ރައްޔިތުންގެ ކިބައިން ބޯހިޔާވަހިކަމުގެ ހައްގު ނިގުޅައިގަތުމުގައި ރައީސް މުއިއްޒަކީ ހިސްޓްރީއެއް އޮތް ބޭފުޅެއް: ތަޒްމީލް
ހައުސިން މިނިސްޓަރަކަށް ހުންނަވައި ވެސް ރައީސް މުއިއްޒު ވަނީ ރައްޔިތުން ބޯހިޔާވަހިކަމުގެ ހައްގުން މަހުރޫމްކޮށްފައި
ރައީސް އެންމެ ފަހުން ހއ. އަތޮޅަށް ކުރެއްވި ދަތުރުފުޅުގައި އުލިގަމުގައި - ފައިލް
ދިވެހި ރައްޔިތުންގެ ކިބައިން ބޯހިޔާވަހިކަމުގެ ހައްގު ނިގުޅައިގަތުމުގައި އަދުގެ ރައީސުލްޖުމްހޫރިއްޔާ ޑރ.މުހައްމަދު މުއިއްޒަކީ ހިސްޓްރީއެއް އޮތް ބޭފުޅެއް ކަމަށް އެމްޓީޑީސީގެ ކުރީގެ މެނޭޖިންގ ޑިރެކްޓަރ ތަޒްމީލް އަބްދުއްސަމަދު ވިދާޅުވެއްޖެ އެވެ.
ގެދޮރުވެރިޔާ ސްކީމުން ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުން ދޫކޮށްފައިވާ ފްލެޓުތަކަށް މިސަރުކާރުން ނުފޫޒު ފޯރުވާ ކަމަށް ބުނެ، މިސަރުކާރަށް ތަޒްމީލް ވަނީ ވަރަށް ބޮޑަށް ފާޑު ވިދާޅުވެފަ އެވެ.
މި މައްސަލައަށް އިޝާރާތް ކުރައްވައި ރާއްޖެޓީވީގެ ''ޓީވީޓޯކް ޕްރޮގްރާމް'' ގައި ތަޒްމީލް ވިދާޅުވީ، ރައްޔިތުން ހައްގުތަކުން މަހުރޫމް ކުރުމާއި، ޚާއްސަކޮށް، ބޯހިޔާވަހިކަމުގެ ހައްގު ނިގުޅައިގަތުމުގައި ރައީސް މުއިއްޒަކީ ހިސްޓްރީއެއް އޮތް ބޭފުޅެއް ކަމަށެވެ. އަދި ކުރީގެ ރައީސް އަބްދުﷲ ޔާމީންގެ ވެރިކަމުގައި ވެސް ހައުސިން މިނިސްޓަރަކަށް ހުންނަވައި ރައީސް މުއިއްޒު ކުރެއްވީ އެމަސައްކަތް ކަމަށް އޭނާ ވިދާޅުވި އެވެ.
ރައީސް މުއިއްޒު ވެރިކަމަށް ވަޑައިގެންނެވީ ރައްޔިތުންނަށް ލިބިފައި އޮތް އެއްޗެއް ލިބިފައި އޮތްތަނަކުން ދޭނެކަމަށް ވައުދުވެވަޑައިގެން ކަމަށެވެ. ނަމަވެސް ވެރިކަމަށް ވަޑައިގަންނަވާ އަމަލު ކުރެއްވީ ދިމާ އިދިކޮޅަށް ކަމަށެވެ. އަދި ބޭނުންވާ ބަޔަކަށް ފްލެޓުތައް ދިނުމުގެ މަގުސަދުގައި އެންޓި ކޮރަޕްޝަން ކޮމިޝަން (އޭސީސީ) ވެސް މިމައްސަލާގެ ތެރެއަށް އެމަނިކުފާނު ވައްދާފައިވާ ކަމަށެވެ. ނަމަވެސް މިއިން ޒަމާނެއްގައި މިފަދަ މައްސަލައެއް އޭސީސީން ތަހުގީގު ކޮށްފައިނުވާ ކަމަށް އޭނާ ވިދާޅުވި އެވެ.
މީގެ އިތުރުން ތަޒްމީލް ވިދާޅުވީ މިއަދުގެ ރައީސް މުއިއްޒަކީ ވަރަށް އިތުރުފުޅު ހައްދަވާ ބޭފުޅެއް ކަމަށާއި، މަގު މަތިންދާ މީހެއް ބުނާ ބަސް ގަބޫލު ކުރިނަމަވެސް ރައީސް ވިދާޅުވާ ވާހަކަފުޅެއް ގަބޫލުކުރަން ނުވާނެ ކަމަށެވެ.
އެއީ ރައީސް ޔާމީންގެ ސަރުކާރުގައި ޓްރާންސިޝަނަލް ޕީރިއަޑްގެ ތެރޭގައި ވެރިކަން ނިމެނިކޮށް ހަމަ އަވަސް އަރުވާލައިގެން އޭރުގައި ހުރި 7500 ޔުނިޓް އޭރު ބޭނުންހާ ބަޔަކަށް ދެމުން ދިޔަ ގޮތުގެ އެދުވަހު އެމަންޒަރު އެންމެ އިސް މަންޒަރުގެ ވެރިމީހަކަށް އިނީ ތިޔަ ވިދާޅުވާ މިއަދުގެ ރައީސުލްޖުމްހޫރިއްޔާ. މިއަދު ވެސް ވެރިކަމަށް ވަޑައިގެން އެންމެ ފުރަތަމަ ގަޔަށް ގައި ކަހައިގެން ކޮންމެހެން ވެސް ކުރަން ބޭނުންވި ކަމަކީ ނިމިިދިޔަ ސަރުކާރުން އަޅާފައިވާ ފްލެޓުތަކާ ކުޅުން އެނގޭތޯ. ވިދާޅުވީ އެކަމަކު ކެންޕޭންގެ ތެރޭގައި މީހަކަށް ލިބިފައި އޮތް އެއްޗެއް ލިބިފައި އޮތްތަނަކުން ލިބިފައި އޮތް ގޮތަކަށް ޚާއްސަކޮށް ދިވެހިރާއްޖޭގެ ސަރުކާރުގެ ގެޒެޓުގައި އެމީހެއްގެ ނަމެއް، އެމީހެއްގެ އައިޑީކާޑު އޮވެއްޖެ ކަމަށްވަނީ ނަމަ ތިމަންމަނިކުފާނު އެއްއަށް އެއްވެސް ބަދަލެއް ނުގެންނަވާނެ ކަމަށް. އެކަން ފުރިހަމަ ކޮށްދެއްވާނެ ކަމަށް. އެކަމަކު ވަޑައިގެންފައި އެބަސް ބަދަލު ކުރުމަށް މިކުރިކަމަކީ އެންޓި ކޮރަޕްޝަން ކޮމިޝަން ކިޔާ ބަޔަކު އޭގެ ތެރެއަށް ވެއްދީ.އެމްޓީޑީސީގެ ކުރީގެ މެނޭޖިންގ ޑިރެކްޓަރ ތަޒްމީލް އަބްދުއްސަމަދު
ތަޒްމީލް ވިދާޅުވީ ގެދޮރުވެރިޔާ ސްކީމުން ކުރީ ސަރުކާރުން ދޫކޮށްފައިވާ ފްލެޓުތަކަށް ރައްޔިތުންނަށް ވަރަށް އަވަހަށް ވަދެވޭނެ ކަމަށް އުންމީދު ކުރި ނަމަވެސް ރައްޔިތުންގެ އެ އުންމީދު މިސަރުކާރުން ނަގާލާފައިވާ ކަމަށެވެ.
ފަހި ދިރިއުޅުން ކޯޕަރޭޝަނާ ހަވާލުކޮށްގެން އިމާރާތްކޮށްފައިވާ، 4000 ފްލެޓަކީ، މިހައިތަނަށް ރާއްޖޭގައި ހިންގައިފައިވާ ސޯޝަލް ހައުސިންގ މަޝްރޫއުތަކުގެ ތެރެއިން އެންމެ ފުރިހަމަ "ފްލޯ ޕްލޭން" އަދި އެންމެ ޖާގަ ތަނަވަސް ފްލެޓްތައް ނަމަވެސް މިސަރުކާރުން ވަނީ ފްލެޓަށް ޝަރުތު ހަމަނުވާ ކަމަށް ބުނެ، ގިނަ ބަޔަކު ލިސްޓުން އުނިކޮށްފައެވެ. ފްލެޓު ޝަރުތު ހަމަވެގެން ފްލެޓު ލިބެނީ 1820 މީހުންނަށެވެ. އަދި 3119 މީހުންނަށް ފްލެޓު ނުލިބޭ ކަމަށް ހައުސިން އަދި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވަނީ ވިދާޅުވެފަ އެވެ.
