ހޯމް މިނިސްޓަރު އާއި ސުވާލުކުރަން އެޖެންޑާ ކޮށްފައި އޮއްވާ ޖަލްސާއެއް ނެތްކަމަށް އަންގައިފި
20 އެޕްރީލު 2025 | އާދީއްތަ 14:48ޖަލްސާ ނެތްކަން އެންގީ އިހުސާނު އާއި ސުވާލުކުރަން އެޖެންޑާ ކުރި ކަމަށް އެންގުމަށްފަހު
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
ހޯމް މިނިސްޓަރު އަލީ އިހުސާނު އާއި ސުވާލުކުރަން އެޖެންޑާ ކޮށްފައި އޮއްވާ ރައްޔިތުންގެ މަޖިލީހުގެ ޖަލްސާ އެއް ހޯމަ ދުވަހު ނެތްކަމަށް އަންގައިފިއެވެ.
ރައްޔިތުންގެ މަޖިލީހުގެ ޖަލްސާ އެއް ކޮންމެ ހަފްތާއަކު ހޯމަ އަންގާރަ އަދި ބުދަ ދުވަހު އޮންނަންވާނެ ކަމަށް ގަވާއިދުގައި ބުނެއެވެ. މަޖިލީހުގެ ގަވާއިދުގެ 25 ވަނަ މާއްދާގައި ބުނެފައިވަނީ އަހަރުގެ ތެރޭގައި، މި ގަވާއިދާ އެއްގޮތްވާ ގޮތުގެ މަތިން، ކޮންމެ އަހަރަކު މަޖިލިސް ބައްދަލުވާނެ ދުވަސްތަކުގެ ކަލަންޑަރެއް، އެ އަހަރެއްގެ ފުރަތަމަ ދައުރުގެ ފުރަތަމަ ޖަލްސާ އޮންނަ ދުވަހު، އަމީން އާންމު ޝާއިރުކުރަންވާނެ ކަމަށެވެ.
ނަމަވެސް ހޯމަ ދުވަހުގެ ޖަލްސާއެއް ނޯންނާނެ ކަމަށް މަޖިލީހުގެ އިދާރާއިން ވަނީ މެންބަރުންނަށް އަންގާފައެވެ. މެންބަރުންނަށް ޖަލްސާއެއް ނޯންނާނެ ކަން އެންގި އިރު، ގަލޮޅު ދެކުނު ދާއިރާގެ މެމްބަރު ހޯމްލޭންޑް ސެކިއުރިޓީ މިނިސްޓަރު އާއި ސުވާލުކުރުމަށް މީގެ 4 މަސް ކުރިން ފޮނުވި ސުވާލު ހޯމަ ދުވަހަށް އެޖެންޑާ ކުރިކަމަށް އޭނާ އަށް ވަނީ އަންގާފައެވެ.
މީކާއިލް ސުވާލު ފޮނުއްވީ 14 ޖެނުއަރީ 2025 ގައެވެ. ވަޒީރުންނާއި ސުވާލު ކުރުމުގެ ނޯޓިސްގައި މީކާއިލް، ހޯމްލޭންޑް ސެކިއުރިޓީ މިނިސްޓަރު އަލީ އިހުސާނާއި ސުވާލުކުރުމަށް ފޮނުވާފައިވާ ނޯޓިސްގައިވަނީ "މިނިސްޓްރީ އޮފް ހޯމްލޭންޑް، ސެކިއުރިޓީ އެންޑް ޓެކްނޯލޮޖީގެ ދަށުން ހިންގަމުންދާ ޑިޕާޓްމަންޓް އޮފް ނެޝަނަލް ރަޖިސްޓޭޝަންގެ ޑޭޓާބޭސް ބޭނުންކޮށްގެން މީހުންގެ ޝަހުސު އޮޅުވާލާ، ޕީޕަލްސް ނެޝަނަލް ކޮންގްރެސް (ޕީއެންސީ) އަށް މެންބަރޝިޕް ފޯމު ފުރާފައިވާކަން ހާމަވެފައިވާ އިރު، މީހުންގެ ޒާތީ މައުލޫމާތު އިތުރަށް ރައްކާތެރިކުރުމަށް އަޅުއްވަނީ ކޮން ފިޔަވަޅެއްތޯ؟ އަދި ސައްހަ ނޫން ފޯމުތަކުގައި ހެކިންގެ ގޮތުގައި ސޮއިކޮށްފައިވާ އެ މިނިސްޓްރީ ގެ އިސްވެރިންނާ މެދު އެއްވެސް ފިޔަވަޅެއް އަޅުއްވާފައިވޭތޯ؟" އެވެ.
ސުވާލު އެޖެންޑާ ކުރި ޖަލްސާ ނުބާއްވާކަން އެންގުމުން، މިނިސްޓަރު އާއި ސުވާލުކުރަން ފޮނުވި ނޯޓިސްގެ ފޮޓޯއަކާއެކު އެކްސްގައި މީކާއިލް ވިދާޅުވީ އެއީ މީގެ 4 މަސް ކުރިން އޭނާ ހޯމް މިނިސްޓަރު އާއި ސުވާލުކުރަން ފޮނުވި ނޯޓިސް ކަމަށެވެ. ނޯޓިސްގެ މުއްދަތަކީ 14 ދުވަސް ކަމަށެވެ. 14 ދުވަސް ފަހަނައަޅާ 5 ވަނަ މަހާއި ގާތްވެފައި ވަނިކޮށް ހޯމަ ދުވަހަށް ސުވާލު އެޖެންޑާ ކޮށްފިކަމަށް އެންގުމަށްފަހު ދެން އެންގީ ހޯމަ ދުވަހު މަޖިލީހުގެ ޖަލްސާއެއް ނޯންނާނެ ކަމަށެވެ.
