ޕައިލެޓަށް ކޯޑިނޭޓްސް އޮޅިގެން ތަމްރީނު ގައި އުޅުނު ކޮރެއާގެ އަސްކަރީ ބޯޓުތަކުން އާންމުން އުޅޭ ތަނަކަށް ބޮން އަޅާ 15 މީހުންނަށް އަނިޔާވެއްޖެ
މި ހާދިސާއާ ގުޅިގެން ދެކުނު ކޮރެއާގެ އެއަރ ފޯސްއިން މާފަށް އެދި، ގެއްލުން ލިބުނު ފަރާތްތަކަށް ބަދަލު ދޭނެ ކަމަށް ވަނީ އިއުލާނު ކޮށްފައި.
ދެކުނު ކޮރެއާގެ ވައިގެ ސިފައިން ބުނީ އެގައުމުގެ ކޭއެފް-16 ފަޔަރ ޖެޓް ދެ ބޯޓުން އަސްކަރީ ތަމްރީނެއްގެ ތެރޭގައި ރޭންޖުން ބޭރުން 8 ބޮން އަޅާފައިވާ ކަމަށެވެ . | ރޮއިޓާސް
އަސްކަރީ ތަމްރީންތަކެއްގައި އުދުހެމުން ދިޔަ ދެކުނު ކޮރެއާގެ ބޯޓުތަކުން އެ ގައުމުގެ އާންމުން ދިރިއުޅޭ ސަރަހައްދަކަށް ބޮން އެޅުމުގެ ސަބަބުން 15 މީހުންނަށް އަނިޔާވެއްޖެއެވެ.
ދެކުނު ކޮރެއާގެ އުތުރު ސަރަހައްދުގައި ހުންނަ ޕޮޗިއޮން ސިޓީއަށް ދިމާވި ނުރައްކާތެރި ހާދިސާއެއްގައި އަނިޔާވި މީހުންގެ ތެރެއިން ދެ މީހަކަށް ބޮޑެތި އަނިޔާތަކެއް ވެފައިވެއެވެ.
ދެކުނު ކޮރެއާގެ އެއަރ ފޯސްގެ ކޭއެފް-16 އިގެ ދެ ފައިޓަރ ޖެޓް މަތިންދާ ބޯޓުން ޖުމްލަ 8 ބޮން އާންމުން ދިރިއުޅޭ ސަރަހައްދަކަށް އެޅީ ބްރާސްފަތި ދުވަހު ހެނދުނުގެ ވަގުތެއްގައެވެ.
އެތަނުން އެއް ބޯޓުން މި ބޮންތައް އެ ސަރަހައްދަށް އަޅަން ދިމާވީ ޕައިލެޓަށް ކޯޑިނޭޓްސް ޖެހުމުގައި ކުށެއް ހެދުމުގެ ސަބަބުން ކަަމަށް މީޑިއާ ރިޕޯޓުތައް ބުނެއެވެ.
މިލިޓަރީން މައުލޫމާތު ދީފައިވާ ގޮތުގައި، ދެވަނަ ޖެޓުން ބޮން އެޅި ސަބަބު އަދިވެސް ގެންދަނީ ތަހުގީގު ކުރަމުންނެވެ. މި ހާދިސާއާ ގުޅިގެން ހުރިހާ ލައިވް-ފަޔަރ ތަމްރީނުތައް މެދުކަނޑާލާފައިވާ ކަމަށް އެއަރ ފޯސްއިން ބުނެއެވެ.
ހާދިސާގައި ބައެއް އިމާރާތްތަކަށް ވެސް ވަނީ ގެއްލުން ލިބިފައެވެ.
މި ހާދިސާއާ ގުޅިގެން ދެކުނު ކޮރެއާގެ އެއަރ ފޯސްއިން މާފަށް އެދި، ގެއްލުން ލިބުނު ފަރާތްތަކަށް ބަދަލު ދޭނެ ކަމަށް އިއުލާން ކޮށްފައިވެއެވެ.
ޕޮޗިއޮން ސިޓީގެ އޮތޯރިޓީތަކުން ބީބީސީއަށް މައުލޫމާތު ދީފައިވާ ގޮތުގައި، އެ ސަރަހައްދުގެ ރައްޔިތުން ވަނީ ރައްކާތެރި ތަނަކަށް ބަދަލުކުރެވިފައެވެ. ނަމަވެސް، ފަހުން ޔޮންހަޕް ނިއުސްއިން ރިޕޯޓްކޮށްފައިވާ ގޮތުގައި، ހާދިސާ ހިނގި ސަރަހައްދުން ނުގޮވާ އޮތް ބޮމެއް ފެނިފައެއް ނުވެއެވެ.
ދިފާއީ މިނިސްޓްރީން ބުނެފައިވާ ގޮތުގައި، މި ތަމްރީނުަތައް ކުރިއަށް ގެންދިޔައީ އެމެރިކާގެ ސިފައިންނާ ގުޅިގެން ކުރިއަށް ގެންދާ ތަމްރީނުތަކުގެ ތެރެއިން ކަމަށެވެ.
