18 ވަނަ ދުވަހުގެ ރޭ ހ. ފެންޓޮނޯއީގެއިން މަރިޔަމް ޔުމްނު ރަޝީދު ވެއްޓުނު ހާދިސާ ތަހުގީގުކުރުމަށް ރައީސް އުފެއްދެވި "2025 އެޕްރީލު 18 ވަނަ ދުވަހު މާލޭގައި ހިނގި ހާދިސާ ތަޙުޤީޤުކުރާ، ރައީސުލްޖުމްހޫރިއްޔާގެ ޚާއްޞަ ކޮމިޝަން" އެކުލެވިގެންވާ ގޮތަށް ބަދަލު ގެނެސް ކޮމިޝަންގެ މެންބަރުންގެ އަދަދު 5ށް ބަދަލުކޮށްފިއެވެ.

ކުރިން މި ކޮމިޝަނުގައި ތިބީ 3 މެންބަރުންނެވެ. އެއީ ޑރ. މުޙައްމަދު މުނައްވަރު، ބްރިގޭޑިއަރ ޖެނެރަލް ރިޓަޔަޑް އަޙްމަދު މުޙައްމަދު އަދި ޑރ. މުހައްމަދު ހަބީބުއެވެ. ނަމަވެސް ޔުމްނު ވައްޓާލުގައި ބައިވެރިވުމެއް އޮތްކަމަށް ތުހުމަތުކުރެވިފައިވާ ރައުދު އަހުމަދު ޒިލާލު އާއި އާއިލީ ގުޅުން އޮންނާތީ ހަބީބު ވަނީ ކޮމިޝަނުން އިސްތިއުފާ ދެއްވާފައެވެ.

ކޮމިޝަނަށް ބަދަލުގެނައިކަން ހާމަކޮށް ރައީސް އޮފީހުން ބުނީ 2025 އެޕްރީލު 18 ވަނަ ދުވަހު މާލޭގެ ގެއެއްގެ ފުރާޅުމަތީގައި ދިވެހި ޒުވާނަކު ވެއްޓިފައި އޮއްވައި ފެނުނު މައްސަލަ ބަލައި، އެ މައްސަލައާ ގުޅިގެން މިނިވަން، މުސްތަޤިއްލު އަދި އިތުބާރު ހިފޭ ތަޙުޤީޤެއްކޮށް، އެ ހާދިސާގެ ޙަޤީޤަތް ހޯދައި، އެ ހާދިސާއާ ގުޅިގެން ކަމާބެހޭ މުއައްސަސާތަކުން މިހައިތަނަށް ކޮށްފައިވާ މަސައްކަތްތަކަކީ ކޮބައިކަން ބެލުމަށާއި، އެ މައްސަލައާއި ގުޅިގެން އަޅަންޖެހޭ ފިޔަވަޅުތައް އަޅައި، އެ މައްސަލައިގައި ކަންހިނގައިފައިވާގޮތް އިންސާފުވެރިކަމާއި ޢަދުލުވެރިކަމާއެކީ ތަޙުޤީޤުކޮށް، ލަފާ ދިނުމަށް ޓަކައި، 27 އެޕްރިލް 2025 ގައި އުފެއްދެވި ކޮމިޝަނަށް، ރައީސުލްޖުމްހޫރިއްޔާ ބަދަލުގެންނަވާފައިވާ ކަމަށެވެ.

ކޮމިޝަންގެ ރިޔާސަތު ބަލަހައްޓަވާނީ ޑޮކްޓަރ މުޙައްމަދު މުނައްވަރެވެ. ގަރާރު ނެރުއްވީ ހޯމަ ދުވަހު މެލޭޝިއާގެ ކުއަލާލަމްޕޫރުގައި ހުންނަވައެވެ.

މި ކޮމިޝަނަކީ، ކޮމިޝަނާ މަތިކުރެވޭ މަސައްކަތްތައް ފުރިހަމަވެއްޖެކަމަށް ރައީސުލްޖުމްހޫރިއްޔާ ކަނޑައެޅުމާ ހަމަޔަށް ދެމިއޮންނާނޭ ކޮމިޝަނެއްކަމުގައި ރައީސުލްޖުމްހޫރިއްޔާގެ ޤަރާރު ނަންބަރު 11/2025 ބަޔާންކޮށްފައިވެއެވެ.