ފުލިދޫ ކައުންސިލް އިމާރާތުގެ ހާލަތު ގޯސްވެ ސަރުކާރުން އަޅާ ނުލުމުން އެ އިދާރާގެ ބިން ކުއްޔަންދޭން ނިންމައިފި
ބިން ކުއްޔަށް ދިނުމަށް ނިންމި ނަމަވެސް އެކަން ކުރާނީ ދިރާސާއެއް ހެދުމަށްފަހުގައި
ވ. ފުލިދޫ ކައުންސިލް އިދާރާގެ ހާލަތު
ވ. ފުލިދޫ ކައުންސިލް އިދާރާގެ އިމާރާތުގެ ހާލަތު ގޯސްވެ ސަރުކާރުން އެކަމާއި އަޅާ ނުލުމުން އެ އިދާރާގެ ބިން ކުއްޔަންދޭން ނިންމައިފިއެވެ.
މިގޮތަށް ނިންމާފައިވަނީ ފުލިދޫ ކައުންސިލްގެ ހަތަރުވަނަ ދައުރުގެ 2025 ވަނަ އަހަރުގެ 11 ވަނަ އާންމު ޖަލްސާއިންނެވެ. އެގޮތުން ޖަލްސާއަށް ހުށަހެޅީ ކައުންސިލުން ކަނޑައަޅާ ޝަރުތުތަކާއި އެއްގޮތަށް ކައުންސިލް އިދާރާގެ ބިން ބަޔަކަށް ކުއްޔަށް ދިނުމަށެވެ. އެގޮތުން މި ނިންމުން ފާސްކޮށްފައިވަނީ އާންމު ޖަލްސާގައި ބައިވެރިވެވަޑައިގެންނެވި ކައުންސިލްގެ 5 މެންބަރުންގެ އިއްތިފާގުންނެވެ.
މިކަމާއި ގުޅޭގޮތުން ރާއްޖެއެމްވީއަށް މައުލޫމާތު ދެއްވަމުން ފުލިދޫ ކައުންސިލްގެ ރައީސް މުހައްމަދު އިމްތިޔާޒް ވިދާޅުވީ ބައްދަލުވުމުގައި ބިން ކުއްޔަން ދިނުމަށް ނިންމި ނަމަވެސް އެކަމާއި ގުޅޭ ފީސިބިލިޓީ ސްޓަޑީއެއް ހަދައި، ރަށުގެ ވިޔަފާރިއަށް ގެއްލުން ނުވާނެ ގޮތަން ކަންކަން ކުރިއަށް ގެންދާނެ ކަމަށެވެ.
އޭނާ ވިދާޅުވީ ކައުންސިލް އިދާރާ ބާވެ ބޭނުން ނުކުރެވޭތީ ތަފާތު އެކި ފަހަރުމަތިން އެ ވާހަކަ ސަރުކާރުތަކުގައި ދެކެވިއްޖެ ކަމަށެވެ. ނަމަވެސް ކައުންސިލް އިދާރާތައް ތަރައްގީކުރާ ލިސްޓުގައި ފުލިދޫގެ ނަމެއް ނެތް ކަމަށެވެ. އަދި ފުލިދޫ އަކީ ބިމުގެ ޖާގައިގެ ގޮތުން ކުޑަ ރަށަކަށްވުމުން، ކައުންސިލުން އެދިފައިވާނީ އެއް ބިމެއްގައި ކައުންސިލް އިދާރާއާއި ކޯޓު އަދި ސަރުކާރުގެ އެހެނިހެން މުވައްސަސާތައް ހިމެނޭ ގޮތަށް އެއް އިމާރާތް އަޅައި ދިނުމަށް ކަމަށެވެ.
ނަމަވެސް މިހާތަނަށް އައި އިރު އެކަމާއި ގުޅޭ ޖަވާބެއް ދީފައި ނުވާއިރު، މިއަހަރު ކައުންސިލް އިދާރާތައް އަޅާ ލިސްޓުގައި ވެސް ފުލިދޫ ނުހިމެނޭ ކަމަށެވެ. އިމްތިޔާޒް ވިދާޅުވީ ކައުންސިލް އިދާރާ އިމާރާތް ހުންނާނެ ގޮތް ކައުންސިލުން އެދުމުން ސީދާ އެކަމަށް ޖަވާބެއް ދީފައި ނުވިނަމަވެސް ކައުންސިލް މިނިސްޓަރ އާދަމް ޝަރީފް އުމަރުއާއި އެވާހަކަ ހިއްސާކުރެއްވުމުން އެ ހިޔާލު ރަނގަޅުކަމަށް ވެސް ވިދާޅުވި ކަމަށެވެ.
އިމްތިޔާޒް ވިދާޅުވީ ކައުންސިލް އިދާރާގެ ހާލަތު ހުރި ގޮތުން އިމާރާތުގެ ތެރޭގައި މުވައްޒަފުންނަށް މަސައްކަތްވެސް ކުރެވެން ނުތިބެވޭ ކަމަށެވެ. އެހެންކަމުން ބިން ކުއްޔަށްދޭއިރު މި ހުރިހާ ކަމަކަށްވެސް ރިއާޔަތްކުރާނެ ކަމަށެވެ.
200 އަށްވުރެ ގިނަ ގެސްޓް ރޫމް ހުންނަ ފުލިދޫއިން މިދިޔަ އަހަރު 9 ލައްކައަށްވުރެ ގިނަ ރުފިޔާ ދައުލަތަށް ދެއްކިއެވެ. ގިނަ އަދަދެއްގެ ގެސްޓް ހައުސް ހިންގާ ރަށަކަށްވެފައި، ސަރުކާރުން ފޯރުކޮށްދޭންޖެހޭ ޒަރޫރީ ހިދުމަތްތައް ނުލިބޭތީ ގެސްޓް ހައުސްތަކުން އަންނަނީ ކަންބޮޑުވުން ފާޅުކުރަމުންނެވެ.
އަދި މި މައްސަލަތަކާއި ގުޅިގެން ގެސްޓްހައުސްތަކުންނާއި ވިޔަފާރިތަކުން މުޒާހަރާކުރުމަށް ދަނީ ތައްޔާރުވަމުންނެވެ. ވިޔަފާރިވެރިން ބުނެފައިވަނީ ފުލިދޫގެ ތަރައްގީއަށް އަޅާނުލާ ކަމަށާއި، 2023 ވަނަ އަހަރު އެމްޓީސީސީ އާއި ހަވާލުކުރި ބަނދަރު ޕްރޮޖެކްޓްވެސް އަދި ވެސް ނުފެށޭ ކަމަށެވެ.
މިހާތަނަށް ފުލިދޫގައި ސަރުކާރަކުން ކުރިއަށްގެންދިޔަ އެންމެ ބޮޑު ޕްރޮޖެކްޓް ހިންގާފައިވަނީ އެމްޑީޕީ ސަރުކާގައެވެ. އެއީ އެރަށުގެ ގޮނޑުދޮށް ހިމާޔަތްކުރުމުގެ މަޝްރޫއެވެ.
