ކަސްޓަމަރުންގެ އެކައުންޓްތަކުން ފައިސާ މަދުވާ މައްސަލަ ބީއެމްއެލްއިން ދޮގުކޮށްފި
8 އެޕްރީލު 2025 | އަންގާރަ 14:29މީގެ ކުރިން ވެސް ކަސްޓަމަރުންގެ އެކައުންޓްތަކުން ފައިސާ މަދުވި މައްސަލަތަކެއް ފެންމަތިވެފައިވޭ
ބީއެމްއެލްގެ މައި އިމާރާތް
ބޭންކް އޮފް މޯލްޑިވްސް (ބީއެމްއެލް) ގެ ކަސްޓަމަރުންގެ އެކައުންޓްކުން ފައިސާ މަދުވާ ކަމަށް ބުނެ އެކި މީސްމީހުން ސޯޝަލް މީޑިއާ ކަންބޮޑުވުން ފާޅުކުރަމުންދާ މިދަނޑިވަޅުގައި އެކަން ބީއެމްއެލްއިން ދޮގުކޮށްފި އެވެ.
މިކަމާއި ގުޅިގެން ރާއްޖެއެމްވީން ކުރި ސުވާލަކަށް ޖަބާވުދެމުން ބީއެމްއެލްއިން ބުނެފައިވަނީ ކަސްޓަމަރުންގެ އެކައުންޓުތަކުން ފާއިސާ މަދުވާ މައްސަލައަކީ ދޮގު ވާހަކަތަކެއް ކަމަށެވެ. އެހެންނަމަވެސް އެކަމާއި ގުޅިގެން އިތުރު ތަފްސީލެއް ހާމަކޮށްފައެއް ނުވެއެވެ.
ހޯމަ ދުވަހުން ފެށިގެން މިފަދަ ވާހަކަތަކެއް އެކި މީސްމީހުން ސޯޝަލް މީޑިއާގައި ހިއްސާކުރަމުންދާއިރު، ނުކުރާ މުއާމަލާތްތަކަށް ޑަބަލްކޮށް ޓްރާންސެކްޝަން ހަދާފައިވާ ކަމަށާއި ނުކުރާ މުއާމަލާތްތަކަށް އެކައުންޓް ފައިސާ އުނިކުރަމުންދާ ކަމަށް ވެސް އެކި މީހުން ބުނެފައިވެ އެވެ.
ގައުމީ ބޭންކާއި މެދު ރައްޔިތުންގެ ޝަކުވާތަކެއް ދޭތެރެ ދޭތެރެއިން ބޮޑުވަމުން އަންނައިރު، މީގެ ކުރިން ވެސް ކަސްޓަމަރުންގެ އެކައުންޓްތަކުން ފައިސާ މަދުވި މައްސަލަތަކެއް ފެންމަތިވެފައިވެ އެވެ. އަދި ބޭންކްގެ މުވައްޒަފުންތަކެއް ކަސްޓަމަރުންތަކެއްގެ އެކައުންޓްތަކުން "ވައްކަންކުރި" މައްސަލަތަކެއް ވެސް ފެންމަތިވެފައިވެ އެވެ.
