އަސާސީ ބޭސް ނުލިބޭ މައްސަލަ : "ބޭސް ގެންނަން ހަވާލުކުރީ ރައީސް ވިދާޅުވާ، މެޑިކަލް މާފިއާ އާއި"
ބޭސް ގެނައުމަށް ދީފައިވާ މުއްދަތު އިތުރު އަހަރެއްހާ ދުވަހަށް ސަރުކާރުން ވަނީ އިތުރުކޮށްދީފަ
އެމްޑީޕީ ޕީޖީ ގްރޫޕުން ބޭއްވި ނޫސްވެރިންގެ ބައްދަލުވުން
ރާއްޖޭގެ ބޭސްފިހާރަތަކުން ބޭސް ލިބުން ދަތިވަނީ މެޑިކަލް މާފިއާގެ ސަބަބުން ކަމަށް ވިދާޅުވުމަށް ފަހު އެ މައްސަލަ ހައްލުކުރަން ބޭސް ގެންނަން ހަވާލުކުރީ ވެސް ރައީސް އެ ވިދާޅުވާ މެޑިކަލް މާފިއާ އާއި ކަމަށް ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު ހުސައިން ޒިޔާދު ވިދާޅުވެއްޖެއެވެ.
ޒިޔާދު އެފަދައިން ވިދާޅުވި އެމްޑީޕީ ޕީޖީ ގްރޫޕުން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުންނެވެ.
ރާއްޖޭގެ ބޭސްފިހާރަތަކުން ބޭސް ލިބުން ދަތިވެ އެތައް ބަޔަކު ތަކުލީފުތަކެއް އުފުލަން ޖެހުމުގައި ސަރުކާރުގެ އެއްވެސް ދައުރެއް ނެތް ކަމަށް ރައީސް ވަނީ ދ. މީދޫގައި ވާހަކަ ދައްކަވަމުން ވިދާޅުވެފައެވެ. ފެބްރުއަރީ 24، 2025 ވަނަ ދުވަހުގެ ރޭ ރައީސް ވިދާޅުވީ ބޭސް މަދުވެ ރާއްޖެ ބޭހަށް ޖެހުނީ އެ ވިޔަފާރި ކުރާ ފަރާތްތަކުން ދަތިކުރަން ފެށުމުން ކަމަށެވެ.
އެގޮތުން ބޭސް ލިބުމުގައި ދިމާވެގެން އުޅޭ ބޭހުގެ ދަތިކަމަކީ އެ ވިޔަފާރި ކުރާ އަމިއްލަ ވިޔަފާރިތަކުން ރާވައިގެން ކުރާ ކަމެއް ކަަމަށް ރައީސް ވިދާޅުވިއެވެ. އެއީ ރައްޔިތުންނަށް ދަތިކުރަން ކުރި ކަމެއްގެ ގޮތުގައި ރައީސް ވަނީ ސިފަކުރައްވާފަ އެވެ. އަދި ބޭހުގެ އަގު ކޮންޓްރޯލް ކުރުމަށް ސަރުކާރުން ނިންމި ނިންމުމުގެ ސަބަބުން "މެޑިކަލް މާފިއާ" އިން އެކަން ކުރާ ކަމަށް ވެސް ރައީސް ވަނީ އޭރު ވިދާޅުވެފައެވެ.
އެހެންނަމަވެސް އަސާސީ ބޭސް ނުލިބިގެން މަޖިލީހަށް ހުށަހެޅި ކުއްލި މައްސަލަ ވެސް ޕީއެންސީގެ މެޖޯރިޓީ އޮތް 20 ވަނަ މަޖިލީހުން ބަލައިގަނެފައި ނުވާކަން ޒިޔާދު ފާހަގަކުރެއްވިއެވެ. އަދި ރައީސް އެ ވިދާޅުވާ މެޑިކަލް މާފިޔާ އާއި ބޭސް ގެނައުމަށް އަނެއްކާވެސް އިތުރު އަހަރެއްހާ ދުވަހުގެ މުއްދަތަށް ހަވާލުކުރެއްވި ކަމަށް އޭނާ ވިދާޅުވިއެވެ. ބޭހުގެ މައްސަލަ ހައްލުކުރުމަށް ގެންނަ ބޭސް ލިބޭނެ ކަމަށް ސަރުކާރުން ހާމަ ކުރި ތާރީހަކީ 15 އޭޕްރިލް 2025ވާ އަންގާރަ ދުވަސް ކަމަށާއި އެކަމުގެ އަޕްޑޭޓެއް ސަރުކާރުން ދީފައި ނުވާ ކަމަށް އޭނާ ވިދާޅުވިއެވެ. އެހެންކަމުން މިހާރު އަސާސީ ބޭސް ލިބުމުގައި ދަތިވާން ޖެހެ ސަބަބެއް އޮވެގެން ނުވާނެ ކަމަށް އޭނާ ވިދާޅުވިއެވެ.
ރައީސް މުއިއްޒު ވަނީ މި މައްސަލަ ހައްލުކުރުމަށް ފިނޭންސްގެ އެހީތެރިކަމާއި އެކު އެސްޓީއޯ އިން މަސައްކަތް ކުރާ ކަމަށް ވިދާޅުވެފައެވެ. ނަމަވެސް ބޭހުގެ ސަޕްލައި ކޮންޓްރޯލް ކުރާ ކަމަށް ރައީސް ތުހުމަތުކުރައްވާ "މެޑިކަލް މާފިއާ" އަށް ބޭސް ގެނައުމަށް ދީފައިވާ މުއްދަތު އިތުރު އަހަރެއްހާ ދުވަހަށް ސަރުކާރުން ވަނީ އިތުރުކޮށްދީފައެވެ.
