ޕީއެންސީގެ މެންބަރު އިބްރާހިމް ހުސެއިންގެ ނުފޫޒުން ޓްރެފިކް ޕޮލިހަކަށް ފިޔަވަޅު އެޅިކަމުގެ ތުހުމަތު
މެންބަރު އިބްރާހިމް ހުސެއިން މަގުމަތިން ހެޑްސެޓް ޖަހައިގެން ސައިކަލު ދުއްވާފަދާތީ ނަސޭހަތް ދީފައިވޭ
ޓްރެފިކް ފުލުހުން މަގުމަތީގައި ހަރަކާތްތެރިވަނީ
ޕީއެންސީ ރައްޔިތުން މަޖިލީހުގެ މެންބަރެއްގެ ނުފޫޒުން ޖޫނިއަރ ޓްރެފިކް ޕޮލިހަކަށް ފިޔަވަޅު އެޅިކަމުގެ ތުހުމަތުކޮށްފިއެވެ.
ރާއްޖެއެމްވީއަށް އިތުބާރުހުރި ފަރާތަކުން ވިދާޅުވީ ފުވައްމުލަކު ދެކުނު ދާއިރާގެ މެންބަރު އިބްރާހިމް ހުސެއިން މަގުމަތިން ހެޑްސެޓް ޖަހައިގެން ސައިކަލު ދުއްވާފަދާތީ، ޓްރެފިކް ފުލުހެއް މެންބަރު ހުއްޓުވައި ނަސޭހަތް ދީފައިވާ ކަމަށެވެ. ނަސޭހަތް ދީފައިވާތީ، މެންބަރުގެ ނުފޫޒުން އެ ފުލުސް މީހާއާ މެދު ފިޔަވަޅު އަޅާފައިވާ ކަމަށް އިތުބާރު ހުރި ފަރާތަކުން މައުލޫމާތު ދީފައިވެއެވެ. އަދި ވިދާޅުވީ ނަސޭހަތް ދިނުމުން މެންބަރު އެކަމާ ނުރުހުންވެ އިންޒާރު އެ ވަގުތު ވެސް ދީފައިވާ ކަމަށެވެ.
މަގުމަތީގެ ޓްރެފިކް ބަލަހައްޓަން މަސައްކަތް ކުރި ނަމަވެސް އެމަސައްކަތުން އެކަހެރިކޮށްފައިވާއިރު، މިހާރު އެ ފުލުސް މީހާ ވަނީ ޓްރެފިކް މައްސަލަތައް ބަލާ ތަހުގީގު ކުރާ ބަޔަށް ބަދަލުކޮށްފައި ކަމަށް އެބޭފުޅާ ވިދާޅުވިއެވެ.
ފުވައްމުލަކު ދެކުނު ދާއިރާގެ މެންބަރު އިބްރާހިމް ހުސެއިންއަށް ކުރެވިފައިވާ މިތުހުމަތާ ގުޅިގެން މެންބަރުގެ ބަހެއް ވަނީ އަދި ލިބޭ ގޮތް ނުވެފައެވެ.
މި މައްސަލައާ ގުޅިގެން ރާއްޖެއެމްވީއަށް ފުލުހުން ބުނީ ޕްރޮފެޝަލަން ސްޓެންޑާޑް ކޮމާންޑުން ތަހުގީގު ކުރަމުން ގެންދާ މައްސަލައަކާ ގުޅިގެން ޓްރެފިކް ޕޮލިހުގައި މަސައްކަތް ކުރާ ފުލުހެއް ކުރިން އަދާކުރަމުން ގެންދިޔަ ޒިންމާތަކުން އެކަހެރިކޮށް، އެހެން ޒިންމާތަކެއް ހަވާލުކޮށްފައިވާ ކަަމަށެވެ.
ނަމަވެސް އެއީ މަތީގައި ދަންނަވާފައިވާ ފަދަ ކަމެއް ނޫންކަން މައުލޫމާތަށްޓަކައި ދަންނަވަން.ފުލުހުންގެ މީޑީއާ އޮފިޝަލް
ނަމަވެސް މެންބަރެއްގެ ނުފޫޒުން ކޮށްފައިވާ ކަމެއް ނޫން ކަަމަށް ފުލުހުން ބުނެއެވެ. އެ ތުހުމަތުތައް ފުލުހުން ވަނީ ދޮގު ކޮށްފައެވެ.
