ޔުމްނުގެ މައްސަލަ ބަލާ ކޮމިޝަނަށް އައްޔަން ކުރި ހަބީބުއާއި ރައުދު އާއި އާއިލީ ގުޅުން އޮވޭ، އިސްތިއުފާ ދީފި
ޔުމްނު ވެއްޓުނު މައްސަލަ ބަލަން ކޮމިޝަން އުފެއްދީ ރައުދުގެ ވަނަވަރު ހާމަކޮށްފައި އޮއްވާ
ޔުމްނު ވެއްޓުނު ހާދިސާ ތަހުގީގުކުރާ ކޮމިޝަނަށް ރައީސް އައްޔަންކުރެއްވި ހަބީބު އާއި އެ މައްސަލައިގައި ތުހުމަތުކުރާ ރައުދު އާއި އާއިލީ ގުޅުން އޮވޭ
މި މަހުގެ 18 ވަނަ ދުވަހުގެ ރޭ އިމާރާތެއްގެ މައްޗަށް ވެއްޓިފައި އޮއްވާ ފެނުނު ހައްވާ ޔުމްނު ރަޝީދުގެ މައްސަލަ ބަލާ ކޮމިޝަނަށް އައްޔަން ކުރި ހަބީބުއާއި ޔުމްނާ ވެއްޓުމުގައި ބައިވެރިކަމަށް ތުހުމަތުކުރެވިފައިވާ ރައުދު އަހުމަދު ޒިލާލު އާއި އާއިލީ ގުޅުން އޮންނަކަން ހާމަވެއްޖެއެވެ.
ރާއްޖެއެމްވީއަށް އިތުބާރު ހުރި ފަރާތަކުން ބުނެފައިވަނީ ހަބީބު އިސްތިއުފާ ދެއްވީ ރައުދުއާއި އޭނައާއި އާއިލީ ގޮތުން ގުޅުން އޮންނާތީއެވެ. އަދި އިސްތިއުފާ ދެއްވައި އެކަން އޭނާ ވަނީ ރައީސް އޮފީހަށް އަންގާފައެވެ. ނަމަވެސް ރައީސް އޮފީހުން މިކަމާއި ގުޅޭ އެއްވެސް ވާހަކައެއް ހާމަކޮށްފައި ނުވެއެވެ.
ރައުދުއާއި ހަބީބު އާއި އާއިލީ ގުޅުން އޮންނަނީ ރައުދުގެ މަންމަގެ ފަރާތުންނެވެ.
ޔުމްނު ވެއްޓުނު މައްސަލަ ބަލަން ރައީސް ޑރ. މުހައްމަދު މުއިއްޒު "2025 އެޕްރީލް 18 ވަނަ ދުވަހު މާލޭގައި ހިނގި ހާދިސާ ތަޙުޤީޤުކުރާ، ރައީސުލްޖުމްހޫރިއްޔާގެ ޚާއްޞަ ކޮމިޝަން" އުފެއްދެވީ 27 ވަނަ ދުވަހުއެވެ. އަދި އެ ކޮމިޝަންގައި ތިން މެންބަރަކު ތިއްބަވާގޮތަށް ހަމަޖައްސައި ކަށީގެ ހާއްސަ ޑޮކްޓަރު މުހައްމަދު ހަބީބުއަށް އެ ދައުވަތު ދިނުމުން އޭނާ ވަނީ އެ ދައުވަތު ގަބޫލުކުރައްވާފައެވެ.
ނަމަވެސް ރައުދު ހިމެނޭ މައްސަލައެއް ބެލުމަށް އެކުލަވާލި ކޮމިޓީގައި ހަބީބު އިންނަވަން ފުރަތަމަ އެއްބަސްވެވަޑައިގެންނެވި ސަބަބެއް އޭނާ ހާމައެއް ނުކުރައްވައެވެ. އަދި އިސްތިއުފާ ދެއްވި ނަމަވެސް އެކަމުގެ ތަފްސީލެއްވެސް ހާމައެއް ނުކުރައްވައެވެ.
ޔުމްނު ވެއްޓުނު މައްސަލަ ބަލަން ރައީސް ކޮމިޝަނެއް އެކުލަވާލައްވާ ކޮމިޝަނަށް ހަބީބު އައްޔަން ކުރެއްވި އިރު، ޔުމްނު ވެއްޓުނު ހާދިސާގައި އޭނާއެކު ހ. ފެންޓެނޯއީ ގޭގައި ހަރަކާތްތެރިވީ ހަބީބާއި އާއިލީ ގުޅުން އޮންނަ ރައުދު އަހުމަދު ޒިލާލުކަން އޮތީ ހާމަވެފައެވެ. އަދި ކޮމިޝަނެއް އެކުލަވާލީ ވެސް މި މައްސަލައިގައި ރައުދުގެ ވަނަވަރު ފުލުހުން އާންމުކޮށް، އޭނާ ހައްޔަރު ކުރި ފަހުންނެވެ. އެހެންކަމުން ހަބީބު ކޮމިޝަނުގައި އިންނަވަން އެއްބަސްވެވަޑައިގެންނެވުމަށްފަހު އޭގެ 2 ދުވަސް ފަހުން ކޮމިޝަނުން އިސްތިއުފާ ދެއްވުމުން އާންމުންގެ އެތައް ސުވާލެއް ވަނީ ފެންމަތިވެފައެވެ.
ރައީސުލްޖުމްހޫރިއްޔާގެ ގަރާރުގެ ދަށުން އެކުލަވާލި ކޮމިޓީގައި ހަބީބުގެ އިތުރުން ދެން ހިމެނިވަޑައިގަންނަވަނީ ރާއްޖެއިން ގެއްލުނު ކަނަޑުގެ ބައި ހޯދުމުގައި މީގެ ކުރިން އިސްކޮށް ހަރަކާތްތެރިވި ޑރ. މުހައްމަދު މުނައްވަރާއި، ސިފައިންގެ ޖެނެރަލުންގެ ތެރެއިން ރިޓަޔަރވެވަޑައިގެން ހުންނެވި ބްރިގޭޑިއަރ ޖެނެރަލް ރިޓަޔަރޑް އަހުމަދު މުހައްމަދެވެ.
ހ. ފެންޓެނޯއީ ގޭގެ މަތިން ފުރާޅު މައްޗަށް ވެއްޓުނު 21 އަހަރުގެ ހައްވާ ޔުމްނު ރަޝީދު އާއި އެކު އުޅުނު، ރައުދު އަހުމަދު ޒިލާލު ކޯޓް އަމުރެއްގެ ދަށުން ހައްޔަރުކުރީ 24 އެޕްރީލް ވި ބުރާސްފަތި ދުވަހުގެ އިރު އޮއްސި 6:20 ގައެވެ. އޭނާގެ މައްޗަށް ކުރެވޭ ތުހުމަތުތަކުގެ ތެރޭގައި ހާދިސާ ހިނގިއިރު މަސްތުގެ ހާލަތުގައި ހުރުމާއި، ޔުމްނު ވެއްޓުމުގައި އޭނާގެ ބައިވެރިވުމެއް ވުމާއި، ޖިންސީ ބޭނުންހިފުމުގެ ކުށަށް އަރައިގަތުމެވެ.
މީގެ އިތުރުން ރައުދު އަހްމަދު ޒިލާލް އާއި ވެއްޓުނު 21 އަހަރުގެ އަންހެން މީހާ ހިމެނޭހެން ޖުމްލަ 9 މީހެއްގެ ފޯނު ވަނީ ކޯޓް އަމުރެއްގެ ދަށުން ހިފަހައްޓާފައެވެ.
އަދި މިމައްސަލައާއި ގުޅިގެން މާންދޫގޭ ދެކުނުގެ ޓެރަސްއާއި ދެވަނަ އަދި 4 ވަނަ ފަންގިފިލާގެ އިތުރުން ކަށިވެލި 3 ވަނަ ފަންގިފިލާވަނީ ބަލާ ފާސްކޮށްފައެވެ. މިތަންތަން ބަލާ ފާސްކޮށް ފުލުހުންގެ ބެލުމުގެ ދަށަށް އެއްޗެއް ގެންދިޔަ ކަމެއް ފުލުހުން ހާމަކޮށްފައެއް ނުވެއެވެ.
ޔުމްނު ފުރާޅު މައްޗަށް ވެއްޓިފައި އޮއްވާ ފެނުނީ 18 އޭޕްރީލް 2025 ވަނަ ދުވަހުގެ ހެނދުނުގެ ވަގުތެއްގައެވެ. މިމައްސަލަ ފުލުހުން ދަނީ ތަހްގީގު ކުރަމުންނެއެވެ. އަދި މި މައްސަލައިގައި ފުލުހުން ވަކިގޮތަކަށް އަމަލުކުރަމުން އަންނަ އިރު، މި މައްސަލައިގައި އެކަށީގެންވާ ތަހުގީގެއް ފުލުހުން ނުކޮށް މައްސަލަ ފޮރުވަން މަސައްކަތް ކުރާތީ ޑިމާންޑްތަކާއެކު ޒުވާނުން އަންނަނީ ކޮންމެ ރެއަކު މާލޭގައި މުޒާހަރާކުރަމުންނެވެ.
