މިހާރު ކުރިއަށްދާ ޤައުމީ ވޮލީ ބޯޅަ ލީގުގައި ސިޓީ ފްރެންޑްސް ކުލަބާ ދެކޮޅަށް ކުޅުނު މެޗުން ވެސް މޮޅުވެ، ހުރާ ކޮމިއުނިޓީ ކުލަބުން ލީގުގެ ދެ ވަނަ މޮޅު ހޯދައިފި އެވެ.

ލީގުގައި ހުރާގެ ފުރަތަމަ މެޗުގައި ކުލަބު ވެމްކޯ އަތުން ބަލިވެފައި ވަނީ ތިން ސެޓު އެއް ސެޓުންނެވެ. ދެ ވަނަ މެޗުގައި ގުޑް ގޭމްސް ސްޕޯޓްސް އެކަޑަމީ އަތުން ބަލިވެފައި ވަނީ ފަސް ސެޓު ކުޅެގެންނެވެ.

ތިން ވަނަ މެޗުގައި ވަނީ ތިން ސެޓު އެއް ސެޓުން ފްލެކްސާ ސްޕޯޓްސް ކުލަބުގެ މައްޗަށް ކުރި ހޯދައިފަ އެވެ. ހަތަރު ވަނަ މެޗުގައި ޕޮލިސް ކުލަބުން އަތުން ބަލިވެފައި ވަނީ ތިން ސެޓު އެއް ސެޓުންނެވެ.

ލީގުގައި ހުކުރު ދުވަހުގެ ހަވީރު ޒުވާނުންގެ މަރުކަޒުގެ އެތެރޭ ކޯޓުގައި ކުޅުނު މެޗު ހުރާ އިން ކާމިޔާބު ކުރީ ސީދާ ތިން ސެޓުންނެވެ.

މެޗުގެ ސެޓުތައް ހުރާ އިން ކާމިޔާބު ކުރީ 25-18، 25-11 އަދި 25-13 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ ހުރާގެ ބިދޭސީ ކުޅުންތެރިޔާ ކްރިސްޓިއާނާ މެޑްވެޑެވާ އެވެ.

ލީގު ތާވަލްގެ ދެ ވަނަ މަގާމުގައި ހުރާ އޮތީ ހަތް ޕޮއިންޓާ އެކު އެވެ. އެއް ވަނައިގައި ޕޮލިސް ކުލަބު އޮތީ ނުވަ ޕޮޮއިންޓާ އެކު އެވެ. ހުރާ އިން ލީގުގައި ކުޅުނު ފަސް މެޗުގެ ތެރެއިން މޮޅުވެފައި ވަނީ ދެ މެޗުންނެވެ.