އެއްވެ އުޅުމާއި ޚިޔާލުފާޅު ކުރުމުގެ މިނިވަން ކަމަކީ ރާއްޖޭގެ ޤާނޫނު އަސާސީން ހަމަ ކޮންމެ ރައްޔިތަކަށް ވެސް ލިބިދީފައިވާ ހައްޤެއް ކަމަށާއި އެ ހައްޤަށް ހުރަސް އެޅުމަށް ރައީސް ޑރ. މުޙައްމަދު މުއިއްޒުގެ މި ސަރުކާރުން މަސައްކަތް ކުރުމަކީ ޚުދުމުހުތާރު ވެރިކަމެއް މި ރާއްޖެއަށް އަލުން އިޔާދަކުރުމަށް ކުރަމުން ގެންދާ މަސައްކަތެއް ކަމަށް ކުރީގެ އެންވަޔަރަމަންޓް މިނިސްޓަރ އައިމިނަތު ޝައުނާ ވިދާޅުވެއްޖެއެވެ.

އެމްޑީޕީން ސިލްސިލާކޮށް ކުރަމުންގެ ގެންދާ އިހުތިޖާޖުތަކަށް ހުރަސް އެޅުމަށް ރައީސް މުއިއްޒުގެ މި ސަރުކާރުން ގެންދަނީ މަސައްކަތް ކުރަމުންނެވެ. އެގޮތުން ސުލްހަވެރިކަމާއި އެކު އެމްޑީޕީން ރައްޔިތުންގެ ހައްޤުގައި ކުރަމުން ގެންދާ އިހުތިޖާޖުތައް ހުއްޓުވާ، އިހުތިޖާޖުގެ ބައިވެރިންނަށް ބިރުދައްކާ އެތައް ގޮތަކުން އަނިޔާތައް ދެމުން އަންނަ ކަމަށް އެމްޑީޕީން އަންނަނީ ބުނަމުންނެވެ. އެގޮތުން ފުލުހުން ގެންދަނީ އިހުތިޖާޖުގެ ބައިވެރިން ފުލުހަށް ހާޒިރުކޮށް ބަޔާން ވެސް ނަގަމުންނެވެ.

އެމްޑީޕީން ބުދަ ދުވަހުގެ ރޭ ކުރިއަށް ގެންދިއަ އެއްވުމުގައި މިކަމަށް އަލިއަޅުވާލައި ޝައުނާ ވިދާޅުވީ މިއަދު މި ގައުމުގެ ހާލަތު ވަރަށް ބޮޑަށް ކަންބޮޑުވާ ހިސާބަށް ހިނގައްޖެ ކަމަށާއި އެގޮތުން ކޮންމެ ރެއަކު ދިވެހި ރައްޔިތުންގެ ކަންބޮޑުވުންތަކުގެ އަޑު އިވެމުން އެބަދާ ކަމަށެވެ.

ޝައުނާ ވިދާޅުވީ އެމްޑީޕީގެ އަންހެނުންނަށް ކުރާ ފުރައްސާރައަކީ ލަދުގަންނަށް ޖެހޭނޭ ކަމެއް ކަމަށާއި ރައްޔިތުންނަށް ލިބިދީފައިވާ އެއްވެ އުޅުމުގެ މިނިވަންކަމުގެ ބޭނުން ކޮށްގެން ސުލްހަވެރިކަމާއި އެކުގައި އެމްޑީޕީން ކުރަމުން މި ގެންދާ މަސައްކަތަކީ ޤާނޫނު އަސާސީން ރައްޔިތުންނަށް ލިބިދީފައިވާ ހައްޤެއް ކަމަށެވެ.

ރައްޔިތުންނަށް ލިބިދީފައި މި ހައްޤު ނިގުޅައިގަނެ، މި ހައްޤަށް އަރައިގަތުމަށް މި ސަރުކާރުން ކުރަމުން މިގެންދާ މަސައްކަތަކީ ޚުދުމުހުތާރު ވެރިކަމެއް މި ދިވެހިރާއްޖޭގައި އަލުން އަނބުރާ އިޔާދަ ކުރުމަށް ކުރަމުން ގެންދާ މަސައްކަތެއް ކަމަށް ޝައުނާ ވިދާޅުވިއެވެ.

މީގެ އިތުރުން ޝައުނާ ވިދާޅުވީ ފެނިގެން މިދަނީ ރައްޔިތުންގެ ބުރަ މަސައްކަތުން ހޯދާފައިވާ ފެހި ޤާނޫނު އަސާސީވެސް ފުނޑާލަމުން ގެންދާ މަންޒަރު ކަމަށާއި އަދި މި މުޅި ނިޒާމު ފުނޑާލައި ޚުދުމުހުތާރު ވެރިކަމަކާއި ދިމާއަށް މި ސަރުކާރު މިސްރާބު ޖަހާފައިވާ ތަން ކަމަށެވެ.

ޝައުނާ ވިދާޅުވީ މިހާރު ރާއްޖޭގެ މިނިވަން މުއައްސަސާތައްވެސް މިވަނީ ރައީސް މުއިއްޒުގެ މުށުތެރެއަށް ލައިގެން ހުރިހާ ބާރެއް ނަންގަވައިގެން ގޮންމުށުގެ ބާރުދައްކަން ފަށާފައި ކަމަށެވެ.