ކަރަބޯ ކަޕްގެ ފައިނަލްގައި ލިވަޕޫލް ބަލިކޮށް، ނިއުކާސަލް ޔުނައިޓެޑުން މުބާރާތުގެ ޗެމްޕިއަންކަން ހޯދައިފި އެވެ.

ވެމްބްލީ ސްޓޭޑިއަމްގައި ލިވަޕޫލްއާ ދެކޮޅަށް ކުޅުނު މެޗު ނިއުކާސަލް އިން ކާމިޔާބު ކުރީ 2-1 އިންނެވެ. މެޗުގެ ފުރަތަމަ ހާފުގައި ނިއުކާސަލް އިން އެއް ލަނޑު ޖެހިއިރު، ދެ ވަނަ ހާފުގައި ވަނީ ދެ ވަނަ ލަނޑެއް ޖަހައިފަ އެވެ. މެޗުގައި ނިއުކާސަލް އިން ދެ ލަނޑު ޖެހި ފަހުން، ލިވަޕޫލް އިން ވަނީ މެޗުގައި އެ ޓީމުގެ ހަމައެކަނި ލަނޑު ޖަހައިފަ އެވެ.

މެޗުގެ ފުރަތަމަ ހާފުގެ އިތުރު ވަގުތުގައި ލަނޑު ޖަހައި ނިއުކާސަލަށް ކުރި ހޯދައިދިނީ ޑޭން ބާން އެވެ. އެ ލަނޑު އޭނާ ޖެހީ ކިއެރަން ޓްރިޕިއާ ތަނަވަސްކޮށްދިން ފުރުސަތެއްގަ އެވެ.

އޭގެ ފަހުން މެޗުގެ ދެ ވަނަ ހާފު ފަށައިގެން އަށް ވަނަ މިނެޓުގައި އެލެގްޒެންޑާ އިސާކް ވަނީ ނިއުކާސަލްގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޖަކޫބް މުރްފީ އެވެ.

މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ލިވަޕޫލްގެ ހަމައެކަނި ލަނޑު ޖެހީ ފެޑެރިކޯ ޗިއެސާ އެވެ. އެއީ ހާވޭ އެލިއޮޓް ތަނަވަސްކޮށްދިން ފުރުސަތެއްގައި ޗިއެސާ ޖެހި ލަނޑެކެވެ.

މިއީ ފާއިތުވި 70 އަހަރުގެ ތެރޭގައި ނިއުކާސަލަށް ކާމިޔާބު ކުރެވުނު ފުރަތަމަ ޑޮމެސްޓިކް ތައްޓެވެ. އަދި މިއީ ނިއުކާސަލް އިން ކަރަބޯ ކަޕްގެ ޗެމްޕިއަންކަން ވެސް ހޯދި ފުރަތަމަ ފަހަރެވެ.