ގުޑް ގޭމްސް ބަލިކޮށް ވެމްކޯ އަށް ދެ ވަނަ މޮޅު

މިހާރު ކުރިއަށްދާ ޤައުމީ ވޮލީ ބޯޅަ ލީގުގައި ކުލަބު ވެމްކޯ އިން ކުޅުނު ތިން ވަނަ މެޗުގައި ގުޑް ގޭމްސް ސްޕޯޓްސް އެކަޑާމީގެ މައްޗަށް ކުރި ހޯދައިފި އެވެ.

ލީގުގައި ވެމްކޯގެ ފުރަތަމަ މެޗުގައި އެ ޓީމުން ވަނީ ހުރާ ކޮމިއުނިޓީ ކުލަބު އަތުން ތިން ސެޓު އެއް ސެޓުން މޮޅުވެފަ އެވެ. ދެ ވަނަ މެޗުގައި ފްލެކްސާ ސްޕޯޓްސް ކުލަބާ ވާދަކޮށް ވެމްކޯ ބަލިވެފައި ވަނީ ތިން ސެޓު އެއް ސެޓުންނެވެ.

ޒުވާނުންގެ މަރުކަޒުގެ އެތެރޭ ކޯޓުގައި ބުދަ ދުވަހުގެ ހަވީރު ކުޅުނު ތިން ވަނަ މެޗުގައި ވެމްކޯ އިން ވަނީ ގުޑް ގޭމްސް ސްޕޯޓްސް އެކަޑަމީގެ މައްޗަށް ސީދާ ތިން ސެޓުން ކުރި ހޯދައިފަ އެވެ.

މެޗުގެ ސެޓުތައް ވެމްކޯ އިން ކާމިޔާބު ކުރީ 25-15، 25-19 އަދި 25-22 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ ވެމްކޯގެ ބިދޭސީ ކުޅުންތެރިޔާ ޕަތިޔާ ޖުއާންޖަން އެވެ.

ލީގުގައި ވެމްކޯގެ ހަތަރު ވަަނަ މެޗުގައި ނިކުންނާނީ ސިޓީ ފްރެންޑްސްއާ ދެކޮޅަށެވެ.