އެއްކޮޅުން "ކުއްލި މައްސަލަ" ބޭރުކޮށްލުމަށް ފަހު، އަނެއްކޮޅުން މަޖިލީހުގެ ރައީސް ދެއްކެވީ ޣައްޒާގެ ޙާލަތާއި މެދު ކަންބޮޑުވެވަޑައިގަންނަވާ ވާހަކަ
ސަރުކާރުން މި މައްސަލައިގައި އަމަލުކުރާ ގޮތަށް އާއްމުން ދަނީ ފާޑުކިޔަމުން
އަބްދުއްރަހީމް އެފަދައިން ވިދާޅުވީ އިންޓަރ ޕާލަމެންޓްރީ ޔޫނިއަން ގެ، ނޮން އެލައިންޑް މޫވްމަންޓް (އެންއޭއެމް) ޕާލަމެންޓްރީ ނެޓްވޯކްގެ 4 ވަނަ ކޮންފަރެންސްގައި ތަގުރީރުކުރައްވަ
ފަލަސްތީނުގެ ގާޒާގައި އިސްރާއީލުން ކުރިއަށް ގެންދާ ނަސްލު ނައްތާލުމުގެ އަމަލުތަކާއި މެދު ރައްޔިތުންގެ މަޖިލީހުގެ ރައީސް، އަބްދުއްރަހީމް އަބްދުއްالله ކަންބޮޑުވުން ފާޅުކުރައްވައިފި އެވެ.
އަބްދުއްރަހީމް އެފަދައިން ވިދާޅުވީ އިންޓަރ ޕާލަމެންޓްރީ ޔޫނިއަން ގެ، ނޮން އެލައިންޑް މޫވްމަންޓް (އެންއޭއެމް) ޕާލަމެންޓްރީ ނެޓްވޯކްގެ 4 ވަނަ ކޮންފަރެންސްގައި ތަގުރީރުކުރައްވަމުންނެވެ.
އަބްދުއްރަހީމް މިފަދައިން ވިދާޅުވެފައި ވާއިރު، އިސްރާއީލުގެ ޕާސްޕޯޓްގައި ދިވެހިރާއްޖެ އެތެރެވުން ހުއްޓުވުމަށް ހުށަހަޅައިފައިވާ ބިލާމެދު ގޮތެއް ނުނިމި ލަސްވަމުންދާތީ ހުށަހަޅާ ކުއްލި މައްސަލަ ބަލައިނުގަތުމަށް ރައްޔިތުންގެ މަޖިލީހުގެ ރިޔާސަތުން ވަނީ ހޯމަ ދުވަހު ނިންމަވާފަ އެވެ. ހޯމަ ދުވަހު މަޖިލީހުގެ ރިޔާސަތުގައި އިންނެވި މަޖިލީހުގެ ނައިބު ރައީސް އަހުމަދު ނާޒިމް ވިދާޅުވީ ކެންދޫ ދާއިރާގެ މެމްބަރު މައުރޫފް ޒާކިރު ހުށަހަޅުއްވާފައިވާ އެ މައްސަލައަކީ ކުއްލި މައްސަލައެއްގެ ގޮތުގައި ބަލައިނުގަނެވޭނެ ކަމަށެވެ.
އެކަމާއި ގުޅިގެން އިސްރާއީލު ޕާސްޕޯޓް މަނާކުރުމުގެ މައްސަލައިގައި ސަރުކާރާއި ސަރުކާރުގެ ފުރިހަމަ މެޖޯރިޓީ އޮތް މަޖިލީހުގެ އިޚުލާސްތެރިކަމާއި މެދު އާއްމުން ދަނީ ސުވާލު އުފައްދަމުންނެވެ.
އިންޓަރ ޕާލަމެންޓްރީ ޔޫނިއަން ގެ، ނޮން އެލައިންޑް މޫވްމަންޓް (އެންއޭއެމް) ޕާލަމެންޓްރީ ނެޓްވޯކްގެ 4 ވަނަ ކޮންފަރެންސްގައި އަބްދުއްރަހީމް ވިދާޅުވީ ފަލަސްތީނުގެ ހާލަތާއި މެދު ވަރަށް ބޮޑަށް ކަންބޮޑުވެވަޑައިގަންނަވާ ކަމަށެވެ. އަދި އިސްރާއީލުގެ އަނިޔާވެރިކަން ހުއްޓުވުމަށް ހުއްޓުވުމަށް ބައިނަލްއަގުވާމީ ފެންވަރުގައި އެކަށީގެންވާ މަސައްކަތްތަކެއް ކުރުމަށް ގޮވާލެއްވި އެވެ.
އިސްރާއީލުގެ އަނިޔާވެރިކަމުގެ ސަބަބުން އެ ތަނުގެ އާންމު ރައްޔިތުން އުފުލަމުންދާ ކެކުޅުންތަކާ މެދު އިންތިހާއަށް ކަންބޮޑުވެވަޑައިގަންނަވާ ކަމަށް އެ މަނިކުފާޏު ވަނީ ވިދާޅުވެފައެވެ. ގާޒާގައި ހިނގަމުންދާ ހަމަނުޖެހުމާއި އެ ތަނުގެ ރައްޔިތުން އުފުލަމުންދާ ކެކުޅުންތަކާމެދު ދިވެހިން ކަންބޮޑުވާކަމަށް ވެސް އަބްދުއްރަހީމް ވިދާޅުވި އެވެ.
ގާޒާ އަށް އިންސާފު ހޯދާ ދިނުމަށް އެކަށީގެންވާ މަސައްކަތްތަކެއް ބައިނަލްއަގުވާމީ ފެންވަރުގައި ކުރުމަށް އަބްދުއްރަހީމް ގޮވާލެއްވިއެވެ. މީގެ އިތުރުން މަޖިލިސް މެންބަރުންގެ ހައިސިއްޔަތުން ގާޒާގައި ހިންގާ ނަސްލުހޭދު ކުރުމާ ދެކޮޅަށް މަސައްކަތް ކުރުމުގައި ނަމޫނާ ދައްކަންޖެހޭ ކަމަށް އެ މަނިކުފާނު ވިދާޅުވި އެވެ.
އަބްދުއްރަހީމް މިހެން ވިދާޅުވި ނަމަވެސް ސަރުކާރުން މި މައްސަލައިގައި އަމަލުކުރާ ގޮތަށް އާއްމުން ދަނީ ފާޑުކިޔަމުންނެވެ.
އިސްރާއިލް ޕާސްޕޯޓުގައި ރާއްޖެ އެތެރެވުން މަނާކުރުމާއި މެދު ހުށަހެޅި ކުއްލި މައްސަލަ ބަލައި ނުގަތުމުން މަޖިލީހާއި ސަރުކާރަށް ވަނީ ވަރަށް ބޮޑަށް ފާޑުކިޔުން އަމާޒުވެފައެވެ. އެ މައްސަލަ ބޭރު ކުރުމަށް ވާހަކަދައްކަވަމުންމަޖިލީހުގެ ނައިބު ރައީސް ނާޒިމް ވަނީ މަޖިލީހަށް ހުށަހަޅާ ކުއްލި މައްސަލައަކީ ރައްޔިތުންގެ ނުވަތަ ގައުމުގެ މަސްލަހަތަށް ސީދާ އަސަރު ކުރާފަދަ ބޮޑު ކަމެއް ކުއްލިއަކަށް ދިމާވުމުން އެކަމެއް ސަރުކާރުގެ ސަމާލުކަމަށް ގެނައުމަށް ހުށަހަޅާ މައްސަލަ އެއް ކަމަށް ވިދާޅުވެފަ އެވެ.
މީގެ އިތުރުން ސަރުކާރުން ކަމާއި މެދު އަޅާފައިވާ ނުވަަތަ އަޅާފައިނުވާ ފިޔަވަޅަކާމެދު ފާޑުކިޔުމަށް ހުށަހެޅިފައިވާ މައްސަލައަކަށް ވުމާއި މަޖިލީހުގައި ކުރިއަށް ދާ ބިލަކާއި ގުޅޭ ކަމަކަށް ނުވުން ކުއްލި މައްސަލައިގެ ޝަރުތުތަކުގެ ތެރޭގައި ހިމެނޭ ކަމަށް ނާޒިމް ވިދާޅުވި އެވެ.އިސްރާއީލުގެ ޕާސްޕޯޓުގައި ދިވެހިރާއްޖެއަށް އައުން މަނާކުރުމަށް، 2 ޖޫން 2024 ގައި ދިވެހި ރައްޔިތުންގެ ޑިމޮކްރެޓިކް ޕާޓީގެ ފަރާތުން ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް އިމިގްރޭޝަން ޤާނޫނަށް އިޞްލާޙެއް ހުށަހެޅުމާއެކު، ހަމަ އެދުވަހުގެ ވަގުތެއްގައި ވަޒީރުންގެ މަޖިލީހުގެ ބައްދަލުވުމެއް ބާއްވަވައި، އިސްރާއީލުގެ ޕާސްޕޯޓު މަނާ ކުރުމަށް ސަރުކާރުން ނިންމަވައިފައިވާކަމަށް އިއުލާނުކޮށްފައިވާކަން އެ ކުއްލި މައްސަލައިގައި ފާހަގަކޮށްދައިވެއެވެ. ނަމަވެސް، މިއަދާ ހަމައަށް މިކަމުގައި ޢަމަލީ ސިފަ ޖެއްސުމަށް ސަރުކާރުގެ ފަރާތުން އެއްވެސް މަސައްކަތެއް ކުރަމުންދާކަމަކަށް ނުފެންނަ ކަމަށް މައުރޫފް ވަނީ ވިދާޅުވެފަ އެވެ.
10 ޖޫން 2024 ގައި އެ ބިލު މަޖިލީހަށް ބަލައިގަތުމަށް ފާސްކޮށް، މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީއަށް ވަނީ ފޮނުވާފައެވެ. ނަމަވެސް މިއަދާ ހަމައަށްވެސް މި ބިލާ ގުޅިގެން ކޮމިޓީގެ ބައްދަލުވުމެއްވެސް ބޭއްވިފައި ނުވާކަން މައުރޫފް ފާހަގަކުރެއްވި އެވެ.
