ރަސްދޫގައި ފިހުނު ޒުވާން ދެމަފިރިންގެ ހާލު ގޯސްވެ، ވެންޓިލޭޓަރަށް ލައިފި

އއ. ރަސްދޫ ގެއެއްގައި ހިނގި އަލިފާނުގެ ހާދިސާގައި ފިހުނު ދެމަފިރިންގެ ހާލު ގޯސްވެ، ވެންޓިލޭޓަރުގައި ފަރުވާދޭން ފަށައިފި އެވެ.

އަލިފާނުގެ ހާދިސާ ހިނގާފައި ވަނީ އެ ދެމަފިރިން ދިރިއުޅެމުން ދިޔަ ގޭގެ ކޮޓަރީގަ އެވެ.

އައިޖީއެމްއެޗްގެ މީޑިއާ އޮފިޝަލް "ރާއްޖެ އެމްވީ" އަށް ވިދާޅުވީ ފިހިގެން އެ ހޮސްޕިޓަލަށް ގެނައީ 31 އަހަރުގެ ދެމަފިރިންގެ ހާލު ސީރިއަސްކަމުން ދެ މީހުންނަށް ވެސް މިވަގުތު ފަރުވާ ދެމުންދަނީ ވެންޓިލޭޓަރުގައި ކަމަށެވެ. އަދި މިވަގުތު ދެމީހުން ވެސް ވަނީ އައިސީޔޫއަށް ބަދަލުކޮށްފައި ކަމަށް ވެސް މީޑިއާ އޮފިޝަލް މިދާޅުވިއެވެ.

ދެބޭފުޅުން ވެސް މިވަގުތު ފަރުވާ ދެމުން ގެންދަނީ ވެންޓިލޭޓަރުގައި. ދެ ބޭފުޅުންވެސް އައިސީޔޫއަށް ލާފައި ވަނީ

އައިޖީއެމްއެޗުގެ މީޑިއާ އޮފިޝަލް

މި ހާދިސާއާއި ގުޅިގެން ފުލުހުން މީޑިއާއާއި ހިއްސާ ކުރި މެސެޖެއްގައި ބުނީ މި މަހުގެ 24 ވަނަ ދުވަހުގެ ރޭ 11:15 ކަންހާއިރު، އއ. ރަސްދޫގައި އަލިފާނުގެ ހާދިސާއެއް ހިނގިކަމަށް ރިޕޯޓުކޮށްފައި ވާކަމަށާއި އަދި މި އަލިފާނުގެ ހާދިސާގައި ދެ މީހަކު ޒަޚަމްވެ، ފަރުވާ ދިނުމަށް މާލެ ގެނެސްފައި ވާކަމަށާއި މި މައްސަލަ ފުލުހުން މިހާރު ގެންދަނީ ތަހުގީގު ކުރަމުން ކަމަށް ފުލުހުން ވަނީ ބުނެފައެވެ.

ރާއްޖެ އެމްވީއަށް މައުލޫމާތު ލިބިފައިވާ ގޮތުގައި އެ ދެމަފިރިންގެ ފަސް އަހަރުގެ ތުއްތު ކުއްޖަކު ހުރެއެވެ. އެހެން ނަމަވެސް އަލިފާނުގެ ހާދިސާ ހިނގި އެ ވަގުތު އެ ކުއްޖާ ކޮޓަރީގައި ނޫޅެއެވެ.

އަލިފާނުގެ ހާދިސާ ހިނގަން މެދުވެރިވި ސަބަބެއް މިހާތަނަށް އެނގިފައެއް ނުވެ އެވެ.