގުޅުވައި ރާއްޖެ އެމްވީއާއި ވާހަކަދައްކަވަމުން ބިގޭ ވިދާޅުވީ މިއަދަކީ ދިވެހި ރައްޔިތުންނަށް ކަޅުއަނދިރި ދުވަހެއް ކަމަށާއި އެތައް ޒަމާނަކުން ދިވެހިރައްޔިތުން ކުރި ބުރަމަސައްކަތުން ވަކިކޮށްފައި ވާ ބާރުތައް އެއްކޮށް މިހާރުގެ ރައީސް މުއިއްޒުގެ މުށުތެރެއަށް ލައިފިކަމަށެވެ.
ބިގޭ ވިދާޅުވީ މިއަދަކީ ދިވެހީންނަށް ކަޅުދުވަހަކަށް ވެގެން ދިއައީ މަޖިލީހުގެ މެމްބަރުންގެ އަނގައިގައި ތަޅު އަޅުވައި ހުރިހާ ބާރުތަކެއް ނެންގެވުމުން ނުރަނގަޅު އަސަރުތައް ކުރިއަށް އޮތްތަނުގައި ގައުމަށާއި ރައްޔިތުންނަށް ކުރަމުންދާނެތީ ކަމަށެވެ.
ބިގޭ ވިދާޅުވީ ރައީސް މުއިއްޒުގެ ބާރު މުށުތެރެއަށް ލުމަށް ފަނޑިޔާރުންގެ ބާރުތައް ކަނޑުވާލުމަށް އެކިގޮތްގޮތުން މަސައްކަތް ކުރަމުން އަންނަތާ ވަރަށް ގިނަ ދުވަސްތަކެއް ވެއްޖެ ކަމަށާއި އެގޮތުން މިއަދު އެކަން ވެސް ހާސިލްކޮށްފައިވާ ކަމަށެވެ.
އަދި ސްޕްރީމް ކޯޓުގައި މަސައްކަތް ކުރައްވަން ތިބި އިޚްލާސްތެރި ރަނގަޅު، އަދުލުއިންސާފަށް ލޯބިކުރާ ފަނޑިޔާރުންތައް ވަރަށް އިހާނެތިކޮށް ނެރެއެއްލާލައި ރައީސް މުއިއްޒު ބޭނުންފުޅުވާ ކޮރަޕްޓް ޕަޕެޓުންތަކެއް ސްޕްރީމްކޯޓަށް ލުމަށް ކުރި މަސައްކަތް މިއަދު ކާމިޔާބުކޮށްފައިވާ ކަމަށް ވެސް ބިގޭ ވިދާޅުވިއެވެ.
ބިގޭ ވިދާޅުވީ ގައުމު މިއަދު މިދަނީ ވަރަށް ނާމާން އަނދިރި މިސްރާބަކަށް ކަމަށާއި މި މިސްރާބުން ގައުމު ސަލާމަތް ކުރުމަށް މިހާރު މިއޮތް ރައީސް މުއިއްޒުގެ ވެރިކަން ނިމުމަކަށް ގެނައުމަކީ ރާއްޖޭގެ ރައްޔިތުންނަށް މިއަދު ގައުމީ ވާޖިބަކަށް ވެފައިވާ ކަމަށެވެ.
ރާއްޖޭގެ މިސްރާބު މިހާރު މިހުރީ ވަރަށް ނާމާން މިސްރާބަކަށް ޖަހާފަ. ވަރަށް ނުރަނގަޅު މިސްރާބަކަށް ރާއްޖެ މިދަނީ. އެހެން މި ދެންނެވީ ރާއްޖެއާއި ދޭތެރޭގައި ރަނގަޅު ނިޔަތެއްގައި ވިސްނާނެ، ޚާއްސަކޮށް މިހާރު މިއޮތް އިގްތިސާދީ ހާލަތުން އަރައިގަތުމަށް އެކަމުގައި މަދަދުވެރިކަން ހޯދަން ތިބި ފަރާތްތަކަށް އިތުބާރު މިހާރު މިވަނީ ގެއްލިފަ. ފަނޑިޔާރުގެ ނުލިބުމަކީ ކުރިއަށް އޮތް ތަނުގައި އެއްވެސް ބޭފުޅަކަށް އިންސާފު ގާއިމު ނުވާނެކަން ކަށަވަރުވެގެން ދިއަ ކަމެއް.އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ)
ބިގޭ އިތުރަށް ވިދާޅުވީ މިވަގުތު ރާއްޖޭގައި ކުރަމުން އަންނަ ވިޔަފާރިތަކުގައާއި ރާއްޖޭއިން ބޭރުން އަން އިންވެސްޓަރުންނަށް ރާއްޖެއާއި މެދު އޮންނަ އިތުބާރު ގެއްލިގެން ދިއުމަކީ ރާއްޖެ މިހާރު މިއޮތް އިގްތިސާދީ އަދަވަޅުން އަރައިގަތުމައްޓަކައި އެޅީގެން ދިއަ ހުރަހެއް ކަމަށެވެ.
ބިގޭ ވިދާޅުވީ ސްޕްރީމް ކޯޓުގެ ދެ ފަނޑިޔާރަކު އަނިޔާވެރިކޮށް މަގާމުން ވަކިކުރެވިގެން ދިއުމަކީ މުޅި ދިވެހި ރައްޔިތުންނަށް ވެސް ލިބިގެން ދިއަ ބޮޑު ހިތާމައެއް ކަމަށެވެ. އަދި މިހާރު މި ގައުމު އޮތް ހާލަތުން ރަނގަޅު މިސްރާބަކަށް އަނބުރާލުމަކީ ވަރަށް ދަތިކަމަކަށް ވެގެންދާނެ ކަމުގައިވެސް އޭނާ ވިދާޅުވިއެވެ.
ފަނޑިޔާރު އަޒްމިރަލްދާ އާއި މަހާޒު ވަކި ކުރައްވާފައި މިވަނީ މިމައްސަލަ މަޑު ޖައްސާލުމަށް ކަމާގުޅުންހުރި ބޭރުގެ ލޯފާމްތަކާއި، އެކި ޖަމިއްޔާތަކުން ގޮވާލާފައިވާ ދަނޑިވަޅެއްގައެވެ. އަދި މި ދެ ފަނޑިޔާރުން ވަކިކުރަންޖެހޭ ގާނޫނީ ހުއްޖަތެއް ދެއްކިފައެއް ނެތް ކަމަށާއި، މިއީ ކޮންގެންވާނެ ކަމެއް ނޫން ކަމަށް ގިނަ ގާނޫނީ ވަކީލުން ވިދާޅުވެފައިވެއެވެ. މިމައްސަލަ ކުރިއަށް ދިޔަ ގޮތާ ގުޅޭގޮތުން ބާ ކައުންސިލްގެ ގިނަ ވަކީލުން ވެސް ކަންބޮޑުވުން ފާޅުކޮށްފައިވެއެވެ.
ޖޭއެސްސީއިން ސުޕްރީމް ކޯޓުގެ ފަނޑިޔާރުންތަކެއްގެ މައްސަލަ ކުއްލި ގޮތަކަށް ބަލަން ފެށީ ރައްޔިތުންގެ މަޖިލިހުގެ ގޮނޑި ގެއްލޭ ގޮތަށް ގާނޫނު އަސާސީއަށް ބަދަލު ގެނައި މައްސަލަ ސުޕްރީމް ކޯޓުން ކުރިއަށް ގެންދަން ނިންމާފައި ވަނިކޮށެވެ.
