މި ސަރުކާރުން ރާއްޖޭގެ ގިނަ ރައްޔިތުންތަކަކީ ދޮގު ހަދާ ބައެއް ކަމަށް ވަނީ ނިންމާފައި: މޭޔަރު އާޒިމް

މި ސަރުކާރުން ރާއްޖޭގެ ގިނަ ރައްޔިތުންތަކަކީ ދޮގު ހަދާ ބައެއް ކަމަށް ނިންމައި، ފްލެޓުތައް އަތުލާފައިވަނީ ބޭއިންސާފުން ކަމަށް މާލެސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.

އަންގާރަ ދުވަހުގެ ރޭގެ ފަލަސުރުހީ ޕްރޮގްރާމްގައި މޭޔަރު އާޒިމް ވިދާޅުވީ ރައްޔިތުން މަގު މައްޗަށް ނުކުންނަނީ ހައްގުތައް ނުލިބުމުން ކަމަށާއި، މުއައްސަސާތަކުން ވެސް ރައްޔިތުންގެ ހައްގުތައް ހޯދައިދިނުމަށް ފެއިލްވުމުން ކަމަށެވެ.

އާޒިމް ވިދާޅުވީ ހުރިހާ ބާރެއް އޮތީ ރައްޔިތުންގެ އަތުގައި ކަމަށާއި، ހައްގުތައް ގެއްލުމުން ރައްޔިތު މީހާ ގޭގައި ހުރެދާނެ ކަމަށް އުންމީދު ކުރަމަކީ ގޯހެއް ކަމަށެވެ. އަދި މިހާރު މިރާއްޖޭގައި ގައުމުގެ މިނިވަންކަން ގެއްލޭ ގޮތަށް ކަންކަން ކުރުމުގެ ފުރުސަތު އެއްވެސް ސަރުކާރަކަށް ދިވެހި ރައްޔިތުން ނުދޭނެ ކަމަށް އޭނާ ވިދާޅުވިއެވެ.

ކުރީ ސަރުކާރުން ދޫކޮށްފައިވާ ގެދޮރުވެރިޔާ ފްލެޓުތައް އަތުލާފައިވާތީ އެކަމަށް އިޝާރާތް ކުރައްވައި އާޒިމް ވިދާޅުވީ މި ސަރުކާރުން ރާއްޖޭގެ ގިނަ ރައްޔިތުންތަކަކީ ދޮގު ހަދާ ބައެއް ކަމަށް ނިންމި ނިންމުން ކުށްވެރި ކުރާ ކަމަށެވެ. އަދި ވިދާޅުވީ ދައުލަތުން ފްލެޓު ލިބިފައިވާ ކަމަށް ރައްޔިތުންނަށް ލިޔުން ދީފައިވާއިރު، އެ ލިޔުން އެހެން ބާތިލް ނުކުރެވޭނެ ކަމަށާއި، ސަރުކާރުން އެލިޔުން ބާތިލް ކުރުމަށް ދާންޖެހޭނީ ކޯޓަށް ކަމަށް އާޒިމް ވިދާޅުވިއެވެ.

މީގެ އިތުރުން ސަރުކާރުން ފައިސާ ޗާޕު ކުރުމަށް މަސައްކަތް ކުރާތީ އެކަން ފާހަގަކުރައްވައި އާޒިމް ވިދާޅުވީ ހުރިހާ ގެއްލުމެއް ކުރިމަތިވާނީ ރައްޔިތުންނަށް ކަމަށާއި، އާދައިގެ ދިރިއުޅުން އުޅެމުންދާ ރައްޔިތު މީހާ އިތުރަށް ނިކަމެތިވާނެ ކަމަށެވެ. އަދި ރާއްޖޭގައި ގާތްގަނޑަކަށް މުއްސަންދި ވެފައިވަނީ 5 ޕަސެންޓް މީހުން ކަމަށާއި، ދެން ތިބި 95 އިންސައްތަ މީހުންނަކީ ވަރަށް އާދައިގެ ދިރިއުޅުމުގައި ދިރިއުޅެމުންދާ މުސާރަވެރިން ކަމަށެވެ.

ދެނެއް މިގައުމުގައި މިނިވަންކަން ގެއްލޭ ގޮތަކަށް ކަންތައްތައް ކުރާކަށް އެއްވެސް ވެރިއަކަށް އެއްވެސް ސަރުކާރަކަށް މިގައުމުގެ ރައްޔިތުން ފުރުސަތެއް ނުދޭނެ.އެއީ ކުންހީއެއް މޮޔަ ވިސްނުންފުޅެއް. އެ ވިސްނުން ދޫކޮށް ރައްޔިތުން އެދޭ ގޮތަަށް ގައުމު ހިންގުމަށްޓަކައި ގައުމުގެ މިސްރާބު ބަދަލުކުރަންޖެހޭ. އަސްލު ޑޮލަރު 15.42 އަކަށް. އަދިވެސް މިއުޅެނީ 19 ގައި. 20އަށް އަރާގެން މިއޮތް ދަނީ. އަދި 15 ބިލިއަން ޗާޕު ކުރަން އެއުޅީ. 15 ޗާޕު ކޮށްފިއްޔާ 25 މިކޮޅުން ލާހިކެއް ނޫން ހުއްޓުވާކަށް. މިހާ ބޮޑު ނުރައްކާތެރިކަމެއް ކުރަން އެ އުޅެނީ. ހުރިހާ ރައްޔިތުން ނިކަމެތިވާނެ. ދެން މީގައި ވާނެ ގޮތަކީ އިގްތިސާދީ ގޮތުން ވިސްނާއިރު ވާނެ ގޮތަކީ މުއްސަންދިން އިންތިހާއަށް މުއްސަންދިވެގެން ދާނެ. އެމީހުންނަށްތާ މުދާ އިންޕޯޓު ކޮށްގެން ގެނެވޭނީ. އެ ގެނެވުނީމަ މުދާ ވިއްކަން ޖެހޭނީ އަގުބޮޑުކޮށް. މުސާރަތައް ބޮޑެއްނުވި. ހުރި ލާރިކޮޅު އިންޕޯޓު ކުރާ މީހާއަށް ދިނީމަ އާއްމު ރައްޔިތު މީހާ އެއްކޮށް ފަނގީރުވެ ނިކަމެތިވެގެން މިދަނީ. އެހެންވީމަ ހުރިހާ ރައްޔިތުން ނިކަމެތިވެ ފަނގީރުވެގެންދާނެ. އެހިސާބަށް ކަންތައްތައް މިދަނީ. އަތް މަތި ހަމަ ހުސްވެގެންދާނެ. މުއްސަންދި މީހާ މުއްސަންދިވެގެންދާނެ.

މާލެސިޓީގެ މޭޔަރު އާދަމް އާޒިމް

އާޒިމް ވިދާޅުވީ ފާއިސާ ޗާޕުކޮށް، ރައްޔިތުންގެ ހައްގުތަކަށް އަރައިގަނެ، ރައްޔިތުން ނިކަމެތި ކުރާނަމަ ރައްޔިތުން މަގު މައްޗަށް ނުކުންނާނެ ކަމަށާއި، އެމަސައްކަތުގައި އެމްޑީޕީން ވެސް ބައިވެރިވާނެ ކަަމަށެވެ. އަދި މިހާތަނަށް މިގައުމުގައި ރައްޔިތުންނަށް ފަސޭހަވާނެ ހުރިހާ ކަމެއް ގެނެސްދީފައި ހުރީ އެމްޑީޕީގެ ވިސްނިމުގެ ތެރެއިން ކަމަށާއި، އެ ހައްގުތައް ގެއްލި ރައްޔިތުން ބިކަމެ ނިކަމެތިވެގެންދާތަން ބާލަން އެމްޑީޕީން ނުތިބޭނެ ކަމަށް އޭނާ ވިދާޅުވިއެވެ.