ގާނޫނު އަސާސީގެ ބާރު ކަނޑުވާލި ކަމުގެ މައްސަލައިގައި ދެކުނު ކޮރެއާގެ ރައީސްގެ މައްޗަށް ހުކުރު ދުވަހު އެ ގައުމުގެ ދުސްތޫރީ ކޯޓުން ހުކުމް ކޮށް ރައީސް ޔޫން ސުކް-ޔެއޯލް މަޤާމުން ވަކިކުރުމުގެ އިތުރުން އޭނާ އަށް ލިބެމުން އައި އެތައް އިނާޔާތަކާއި އިމްތިޔާޒުތަކެއް ވެސް ނުލިބޭނެ ގޮތައް ވަނީ ނިންމާފައެވެ.

ރައީސް ޔޫންގެ މަގާމު ގެއްލިއްޖެ ކަމަށް ހުކުމް ކުރީ ކޮންސްޓިޓިއުޝަނަލް ކޯޓުގެ އިއްތިފާގުންނެވެ.

ރައީސް ކަމުގެ މަގާމު ގެއްލުމުގެ އިތުރުން ޔޫން އަށް ލިބިވަޑައިގަންނަވަމުން ދިޔަ ހުރިހާ އިމްތިޔާޒުތަކާއި އިނާޔާތްތައްވެސް އަތުލުމަށް ވަނީ ނިންމާފައެވެ. އެ ގޮތުން އިދާރީ މުވައްޒަފުންނާއި، ޑްރައިވަރުން ހަމަޖައްސައި ނުދިނުމާއި، ޕެންޝަންގެ ގޮތުގައި ލިބޭނެ ކަމަށް ބެލެވިފައިވާ ރައީސް ކަމުގެ މުސާރައިގެ 95 އިންސައްތަ ނުދިނުމަށް ވެސް ވަނީ ނިންމާފައެވެ.

މަގާމު ގެއްލުމާއެކު ރިޔާސީ ގަނޑުވަރު ހުސްކުރުމަށް ޔޫން އަށް ވަނީ އަންގާފައެވެ. އަދި އޭނާ އަވަހާރަ ވުމުން ރަސްމީ ގަބުރުސްތާނުގައި ފަސްދާނުނުލުމަށް ވެސް ވަނީ ނިންމާފައެވެ.

މައްސަލަ ފެންމަތިވީ، ޔޫން ވޭތުވެދިޔަ އަހަރުގެ ފަހުކޮޅު މާޝަލް ލޯ އިއުލާން ކުރުމާ ގުޅިގެންނެވެ.

ހުކުރު ދުވަހު ހެނދުނު ކޯޓުގައި ޙުކުމް އިއްވަމުން، އެކްޓިންގ ޗީފް ޖަސްޓިސް މޫން ހިޔުންގް-ބޭ ވިދާޅުވީ ރައީސް ޔޫން މާޝަލް ލޯ އިއުލާން ކުރެއްވި ސަބަބުތައް ކަމަށް ހުށަހެޅި ހުރިހާ ސަބަބުތަކެއް ބާތިލު ކަމަށެވެ. އަދި ޑިސެމްބަރު މަހު ވެރިރަށުގެ މަގުތަކަށް ސިފައިން ނެރުއްވީ އޭނާ އަށް ލިބިވަޑައިގެންފައިވާ ބާރުގެ ބޭރުން ކަމަށް ހުކުމުގައި ވެއެވެ.

އަސްކަރިއްޔާ އާއި ފުލުހުން ނެރުނީ ގާނޫނޫ އަސާސީން ބާރު ލިބިދީފައިވާ މުއައްސަސާތަކުގެ ބާރު ކަނޑުވާލުމަށް ކަމަށާއި، އެއާއެކު ރައްޔިތުންނަށް ކަށަވަރު ކޮށްދީފައިވާ އަސާސީ ހައްގުތަކަށް އަރައިގަނެފައިވާ ކަމަށްވެސް ހުކުމުގެ ބަޔާނުގައި ވެއެވެ. ރައީސް އަމަލު ކުރެއްވި ގޮތުން ގާނޫނު އަސާސީ ނެގެހެއްޓެވުމަށް ރައީސް ގެ މައްޗަށް އޮތް ޒިންމާ އާ ދުރަށް ވަޑައިގެންފައިވާ ކަމަށާއި އެއާއެކު ރައްޔިތުންގެ އިތުބާރަށް ޚިޔާނާތްތެރިވެވަޑައިގެންފައިވާ ކަމަށް ވެސް ބުނެފައިވެއެވެ.

މާޝަލް ލޯ އިއުލާނު ކުރައްވަމުން ރައީސް ޔޫން ވިދާޅުވެފައިވަނީ ދެކުނު ކޮރެއާގެ ދައުލަތާ ދެކޮޅު ފަރާތްތަކާއި އުތުރު ކޮރެޔާގެ ބާރުތަކުން ސަރުކާރުގެ ތެރެއަށް ވަދެފައިވާ ކަމަށެވެ. ނަމަވެސް، ގާނޫނު ހަދާ މަޖިލިސް އަށް ހުރަސް އެޅުމަށް ފޮނުވި އިސް ސިފައިންނާއި ފުލުހުން ކޯޓުގައި ހެކިބަސް ދެމުން ބުނެފައިވަނީ ރައީސް އެމީހުންނަށް އަމުރުކުރެއްވީ އިދިކޮޅު ސިޔާސީ ފަރާތްތައް ހައްޔަރުކޮށް، މާޝަލް ލޯ ނިމުމަކަށް ގެނައުމަށް މަޖިލީހުގައި ވޯޓު ނެގުން ހުއްޓުވުމަށް ކަމަށެވެ.

ދެކުނު ކޮރެއާގެ ގާނޫނު ހަދާ މަޖިލިސް - ނެޝަނަލް އެސެމްބްލީން ޑިސެމްބަރު 14 ވަނަ ދުވަހު ވަނީ ރައީސް ޔޫން އިތުބާރު ނެތް ކަމަށް ފާސް ކޮށްފައެވެ. ނަމަވެސް އޭނާ ރަސްމީކޮށް މަޤާމުން ވަކިކުރުމަށް ދުސްތޫރީ ކޯޓުގެ ރުހުން ބޭނުންވެއެވެ. މިހާރު މި ހުއްދަ ލިބުމާއެކު، ރައީސް ޔޫން ވަނީ ރަސްމީކޮށް މަޤާމުން ވަކިވެފައެވެ.

ޔޫން ވިދާޅުވީ ކޯޓުގެ ނިންމުން ގަބޫލު ކުރައްވާނެ ކަމަށެވެ.

ރައީސް ކަމުގެ މަގާމު ގެއްލުމުގެ އިތުރުންވެސް ސީރިއަސް ޖިނާއީ ތަހުގީގުތަކާ އޭނާ އަށް ކުރިމަތިލައްވަން ޖެހިވަޑައިގަންނަވާނެއެވެ. އެ ގޮތުން މަގާމުގެ ބޭނުން ނަހަމަ ގޮތުގައި ހިއްޕެވުމާއި، ގައުމަށް ޣައްދާރުވުމުގެ ކުށުގެ ތުހުމަތު ހިމެނެއެވެ.

ރައީސް މަގާމުން ވަކި ވުމާއެކު އައު އިންތިޚާބެއް 60 ދުވަހުގެ ތެރޭގައި ބާއްވާން ޖެހޭނެއެވެ.