ސްރީލަންކާގެ ކޮލޮމްބޯގައި ހުުންނަ ލަންކާ ހޮސްޕިޓަލްސް އިން އާސަންދަ ނުލިބޭ މައްސަލަ ބުދަ ދުވަހު ހައްލުވާނެ ކަމަށް އާސަންދަ ކުންފުނީގެ މެނޭޖިންގ ޑިރެކްޓަރު އައިމިނަތު ޒީނިޔާ ވިދާޅުވެއްޖެ އެވެ.

ކޮލަމްބޯގައި ހުންނަ ލަންކާ ހޮސްޕިޓަލްސް އަށް ބޭސްފަރުވާ ހޯދުމަށް ދާ މީހުންނަށް އާސަންދަ ޚިދުމަތް ދިނުން މެދުކަނޑާލީ ބިލުތަކަށް ފައިސާ ނުދައްކާތީ އެވެ. އަދި މި މައްސަލަ ހައްލުކުރުމުގެ މަސައްކަތް އަންގާރަ ދުވަހުން ފެށިގެން އާސަންދައިން އައީ ކުރަމުންނެވެ.

ރާއްޖެއެމްވީއަށް މައުލޫމާތު ދެއްވަމުން ޒީނިޔާ ބުދަ ދުވަހު ވިދާޅުވީ ލަންކާ ހޮސްޕިޓަލްސްއާއެކު ބައްދަލުވުމެއް ބާއްވާފައިވާ ކަމަށެވެ. އަދި މައްސަލަ ހައްލުކުރުމަށްޓަކައި މަސައްކަތްތަކެއް ކުރެވި، ބުދަ ދުވަހު ލަންކާ ހޮސްޕިޓަލްސް އަށް މެއިލްއެއް ކުރާނެ ކަމަށެވެ. އަދި އުއްމީދަކީ ބުދަ ދުވަހު މައްސަލަ ހައްލުވެ އަލުން ހިދުމަތް ދޭން ފެށުން ކަމަށް ޒީނިޔާ ވިދާޅުވި އެވެ.

ނުދައްކާ ހުރީ ކިހާ އަދަދެއްގެ ފައިސާއެއްކަމަށް އާސަންދައިން ހާމައެއް ނުކުރެއެވެ. ބިލްތައް ނުދައްކާ ހުރުމުން ލަންކާ ހޮސްޕިޓަލްސްއިން ވަނީ ކްރެޑިޓް އަށް ޚިދުމަތް ނުދޭނެ ކަމަށް ބުނެ ހިދުމަތް ދިނުން ހުއްޓާލާފައެވެ. މައުލޫމާތު ލިބޭ ގޮތުގައި ލަންކާ ހޮސްޕިޓަލްސް އަށް މިލިއަނަކަށްވުރެ ގިނަ ރުފިޔާ ދައްކަން ޖެހިފައި އެބަހުއްޓެވެ.

ލަންކާއަކީ ދިވެހިން ބޭސްފަރުވާގެ ޚިދުމަތް ހޯދުމަށް އެންމެ ގިނައި ދާ އެއް ގައުމެވެ. އެގޮތުން ބޭސްފަރުވާ ހޯދުމަށް އެ ގައުމުގައި ދިގު މުއްދަތަކަށް ދިރިއުޅޭ ދިވެހިން ވެސް ގިނަކަން ފާހަގަކޮށްލަން ޖެހެއެވެ.

ލަންކާގެ ހޮސްޕިޓަލަކުން އާސަންދަ ދިނުން ހުއްޓާލާފައިވާއިރު، މީގެ ކުރިން ދިވެހިންގެ ތެރެއިން ގިނަ ބަޔަކު ބޭސްފަރުވާ ހޯދަންދާ އިންޑިއާގެ މަނިޕާލް ހޮސްޕިޓަލުން ވެސް އާސަންދަ ދިނުން ވަނީ ހުއްޓާލާފަ އެވެ. އެކަމާއި ގުޅިގެން އޭރު އާސަންދައިން ބުނެފައިވަނީ އިންޑިއާގެ މަނިޕާލް ހޮސްޕިޓަލާ އެކު އޭރު އެއްބަސްވެފައިވާ އަގުތައް އެ ކުންފުނިން މުރާޖައާ ކުރަމުންދާތީވެ، އާސަންދަ ސްކީމުގެ ދަށުން އެ ހޮސްޕިޓަލަށް ބަލިމީހުން ފޮނުވުން މިވަގުތަށް ހުއްޓާލީ ކަމުގައެވެ.