ކުޑަކަމުދާތަކެތި ދިނުމަށް ގާނޫނީ ގޮތުން އަންގާ އެންގުމަށް އިންކާރުކޮށްފި ނަމަ އެކަން ވަކި މައްސަލައެއްގެ ގޮތުގައި ބެލުމަށް ފުލުހުންނަށް އަންގާފައިވާނެ ކަމަށް ޕްރޮސެކިއުޓާ ޖެނެރަލްގެ އޮފީހުން ބުނެފި އެވެ.

ޕީޖީ އިން މިފަދައިން އަންގާފައި ވަނީ އުސް އިމާރާތެއްގެ މަތިން ވެއްޓި އަނިޔާވި ހައްވާ ޔުމްނު ރަޝީދުގެ މައްސަލަައިގައި ހިމެނެ ބަޔަކު ފުލުހުންނަށް ކުޑަކަމުދާތަކެތި ދޭން އިންކާރު ކުރުމުން ވެސް ފިޔަވަޅެއް އަޅާފައިނުވާތީ އެކަމާއި ގުޅިގެން ނެރުނު ނޫސްބަޔާނެއްގައެވެ.

ޕީޖީ އޮފީހުން ނެރުނު ބަޔާނުގައި ބުނީ މި މައްސަލައިގެ ތަހުގީގަށް ހާޒިރުކުރި ބައެއް މީހުން، މަސްތުގެ ހާލަތުގައި ތިބިކަމަށް ތުހުމަތުކުރެވުނު ނަމަވެސް، އެމީހުންގެ ކުޑަކަމުދާތަކެތި ދިނުމަށް އިންކާރުކޮށްފައިވާކަމަށެވެ. އަދި އެ ފަރާތްތަކުގެ ކުޑަކަމުދާތަކެތި ނެގުމުގައި ގާނޫނީ ހުރަސްތަކެއް ކުރިމަތިވެފައިވާ ކަމަށް ނޫސްވެރިންގެ ބައްދަލުވުމުގައި ފުލުހުން ފާހަގަކޮށްފައިވާތީ، ގާނޫނީ އުސޫލުތަކުގެ ތެރެއިން މީހަކަށް ކުޑަކަމުދާތަކެތި ދޭން އަންގައި، އެތަކެތި ނުދީފިނަމަ، ކުޑަކަމުދާތަކެތި ދޭން އިންކާރުކުރުމުގެ މައްސަލައެއް ގޮތުގައި އެކަން ތަހުގީގު ކުރުމަށް އަންގާ ކަމަށެވެ.

އޭގެ އިތުރުން، ޔުމްނު މައްސަލަ ތަހުގީގު ކުރާ އެއްވެސް ފުލުހެއް އިހުމާލުވެފައިވޭތޯ ބަލައި އަޅަންޖެހޭ ފިޔަވަޅުތައް އެޅުމަށް ވެސް ޕީޖީ އޮފީހުން ވަނީ އަމުރުކޮށްފަ އެވެ.

އެގޮތުން މި މައްސަލަ ތަހުގީގު ކުރުމުގައި އެއްވެސް އޮފިސަރެއްގެ ފަރާތުން މިހާތަނަށް އެއްވެސް އިޙުމާލެއް އަދި އިޖުރާއަތްތަކާ ހިލާފު އަމަލެއް ކޮށްފައިވޭތޯ ބަލައި، އެކަމާ ގުޅިގެން އަޅަންޖެހޭ ފިޔަވަޅުތައް އެޅުމަށް ވެސް އަންގާފައިވާ ކަމަށް އެ ބަޔާނުގައިވެ އެވެ.

އަދި މީގެ އިތުރުން ޖިނާއީ ތަހުޤީޤަކާއި ގުޅިގެން މައުލޫމާތު ހާމަކުރުމުގައި ހަމަހަމަކަމާއި އެކު، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީން ފަރުދުންނަށް ކަށަވަރުކޮށްދީފައިވާ ހައްޤުތަކަށް އުނިކަން ނާންނާނޭ ފަދަގޮތަކަށް އަމަލުކުރުމަށާއި ޖިނާއީ ކުއްތަކާއި ގުޅިގެން މައުލޫމާތު އާންމުކުރުމުގައި އޮޅުންނާރާނެ ގޮތަށް ހާމަކަމާއި އެކު ފުރިހަމަ މައުލޫމާތު ފޯރުކޮށް ދިނުމަށާއި ތަހުޤީޤަށް ހުރަސް ނޭޅޭނެ ގޮތަށް މައުލޫމާތު ހާމަކުރުމަށް ވަނީ އަންގާފައެވެ.

ޔުމްނު ވެއްޓުނު ހާދިސާގައި މިހާތަނަށް ހައްޔަރު ކޮށްފައި ވަނީ އުމުރުން 21 އަހަރުގެ ރައުދު އަހުމަދު އެވެ. އެއީ ހ. ފެންޓެނޯއީގެ ނުވަ ވަނަ ފަންގިފިލާއިން ޔުމްނު ވެއްޓުނު އިރު އޭނާއާއެކު އުޅުނު މީހާ އެވެ. ރައުދު ހައްޔަރު ކުރީ ހާދިސާ ހިނގިތާ ހަ ދުވަސް ފަހުންނެވެ.

ފުލުހުން ރައުދު ހައްޔަރުކުރުމަށް ކޯޓުގައި އަމުރަކަށް އެދުނު އިރު ޔުމްނު ވެއްޓުމުގައި އޭނާގެ ބައިވެރިވުން އޮތް ކަމަށް ބެލެވޭ ކަމަށް ތުހުމަތުކޮށްފައިވެ އެވެ. އަދި ހާދިސާ ހިނގި ވަގުތު އޭނާގެ މަސްތުގެ ހާލަތުގައި ހުރުމާއި ޖިންސީ ބޭނުންހިފުމުގެ ކުށަށް އަރައިގަތުމުގެ ތުހުމަތު ވެސް ކޮށްފައިވެ އެވެ.

ހ. ފެންޓޯނިއާގެއާ ޖެހިގެން ހުރި ގުދަނެއްގެ ފުރާޅުމައްޗަށް ޔުމްނު ވެއްޓިފައި އޮއްވައި ފެނުނު މި މައްސަލައިގެ ތަހުގީގުގައި މިހާރު ވަނީ އޭނާއާ އެކު އެރޭ އުޅުނު ކަމަށް ބެލެވޭ މީހުން ދެނެގަނެ، އެ އެންމެންގެ ބަޔާން ނަގައި އެ މީހުންގެ ފުރުން މަނާކޮށްފަ އެވެ.

އަދި މައްސަލައާއި ގުޅުން ހުރި ނުވަ މީހެއްގެ ފޯނުވެސް މިހާރު ހިފަހައްޓާފައިވާ ކަމަށް ފުލުހުން ވަނީ ބުނެފައެވެ.