2025 އެޕްރީލް 18 ވަނަ ދުވަހު މާލޭގައި ހިނގި ހާދިސާ ތަޙުޤީޤުކުރުމަށް، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އުފެއްދެވި ކޮމިޝަނަށް އިތުބާރުނުކުރާ ކަމަށް އާއިލާއިން ބުނެފި އެވެ.

ދުލެއް ނުކުރާނަން މިނަމުގައު ހައްވާ ޔުމްނު ރަޝީދަށް އިންސާފް ހޯދުމަށް ކުރިއަށްގެންދާ އިހްތިޖާޖުގައި އަންގާރަ ދުވަހުގެ ރޭ ޓުވިޓާގައި ބޭއްވި ޓިޖިޓަލް ޕްރޮޓެސްްގައި އާއިލާގެ ފަރާތުން އިއްވި މެސެޖުގައި ބުނެފައިވަނީ އެ ކޮމިޝަން މެދުވެރިކޮށް ޔުމްނުއަށް އިންސާފު ލިބިދާނެ ކަމަށް ގަބޫލު ނުކުރެވޭ ކަމަށާއި މިކަމުގައި އާއިލާއާއި އެއްވެސް ވަރަކަށް މަޝްވަރާވެސް ކޮށްފައިނުވާ ކަމަށެވެ.

ޔުމްނުގެ އާއިލާގެ ފަރާތުން މުހައްމަދު މުއުމިން އެކްސްގައި ބުނެފައިވަނީ ޔުމްނުގެ ޢާއިލާއިން، ރައީސް މުއިއްޒުގެ ކޮމިޝަނަށް ތާއީދެއް ނުކުރާ ކަމަށާއި އެކޮމިޝަނަށް އާއިލާއިން އިތުބާރުވެސް ނުކުރާ ކަމަށެވެ.

އަދި އިންސާފު ހޯދަން މި ކުރަމުންދާ މަސައްކަތުގައި ދެމިތިބޭނެ ކަމަށްވެސް އޭނާ ވަނީ ބުނެފައެވެ.

ޔުމްނުގެ މައްސަލަ ތަހުގީގު ކުރަން އުފެއްދި ފަސް މެންބަރުންގެ ރިޔާސީ ކޮމިޝަނުގެ ރައީސްއަކީ ކުރީގެ ބަންޑާރަނައިބު ޑރ. މުހައްމަދު މުނައްވަރެވެ. އޭނާގެ އިތުރުން ދެން އެ ކޮމިޝަނުގައި ހިމެނެނީ ބްރިގޭޑިއާ ޖެނެރަލް ރިޓަޔާޑް އަހުމަދު މުހައްމަދާއި މެޑިކަލް ޑޮކްޓަރެއް ކަމަށްވާ މޫސާ މުރާދާއި ކްލިނިކަލް ނަރުހެއް ކަމަށްވާ ޖަބީން މުހައްމަދާއި ފެމިލީ ޕްރޮޓެކްޝަން އޮތޯރިޓީގެ އިސް ވެރިއެއް ކަމަށްވާ އައިމިނަތު އީނާސް އެވެ.

ނަމަވެސް މިކޮމިޝަނަށް އިތުބާރުނުކުރާ ކަމަށް ދުލެއް ނުކުރާނަން އިހްތިޖާޖުގެ ބައިވެރިންވެސް ވަނީ ބުނެފައެވެ.